Salmo 137

₁Babilônia tetã py yakã oĩ va'e yvýry roguapy roinya py

rojae'o va'ekue Jerusalém tetã re orema'endu'a vy.

₂Oremba'epu ixã reta va'e roupi imoiny va'ekue

ha'e py yvyra ikuai va'e rakã re.

₃Mba'eta escravo-rã orereraa are kuery ojerure roporaei aguã.

“Peporaei na orevy Sião regua mboraei”, he'i okuapy.

₄Ha'e gui mba'exa 'rã tu roporaei mboraei Senhor pegua

yvy mboae re orekuai vy?

₅Mba'eta ndee Jerusalém tetã gui xerexarai ri ramo

xepo aiporu kuaa regua ta'ipirupa.

₆Xeapekũ tojapa xejuru py re

xapy'a rei ndere naxema'endu'avei rã,

e'ỹ vy Jerusalém gui mba'emo arovy'ave ramo.

₇Senhor, nema'endu'a ke Edom pygua kuery rembopaga aguã

Jerusalém tetã oitya jave ikuaiague re.

Mba'eta ha'e kuery ma

“Peitypa ke, peitypa yvy katy peve!” he'i okuapy va'ekue.

₈Babilônia tetã pygua kuery, peneretã voi ombovaipa pyrã oĩ.

Ovy'a ete 'rã orere pejapoague re penembopaga va'e.

₉Ovy'a 'rã penda'y kuery voi ojopy vy

ita re omou'ũmba avi va'e.