Salmo 116

₁Xee ma ayvu Senhor,

mba'eta ajerure ramo oendu xeayvua.

₂Xea katy ojero'a vy ojapyxaka rire

ixupe ajapukai 'rã aikovea ja.

₃Manoa regua nhuã xemboty va'ekue,

jexavaia yvykua vaikue guigua xere ipo'aka va'ekue.

Ha'e ramo aiko axya ha'e ndavy'aia py ha'a karamboae.

₄Ha'e rami vy ajapukai Senhor rery rupi:

“ Senhor, eraa jepe ke xerekove!” ha'e va'ekue.

₅Senhor ma porayvu ha'e heko porã va'e,

Nhanderuete ma nhanemboaxya rupi oiko va'e.

₆Senhor ma hi'arandu e'ỹ'i va'e kuery re opena porã va'e.

Ha'e rami vy ha'a ajupya py xerexa vy xereraa jepe karamboae.

₇Xenhe'ẽ, ejevy ju ke repytu'u aguã py,

mba'eta xevy Senhor mba'emo porã ome'ẽ oata aguã rami e'ỹ.

₈Ha'e rami vy xenhe'ẽ oepy amano taa gui.

Oepy xerexa xerexaya gui,

xepy guive oepy onhepyxangaa gui.

₉Ha'e ramo Senhor renonde aiko 'rã

okuave va'e yvy re.

₁₀Hexe ajerovia va'eri xejeupe xeayvu vy

“Ajexavai ete rima aikovy”, ha'e va'ekue.

₁₁Xepy'a eta rei vy

“Avakue ikuai va'e ma ijapu va'e meme”, ha'e va'ekue.

₁₂Senhor opa mba'e py xevy ojapo porãague re

mba'e nda'u ame'ẽ 'rã ixupe?

₁₃Xereraa jepeague arovy'a vy aupi 'rã karo,

ha'e Senhor rery rupi aroporai 'rã.

₁₄Senhor pe ajapopa 'rã anhemboayvuague

ixupegua kuery ha'e javi oexaa py.

₁₅Hepy ete va'e Senhor oexa 'rã

ojeupegua iky'a e'ỹ va'e kuery omano rã.

₁₆Senhor, xee ma nerembiguai ete aiko,

nerembiguai pi'a guive aiko.

Remondopa ma xejokuaague.

₁₇Ha'e ramo ndevy ame'ẽ 'rã roguerovy'aa,

ha'e Senhor rery rupi aroporai 'rã.

₁₈Senhor pe ajapopa 'rã anhemboayvuague,

ixupegua kuery ha'e javi ikuaia py,

₁₉Senhor pegua roka

Jerusalém mbyte py ae.

Aleluia!