Salmo 140

₁Senhor, xereraa jepe ke heko vai va'e gui.

Xerepy avakue ojerovia rei va'e gui.

₂Ha'e kuery ma mba'emo vai anho opy'a re omoĩ.

Joguero'axea rupi rive ikuai.

₃Mboi rami oaĩmbe'e 'rã oapekũ,

ijayvua ma mboi guigua veneno rami ae.

₄Senhor, xerepy ke heko vai va'e po gui,

xereraa jepe avakue ojerovia rei va'e gui,

xembojepekuavo aguã re onhea'ã okuapy va'e kuery gui.

₅Ojejou porã rei va'e kuery ma nhemi rupi omoĩ 'rã nhuã xã xembo'a aguã,

tape yvýry oipyo 'rã xembo'aarã.

Omoĩ 'rã nhuã xembo'a aguã.

₆Aipoa'e Senhor pe: “Ndee ma Xeruete.”

Senhor, ajerure ramo xepytyvõ ke.

₇Senhor xereraa jepea ndepo'akapa va'e,

joe opu'ãa ára py ndee xeakã rejao'i.

₈Senhor, emoingo eme heko vai va'e oipota va'e.

Eja eme joapo vaixea rupi ikuai aguã rami.

₉Xejokopa rei va'e kuery onhemboyvate ri ramo

ejapo ha'e kuery re ae ju ijayvu vaiague ojeapa aguã rami.

₁₀Ha'e kuery áry tou tapyĩ, tomomboa tata py.

Yvykua vaikue py tomomboa, opu'ã ve'ỹ aguã py.

₁₁Joe ijayvu rei va'e toĩ atã eme yvy re.

Teko vai toakykue monha avakue ojerovia rei va'e, omomba peve.

₁₂Xee aikuaa Senhor oepy 'rãa iporiaukue'i,

opena 'rã oikotevẽ rei'i va'e kuery re.

₁₃Ha'e ramo heko porã va'e kuery oguerovy'a 'rã nderery,

anhetẽ rupi ipy'a va'e ikuai 'rã nerenonde.