Nhanderuete anho nhamboete aguã regua
1Senhor, ore kuery e'ỹ toremboetea, ore e'ỹ,
ha'e rami 'rãgue py nderery anho tomboetea,
renhomboaxya ha'e ojeroviapy reikoa re.
2Mba'e re tu amboae regua kuery joupe-upe oporandu vy
“Mamo tu oĩ ha'e kuery Ruete?” he'i 'rã okuapy?
3Mba'eta Nhanderuete ma yva re oĩ,
opa mba'e ojapo oikovy ha'e ae oipotaa rami.
4Ha'e rã ha'e kuery pegua tuuete ma prata e'ỹ vy ouro guigua rive,
avakue opo py ojapo va'ekue meme.
5Ijuru va'eri nda'ijayvui,
hexa va'eri ndoexai,
6ijapyxa va'eri noendui,
inhapyĩgua va'eri noetũi,
7ipo va'eri mba'eve re ndopokoi,
ipy va'eri ndoguatai,
ijyryvi va'eri ha'e kuery gui neĩ peteĩ ayvu nonhendui.
8Ijapoare kuery topyta ha'e nunga rami ae,
hexe ojerovia va'e kuery voi.
9Ha'e gui Israel kuery ma Senhor re ae tojerovia.
Ha'e anho ma ipytyvõa ha'e mba'emo vai jokoa oiko.
10Arão ramymino kuery tojerovia Senhor re.
Ha'e anho ma ipytyvõa ha'e mba'emo vai jokoa oiko.
11Senhor renonde ojererokyjea rupi ikuai va'e ha'e javi tojerovia Senhor re.
Ha'e anho ma ipytyvõa ha'e mba'emo vai jokoa oiko.
12Mba'eta nhandere Senhor ima'endu'a vy nhanemoingo porã 'rã.
Omoingo porã 'rã Israel kuery,
omoingo porã 'rã Arão ramymino kuery,
13omoingo porã 'rã henonde ojererokyjea rupi ikuai va'e,
yvatekueve ha'e yvyĩgueve voi.
14Senhor tomoĩve tema peiko porã aguã,
peẽ kuery ha'e penda'y kuery pe guive.
15Senhor yva ha'e yvy apoare va'e
ogueroayvu porã va'e tapendekuai.
16Yva ma Senhor pegua oĩ.
Ha'e rã yvy ma ome'ẽ avakue ra'y kuery pe.
17Omanogue ma ndogueroporaei 'rã Senhor,
okyrirĩ va'e anho ikuaia py oguejy va'ekue.
18Ha'e rã nhande kuery ma jarovy'a 'rã Senhor,
aỹ guive raka'e rã peve.
Aleluia!