Provérbios 23

₁Huvixa reve rekaru aguã nemboguapy ri ramo

eikuaa pota porã nerenonde py marã ramigua pa oĩ va'e re.

₂Emboaxa peteĩ kyxe ndejyryvi re,

okaru guaxu va'e ri reiko vy.

₃He'uxepa rei eme tembi'u porã omoĩmba teĩ,

mba'eta tembi'u ma nembotavyarã oĩ.

₄Enhea'ã rei eme rerekopaxea rupi rive,

emoĩ eme ha'e nunga ne'arandua py.

₅Mba'emo rei re rive teve rema'ẽ riae ta?

Mba'eta anhetẽ ete nemba'e rei-rei okanhymba vyvoi 'rã ipepo va'e rami,

taguato yvate rupi oveve ovya rami.

₆Nda'evei hakate'ỹ va'e rembi'u re rekaru aguã,

neĩ he'upaxe rei eme tembi'u porã omoĩ teĩ.

₇Mba'eta ha'e va'e oikuaa pota rei 'rã ndere, ha'e ramigua ae vy.

Ndevy pe “He'uve ha'e ey'uve tema” he'i 'rã

teĩ opy'a py anhetẽ rupi e'ỹ oĩ ndereve.

₈Ha'e gui rembojevypa ju 'rã re'u vaipa vyvoi va'ekue,

ha'e ijayvu porãa rerovy'aague oaxapa rive 'rã.

₉Ndeayvu eme hi'arandu e'ỹ va'e kuery oendu aguã,

mba'eta oendu rivepa 'rã 'arandu rupi ndeayvua.

₁₀Perova eme yvy markaarã yma omo'ã mbyre,

neĩ peike eme ta'vy tyre'ỹ kuery yvy re,

₁₁mba'eta ha'e kuery Repyarã ma imbaraete,

ha'e penderovai onhemoĩ 'rã ha'e kuery repyarã.

₁₂Emoĩ ndepy'a re nembo'eague,

ha'e ejapyxaka ayvu mba'emo kuaa ukaa re.

₁₃Emo'arandu e'ỹ eme kyrĩgue.

Mba'eta yvyra rovi py reinupãa gui rive nomanoi 'rã.

₁₄Yvyra rovi'i py reinupã vy

inhe'ẽ reraa jepe 'rã omano aguã gui.

₁₅Xera'y, ndepy'a py ne'arandu ramo

xee voi xepy'a py roguerovy'a 'rã.

₁₆Ha'evea rupi ndeayvu ramo

xepy'apy re avy'a riae.

₁₇Ndepy'a py eroangeko rei eme ojejavypa rei va'e ikuaia.

Ha'e rami 'rãgue py Senhor renonde rejererokyjea rupi eiko ára nhavõ.

₁₈Mba'eta ha'e rami vy 'rãe nerenonde oĩ porã,

ha'e rearõ reikovya ndoaxa rivei 'rã.

₁₉Xera'y, endu ke ne'arandu aguã,

ha'e ereko nekuraxõ tape hi'yvi va'e rupi.

₂₀Enhemoirũ eme vinho gui oka'u rei va'e kuery reve,

neĩ xo'o ho'u raxa rei va'e kuery reve.

₂₁Mba'eta oy'u raxa ha'e okaru guaxu va'e ma iporiaupa 'rã,

avakue hopeyi rei va'e ijao vaikue rei 'rã okuapy.

₂₂Endu ke nderu ndere ta'y va'ekue ayvu.

Ndexy gui nderexarai rei eme guive, guaimi'ive'i ma ovy ramo voi.

₂₃Ejogua ke anhetẽ va'e, ha'e gui emboekovia ju eme.

Ejogua avi 'arandu ha'e nembo'earã, reiko kuaa aguã.

₂₄Heko porã va'e ru ma ovy'a vaipa 'rã,

hi'arandu va'e re ta'y va'e ma oguerovy'a 'rã.

₂₅Tandererovy'a nderu ha'e ndexy,

ejapo nderereko'iare ndererovy'a aguã rami.

₂₆Xera'y, eme'ẽ xevy nekuraxõ,

ha'e nderexa toguerovy'a xee aikoa.

₂₇Mba'eta kunha itavy rei va'e ma yvykua puku va'e rami,

ha'e amboae ava ra'yxy ma yguarã ojo'o po'i'i pyre rami.

₂₈Ha'e nunga kunha ma jojuka va'ety rami oma'ẽ mbegue 'rã oiny joe,

heta avakue ma ojapo heko vai aguã rami.

₂₉Mava'e pe 'rã tu haxypa rei?

Mava'e pe 'rã tu ipoyi ete?

Mava'e re 'rã tu joguero'aa rei?

Mava'e pe 'rã tu onhemombe'u?

Mava'e 'rã tu mba'e py e'ỹ ojejukapa rei?

Mava'e 'rã tu hexa pytã rei va'e?

₃₀Vinho oy'ua rupi tema ikuai va'e pegua ae,

oy'u va'erã omoirũ mbyre re onhea'ã va'e.

₃₁Ema'ẽ rive ke vinho pytã porã rei va'e re,

karo py oĩ va'e jaexa rã hexakã rei'i ha'e onheẽ porã rei'i oiny teĩ,

₃₂va'eri opaa py ma ndexu'u 'rã mboi rami,

nekaraĩ 'rã jai ra'y rami.

₃₃Rexa 'rã mba'emo vaikue,

ha'e opa marã 'rã ndeayvu ndepy'a py.

₃₄Renhenhandu 'rã ye'ẽ mbyte oguataa rupi onheno oupy va'e rami,

ajukue 'y áry itui va'e rami.

₃₅Ha'e vy aipo're 'rã: “Xepetea ra'e va'eri ndaxyi!

Xenupãa ra'e teĩ naendui!

Raka'e 'rã tu akuera ju?

Ay'uve ju ramo 'rãe ma ha'eve”, 're 'rã.