Salmo 139

₁Senhor, ndee ma xere reikuaa pota vy xekuaa porã va'e.

₂Reikuaa 'rã aguapy ha'e apu'ã ju rã.

Mombyry gui teĩ reikuaa xepy'a re oĩ va'e ha'e javi.

₃Aguata ha'e anheno ramo ndee xerexa 'rã.

Reikuaapa 'rã aikoa ha'e javi.

₄Xeayvu aguã xejuru py oĩ e'ỹ mbove voi

ndee Senhor reikuaapa 'rã.

₅Xejoko 'rã xerakykue ha'e xerenonde katy,

xere ndepo remoĩ vy.

₆Ha'e rami xekuaapaa ma iporã ete xevy.

Yvate ete rã ndaikuaai 'rãe.

₇Marã katy nda'u anhemombyry 'rãgue Nenhe'ẽ gui?

Marã katy nda'u ajava 'rãgue rexaa gui?

₈Yva re aa teĩ ha'e py ndee reĩ 'rãgue.

Yvykua vaikuevea py anhemboupa teĩ ha'e py voi reĩ 'rãgue.

₉Kuaray oẽa katy aveve avy vy

ye'ẽ apy peve aa teĩ

₁₀ha'e py voi ndepo xerereko 'rãgue,

reiporu kuaa regua xemombaraete 'rãgue.

₁₁Xee aipoa'e ramo: “Pytũ xeao'i 'rã,

hexakã xeyvýry rupigua pytũmba 'rã” ha'e teĩ

₁₂ndevy pe pytũvea ete voi napytũi 'rãgue,

mba'eta ndevy pe pytũ ha'e hexakãa ma joo rami meme.

₁₃Mba'eta ndee ma xepy'a apoare,

xexy rye py xemoingo va'ekue.

₁₄Xee roguerovy'a, anhemondyi aguã rami xeapo rire.

Nerembiapokue ma iporã ete va'e meme.

Ha'e rami aikuaa porã xepy'a py.

₁₅Xekãgue nderejao'i teri jave hi'ã py xeapo,

ha'e gui xembotuvixa'i imoiny yvy guy py rami.

₁₆Naxeratãi teri jave ndee ma xerexa.

Ndekuaxia re ipara ma voi xee aiko aguã ára ha'e javi,

peteĩ-teĩ ipara oiny peteĩve oiko e'ỹ mbove ma voi.

₁₇Xeruete, renhembopy'aa ma iporã ete xevy.

Mbovy rei e'ỹ oĩ.

₁₈Xee aipapa va'e rire ita ku'i gui hetave 'rãgue.

Aipapa, aipapa teĩ ndaipapapai 'rãgue.

₁₉Xeruete, remomba voi 'rãgue heko vai va'e!

Avakue tuguy moẽa, pejepe'apa xea gui!

₂₀Ha'e kuery ma ndere opu'ã rei okuapy,

nderovaigua kuery ijayvu vaikue-ikue 'rã.

₂₁Senhor, xee ajou vai ndejou vaia kuery.

Ndere opu'ã rei va'e kuery gui xee ajeguaru.

₂₂Ha'e kuery re ndaxea'eveia oĩmba,

nderovaigua kuery ete ikuaia aikuaa.

₂₃Xeruete, xerexa pota,

ha'e eikuaapa xepy'a re oĩ va'e.

Xera'anga, ha'e eikuaa anhembopy'aa ha'e javi.

₂₄Exa xere pa oĩ ha'eve'ỹa rami aikoa,

ha'e xerereko tape imarã e'ỹ va'e rupi.