1Aleluia!
Perovy'a ke Senhor, porayvu va'e ramo,
mba'eta nhomboaxya opa va'erã e'ỹ.
2Mava'e nda'u omombe'u kuaa 'rã Senhor opo'akaa rupi ojapo va'ekue,
tyrã pa ogueroporaei kuaa 'rã?
3Ovy'a ete 'rã anhetẽ rupi ikuai va'e,
ára nhavõ teko porã rupi ikuai va'e.
4Senhor, nema'endu'a ke xere,
ndevygua kuery reayvua rexa uka vy.
Eikuaa pota xere xereraa jepe aguã,
5nerembiporavo kuery ovy'a rã xee aexa aguã,
ha'e avy'a avi aguã ndevygua kuery ovy'aa py,
ndevygua kuery reve xee roguerovy'a aguã.
6Ore kuery ma oreramoĩ kuery rami avi rojejavy rokuapy.
Opa marã orekuai, orereko vai guive rokuapy.
7Egito yvy re oreramoĩ kuery ikuai jave
ndoikuaa potai raka'e iporã ete va'e rejapoa re.
Na'ima'endu'ai okuapy mbovykue rei e'ỹ omboaxyague re.
Ha'e rami vy ye'ẽ yvýry nonhe'ẽ rendui okuapy, Ye'ẽ Pytã va'e py.
8Ha'e rami teĩ Senhor ogueraa jepe raka'e guery omboete ukaa rupi vy,
ha'e kuery pe opo'akaa oexa uka vy.
9Ye'ẽ Pytã pe ijayvu ramo ipiru.
Ha'e vy ojapo yy rupakue rupi oaxapa aguã rami,
yvy piru reia rupi.
10Ogueraa jepe ija'e e'ỹ va'e kuery po gui,
oepy hovaigua kuery po'akaa gui.
11Imoingo axyare kuery áry rupi yy ojao'ipa,
ha'e kuery regua neĩ peteĩve ndoo jepei.
12Ha'e ramo mae oguerovia okuapy ijayvuague,
ha'e vy oporaei ixupe oguerovy'aa rupi.
13Ha'e gui are e'ỹ re hexaraipa ju ojapo va'ekue re,
ha'e oipotaa rupi ve'ỹ ju ikuai.
14Tekoa e'ỹa py ha'e kuery ae oipotapa reia rupi rive ikuai vy
Nhanderuete pe “Taexa” he'i okuapy.
15Ha'e rã ha'e ome'ẽmba ha'e kuery ojerurea,
va'eri ojapo avi ha'e kuery nhe'ẽ ikangy ovy aguã rami.
16Ha'e kuery rekoa py ijayvu rei okuapy
Moisés ha'e Arão Senhor pegua iky'a e'ỹ va'e re.
17Ha'e ramo yvy ojepe'a vy omokõ Datã,
Abirão kuery regua guive ojao'ipa.
18Ha'e va'e kuery re tata omoendy vy
oapypa raka'e heko vai va'e kuery.
19Horebe yvyty py ojapo okuapy peteĩ vaka ra'y ra'angaa,
ha'angaa ouro ryku gui ojapo pyre ombojerovia okuapy.
20Ha'e rami Nhanderuete rexakãa omboekovia
mymba nhuũ ho'u va'e ra'angaa re rive.
21Hexaraipa Nhanderuete heraa jepeare gui,
Egito yvy re mba'emo porã ojapo rire teĩ.
22Nhomondyipaarã ojapo Cam yvy re,
ha'e Ye'ẽ Pytã py mba'emo porã ete ojapo rire teĩ.
23Hembiporavo Moisés henonde nonhemoĩ va'e rire
ijayvuague rami vy omomba ete 'rãgue.
Ha'e rami py Moisés ojapo raka'e opoxya rupi omomba e'ỹ aguã rami.
24Ha'e rami avi ha'e kuery ndooxei yvy iporã va'e py,
ijayvua ndogueroviai vy.
25Ha'e rami 'rãgue py peteĩ-teĩ ropy rupi ijayvu rei okuapy,
Senhor ijayvua re noendu potai vy.
26Ha'e ramo opo oupi reve oura ha'e kuery pe,
tekoa e'ỹa rupi ae omokanhymba aguã re,
27ha'e gui hamymino kuery ju yvy regua kuery ikuaia rupi oitypa vy
yvy mboae rupi omoaĩmba aguã re.
28Ha'e gui ovapa oje'oivy Peor pygua kuery ruete ramigua Baal re.
Ha'e vy ho'u okuapy ta'angaa hekove e'ỹ va'e pe ome'ẽ mbyre.
29Ha'e rami ete ikuai vy ombopoxy rive Nhanderuete.
Ha'e rami vy oendu okuapy mba'eaxy vaikue.
30Ha'e ramo Finéias opu'ã vy otekoavy va'ekue ombopaga rire
mba'eaxy opytu'upa.
31Ha'e nunga py oexa uka heko porãa,
raka'e rã peve guarã.
32Ha'e gui ma Meribá py yy oĩa py ju ombopoxy.
Ha'e va'e kuery káuxa mba'emo vai oiko raka'e Moisés pe.
33Mba'eta Nhanderuete Nhe'ẽ rovai opu'ã rei okuapy ramo
Moisés ijayvu 'rãgue'ỹ rupi ijayvu.
34Ha'e kuery ndojukapa etei amboae regua kuery
Senhor ojapo ukaague rami e'ỹ.
35Ha'e rami 'rãgue py yvy regua kuery reve nhomomendapa vy
ha'e pygua reko rami ikuai.
36Ha'e vy ombojerovia okuapy ha'e pygua kuery ta'angaa.
Ha'e nunga opyta imbo'aarã.
37Gua'y ha'e guajy kuery oapy ukapa
anha kuery pe.
38Ha'e vy omoẽ mba'eve py ojejavy e'ỹ va'e ruguy teĩ,
gua'y, guajy kuery ruguy ae,
mba'emo ra'angaa Canaã pygua pe ojuka uka vy.
Ha'e vy ijyvy iky'apa va'e opyta huguykue py.
39Ha'e rami ikuai vy onhemongy'apa ha'e kuery ae ojapoa py,
itavy rei okuapy guembiapokue py.
40Ha'e nunga rupi Senhor poxya hendy ixupegua kuery rovai,
ha'e ojeguaru ojeupe guarã va'ekue gui ae.
41Ha'e vy omboaxapa amboae regua po py.
Ha'e kuery re ija'e e'ỹ va'e kuery ipo'aka okuapy,
42hovaigua kuery oguereko axy,
ha'e kuery po'akaa guy py omoingo.
43Mbovykue rei e'ỹ ogueraa jepe,
ha'e rami teĩ ha'e kuery nhomongetaa rupi ikuai vy ombopoxy reive tema.
Gueko vaia py ojexavaive oje'oivy.
44Ha'e rami rire teĩ ha'e oikuaa pota ju ojexavaia re,
ha'e oendu nho ha'e kuery ojapukaia.
45Ha'e kuery re vy ima'endu'a guexeve guarã ojapo va'ekue re.
Ha'e vy porayvu ete va'e vy omboaxy ju.
46Ojapo escravo-rã heraa are kuery ha'e javi
omboaxy nho aguã rami.
47Senhor Oreruete, orereraa jepe ke!
Oreno'õmba ju yvy regua kuery mbyte gui,
nderery iky'a e'ỹ va'e rupi roguerovy'a aguã,
ha'e rovy'aa rupi rogueroporaei aguã.
48Ima'endu'a porãmby toiko Senhor Israel kuery Ruete
aỹ, ha'e raka'e rã peve!
Heta va'e kuery ha'e javive aipo te'i: “Amém!”
Aleluia!
