Salmo 112

₁Aleluia!

Ovy'a ete 'rã avakue Senhor renonde ojererokyjea rupi ikuai va'e,

ha'e ojapo uka va'ekue oguerovy'a va'e.

₂Ha'e va'e kuery ramymino kuery voi ipo'akapa 'rã yvy re,

heko porã va'e ramymino kuery re ima'endu'a porãa 'rã.

₃Hoo py ma opa mba'e 'rã oguereko,

heko porãa oĩ 'rã raka'e rã peve.

₄Heko porã va'e pe ma pytũ 'rãgue py ojekuaa 'rã imoexakãarã.

Porayvu, nhomboaxya ha'e teko porã rupi ikuai.

₅Nhomboaxy vy mba'emo oiporuka va'e ma ovy'a 'rã,

ha'e imboayvua py teĩ oikuaa uka 'rã heko porã va'e oikoa.

₆Ha'e kuery ndoityai 'rãe.

Ha'e kuery re raka'e rã peve 'rã ima'endu'aa.

₇Nhomondyiarã oendu teĩ nonhemondyi 'rã.

Ipy'a guaxu 'rã, Senhor re ojerovia vy.

₈Ipy'aa oĩ atã vy ndokyjei 'rã,

oexa 'rã oipotaague hovaigua kuery re ojeupity ramo.

₉Mba'emo oguereko va'e omboja'o vy ome'ẽ 'rã iporiaukue'i pe.

Heko porãa oĩ 'rã raka'e rã peve.

Ipo'aka ramo omboetea ha'e ima'endu'aa porã 'rã.

₁₀Ha'e nunga heko vai va'e oexa vy ivai 'rã teĩ,

haĩ jekyty rei 'rã okanhy peve.

Mba'eta heko vai va'e oipotaa ma opa 'rã.