Jajexavaia gui Nhanderuete nhandereraa jepea re ijayvua
1“Perovy'a ke Senhor porayvu va'e ramo,
ha'e nhomboaxya opa va'erã e'ỹ”,
2te'i Senhor oepy va'ekue,
hovaigua kuery po gui ogueraa jepe va'ekue.
3Mba'eta ono'õmba ju amboae yvy re ikuaiague gui,
kuaray oua katy gui, oikea katy gui,
ipuku-a katy gui, ha'e ye'ẽ katy gui ma voi.
4Tekoa e'ỹa rupi ha'e kuery oguata rei raka'e,
tape oikuaa e'ỹa rupi,
tetã ikuai aguã ndojoui guive.
5Karuai ha'e yuvei
omokanhy ma heravy ha'e kuery nhe'ẽ.
6Ha'e gui ojexavaia py ojapukai Senhor pe.
Ha'e ramo ogueraa jepe ojexavaia gui.
7Tape hi'yvi va'e rupi ogueraa
tetã ikuai aguã peve.
8Ha'e kuery toguerovy'a Senhor porayvua re,
avakue ra'y kuery pe mba'emo porã ojapo rire.
9Mba'eta ijy'uvei va'e pe ome'ẽ oy'u aguã,
ha'e okaruxe va'e pe heta ojou uka mba'emo porã.
10Amongue ma pytũ reia rupi oiko, manoa guy py ae,
ojexavai oiny nhuã py ferro guigua py ojokua pyre reve.
11Nhanderuete nonhe'ẽ renduiague re ojexavai,
Yvate ete va'e ombo'ea re ndojapyxakai rire.
12Ha'e ramo ha'e kuery ikane'õmba omomba'eapoa vaipa ramo.
Ho'a teĩ avave rei ndoikoi ipytyvõarã.
13Ha'e gui ojexavaia py ojapukai Senhor pe.
Ha'e ramo ogueraa jepe ojexavaia gui.
14Oguenoẽ pytũ vaikue ha'e manoa guy gui,
ha'e kuery gui omondopa corrente ferro guigua.
15Ha'e kuery toguerovy'a avi Senhor porayvua re,
avakue ra'y kuery pe mba'emo porã ojapo rire.
16Mba'eta oitypa okẽ overa va'e guigua,
ijokoa ferro guigua guive omopẽmba.
17Ha'e gui hi'arandu e'ỹ va'e ojejavypaa rupi anho ikuaia re
ojexavai okuapy gueko vaia py.
18Ojeguaru opa marãgua tembi'u gui.
Ha'e rami vy ovaẽ manoa rokẽ peve.
19Ha'e gui ojexavaia py ojapukai Senhor pe.
Ha'e ramo ogueraa jepe ojexavaia gui.
20Oayvu ombou vy omonguerapa,
ogueraa jepe omanomba 'rãgue gui.
21Ha'e kuery toguerovy'a avi Senhor porayvua re,
avakue ra'y kuery pe mba'emo porã ojapo rire.
22Ixupe tome'ẽ mba'emo oguerovy'a vy.
Ovy'aa rupi toikuaa ukapa ojapo va'ekue.
23Ha'e gui amongue ma kanoã guaxu ojou vy ye'ẽ rupi oguata 'rã,
mba'emo vendea kuery yy tuvixa va'e rupi oo va'e.
24Ha'e va'e kuery oguataa rupi oexa Senhor rembiapo,
mba'emo porã ete yy typyvea rupi ojapo ramo.
25Mba'eta ha'e ijayvu vy ojapo yvytu vaikue oipeju,
ha'e yai opu'ã-pu'ã aguã rami.
26Ha'e ramo yvate peve oje'oi,
ha'e gui yai oguejy ju iguy katy peve.
Ha'e rami ete ojexavai ramo inhe'ẽ ikangy ma ovy.
27Oguataa rupi ho'a rai-rai'i okuapy oka'u va'e rami.
Ha'e rami vy ndoikuaavei rei ma.
28Ha'e gui ojexavaia py ojapukai Senhor pe.
Ha'e ramo ogueraa jepe ojexavaia gui.
29Omombytu'u yvytu vaikue,
yai guive omombytu'upa.
30Ha'e ramo ovy'apa ju opytu'upa ramo.
Ha'e rami ogueraa ojaaty py ovaẽxeague peve.
31Toguerovy'a Senhor porayvua re,
avakue ra'y kuery pe mba'emo porã ojapo rire.
32Tomboete avi heta va'e kuery onhemboatya py,
toguerovy'a yvatekueve nhomongetaa py.
33Ha'e ojapo yakã ikuai va'e typa aguã rami,
ha'e rã yvu ma ipiru reia meme opyta aguã rami.
34Yvy porã va'ekue ma ojapo juky re'ẽ rive opyta aguã rami,
ha'e pygua kuery heko vai rei ramo.
35Ojapo tekoa e'ỹa va'ekue yupa ju opyta aguã rami,
ha'e yvy piru rei va'ekue ma yvu oĩ aguã rami.
36Ha'e py omboekoa okaruxe rei va'ekue.
Ha'e ramo ojapo okuapy peteĩ tetã ikuai aguã.
37Mba'etyrã mba'emo omoaĩ, uva guive onhotỹ.
Ha'e vy heta ojou omono'õ va'erã.
38Senhor omoingo porã heta ete oje'oivy aguã rami,
hymba kuery vaka ndoatai guive.
39Ha'e rami teĩ ha'e kuery ojavyky reia ramo iporiaupa ha'e ndaetavei,
ojexavai ha'e ikuai axy vy.
40Senhor ojapo huvixa kuery nomboeteavei aguã rami,
ojapo avi oguata rei aguã rami tape oĩa rupi e'ỹ.
41Ha'e rã iporiaukue'i ma ogueraa jepe 'rã
ojexavai reia gui yvatea py oĩ porã aguã,
hoo pygua kuery voi omboetave vexa'i rami.
42Ha'e nunga heko porã va'e oexa vy ovy'a 'rã.
Ha'e rã heko vai va'e ha'e javi ma omboty 'rã ojuru.
43Hi'arandu va'e ma toikuaa pota ha'e nunga re,
toikuaa pota Senhor nhomboaxya re.
