Salmo 108

₁Xeruete, xekuraxõ oĩ atã ma.

Aporaei vy roguerovy'a 'rã xenhe'ẽ ha'e javi py.

₂Mbaraka ha'e mba'epu ixã reta va'e, pevy ke.

Xee ambovy 'rã ko'ẽ ju.

₃Senhor, roguerovy'a 'rã yvy regua kuery mbyte,

ndevy aporaei 'rã ha'e javi regua mbyte.

₄Mba'eta renhomboaxya oo 'rã yva peve,

ha'e ndereko porãa ma arai rovai peve 'rã oo.

₅Xeruete, enhemboyvate yva áry rupi,

ha'e yvy jave re tojekuaa nerexakãa,

₆ore nerembiayvu kuery roo jepe aguã.

Orereraa jepe ke reiporu kuaa regua py, ha'e orembovai.

₇Nhanderuete ijayvu oky'a e'ỹa rupi:

“Xepo'akaa rupi vy amboja'o 'rã Siquém yvy,

aa'ã 'rã Sucote regua yvyugua guive.

₈Gileade ha'e Manassés yvy ma xemba'e meme itui.

Efraim yvy ma xengora ratã.

Judá ma xepo pygua.

₉Ha'e rã Moabe yvy ma hy'a ajejoiaty itui,

Edom yvy áry ma amombo 'rã xepy regua,

ha'e Filístia pygua kuery re xepo'aka vy avy'a nhendu 'rã.”

₁₀Mava'e nda'u xereraa 'rã tetã ikorapa va'ea py?

Mava'e nda'u xereraa 'rã Edom yvy re?

₁₁Mba'eta Oreruete, ndee orereja rive va'ekue.

Oreruete, ndereovei ma orexondaro kuery reve!

₁₂Orereraa jepe nho ke rojexavaia gui,

mba'eta avakue orereraa jepea ma mba'everã ndovarei.

₁₃Nhanderuete re vy ae 'rã nhandepo'aka,

mba'eta ha'e opyrõ 'rã nhanderovaigua kuery re.