Salmo 109

₁Xeruete rogueroporaei va'e, ekyrirĩ eme ke!

₂Mba'eta xerovai ijapu va'e kuery ma nhombotavya rupi ijayvu,

oapekũ ijapu va'e py ijayvu okuapy xere.

₃Ha'e kuery xembojere rei vy xerayvu e'ỹa rupi ijayvu,

mba'e re'ỹ opu'ã okuapy xere.

₄Xee ayvuague repy ma xevy ivai okuapya oĩ.

Ha'e rã xee ma ajerure ainy.

₅Ajapo porãague repy ome'ẽ mba'emo vai,

ayvuague repy ma xere ija'e e'ỹa oĩ.

₆Hovai guarã emoĩ peteĩ heko vai va'e.

Oiporu kuaa regua re topu'ã hekokue mombe'uarã.

₇Ha'e gui ma omboayvua py tombopagaa.

Ojerureague tojekuaa teko vai rami.

₈Hekove topa voi,

ha'e gui ojapo aguã va'ekue amboae ju tojapo.

₉Ta'y kuery ma tyre'ỹ meme ta'ikuai,

ha'e rã ta'yxy ma imeve'ỹ va'e toiko.

₁₀Ta'y kuery ma hoo e'ỹ va'e ta'ikuai

mba'emo re ojerurea rupi.

Tomoẽmbaa hoo ombovaipaa va'ekue gui.

₁₁Mba'emo oguereko va'ekue toipe'apaa oreveague re,

amboae yvy guigua tojopy omba'eapoague repy.

₁₂Avave rei tomboaxy eme,

neĩ ta'ykue re voi avave rei topena eme.

₁₃Ta'ikuai eme hamymino kuery,

ha'e kuery ikuai aguã 'rãgue ta'ima'endu'aa eme hery re.

₁₄Senhor ta'ima'endu'a riae tuu kuery ojejavyague re,

tombogue eme ixy ojejavyague.

₁₅Ha'e nunga tojekuaa riae Senhor renonde,

ha'e kuery re ta'ima'endu'aave eme yvy re.

₁₆Mba'eta ojee nomoĩ rire nhomboaxya.

Ha'e rami 'rãgue py oakykue monha ojexavai va'e ha'e iporiaukue'i,

ipy'a vaia rupi ikuai va'e guive,

manoa pe omboaxa aguã.

₁₇Joe ijayvu vaia rupi anho oiko rire hexe ae ju ha'e nungakue tojeapa.

Ndajogueroayvu porãxei rire togueroayvu porãa eme.

₁₈Ojee ayvu vai ao puku rami omoĩ rire

toike ipy'apy katy yy rami,

ikãgue peve too azeite rami.

₁₉Hexe toĩ oao onheovãa rami,

ha'e ku'akuaa omoĩ va'ety rami.

₂₀Ha'e rami ae Senhor tombopaga xerovaigua kuery,

xerekove re ijayvu vai va'e.

₂₁Ha'e rã ndee Senhor Xeruete, enhemoĩ xerepyarã nderery remboete ukaa rupi vy.

Xereraa jepe ke, ndeporayvua tuvixa ramo.

₂₂Mba'eta xee ma ajexavai, iporiaukue'i aiko.

Xepy'apy rupi ma xeaia anho aendu.

₂₃Xerekove opa ovy kuaray ojero'a ovya rami.

Mombyry omombo pyre aiko tuku karu rami.

₂₄Akaru e'ỹ re riae aiko ramo

xerenapy'ã ikangypa ma,

xeangai gui xero'o voi ipiru ma ovy.

₂₅Ha'e kuery pe rã ojou vaipy aiko.

Xerexa vy oakã ombovava-vava 'rã.

₂₆Senhor Xeruete, xepytyvõ ke!

Xereraa jepe ke xemboaxya rupi,

₂₇ha'e kuery oikuaa aguã ndepo gui ae xereraa jepearã oua,

ndee Senhor rejapo rire.

₂₈Ha'e kuery joe ijayvu vai va'e.

Ha'e rã ndee ma rejogueroayvu porã va'e.

Tove xere opu'ã va'e kuery nda'evei nho ta'ikuai.

Ha'e rã nerembiguai ma tovy'a.

₂₉Xerovaigua kuery re toĩ oxĩmbaa.

Oxĩmbaa tojao'ipa ao puku py rami.

₃₀Xejuru py arovy'a ete 'rã Senhor.

Rogueroporaei 'rã heta va'e kuery mbyte,

₃₁mba'eta iporiaukue'i ikuaia katy onhemoĩ ramo,

ojukaxe va'e kuery gui ogueraa jepe aguã.