1Nhanemba'e rei-rei retaa gui ovareve va'e ma nhanderery re ima'endu'a porãa.
Prata ha'e ouro gui ha'eveve va'e ma nhanemboetea.
2Oguerekopa rei va'e ha'e iporiaukue'i ma peteĩ'i guigua meme,
mokoĩve moingoare Senhor ae oiko.
3Hi'arandu va'e mba'emo vai oexa vy onhemi 'rã,
ha'e rã hi'arandu e'ỹ va'e ma oo tema 'rã ojexavai aguã katy rive.
4Senhor renonde jajererokyjea rupi vy nhanhemo'yvyĩ'i vy
jaupity 'rã mba'emo porã, nhanemboetea aguã ha'e tekove.
5Heko vai va'e oikoa rupi oĩ nhuã ha'e juu vaikue,
ha'e rã guekovea ombovare va'e ma ha'e va'e gui mombyrya rupi 'rã oo.
6Pembo'e ke kyrĩgue oiko aguã re.
Ha'e rami rire tuja ma teĩ ndojepe'ai 'rã pembo'eague gui.
7Oguerekopa va'e oguereko axy 'rã iporiaukue'i,
ha'e nhomba'e oiporu va'ekue ma oiko 'rã iporukaare rembiguai rami.
8Teko vai rive omoaĩ va'ekue omono'õ 'rã mba'emo vai ae,
ha'e yvyra py nhombojexavaiague opa 'rã.
9Akate'ỹa rupi e'ỹ ome'ẽ va'ekue omoingo porãa 'rã,
iporiaukue'i pe ho'u va'e regua ome'ẽ rire.
10Pemoxẽ ke jojojai reiaty, ha'e ramo opa avi 'rã joguero'a reiaty,
opytu'upaa 'rã nda'evei rei ha'e nanhomboetei reiague gui.
11Opy'a re teko porã anho omoĩ reve ijayvu porã kuaa va'e ma
oiko 'rã huvixave irũ.
12Hi'arandu va'e re Senhor oma'ẽ vy omoĩ atã 'rã,
ha'e rã heko vai va'e ijayvua ma omboaxapa rive 'rã.
13Inhate'ỹ va'e aipoe'i 'rã: “Guary oka py hiny,
tape rupi aa ramo xejuka 'rã”, he'i rive 'rã.
14Kunha reko rei ijayvua ma yvykua puku rami,
ha'e py ho'a 'rã Senhor ombopaga aguã rami ikuai va'e.
15Kyrĩgue py'a re oĩ 'rã 'arandu e'ỹa,
teĩ yvyra rovi py nhamo'arandu vy jaipe'a 'rã.
16Iporiaukue'i gui omba'e rei-reirã oipe'a va'e,
ha'e oguerekopa va'e pe mba'emo me'ẽa kuery ma iporiau va'erã meme.
Nhanembo'ea ha'e nhanemongetaa oĩa
17Ejapyxaka porã ke rendu aguã hi'arandu va'e kuery ijayvua.
Emoĩ ndepy'a re mba'emo aikuaa uka va'e.
18Mba'eta ndepy'a re remoĩ ramo nembovy'a 'rã,
ha'e nunga ha'e javi re ndeayvu kuaa aguã.
19Senhor re rejerovia riae aguã rami
aỹ ame'ẽ ne'arandurã, ndevy ae.
20Xapy'a rei nda'u ndevy namboparai ri ty'y mba'emo iporã ete va'e re,
nhomongetaa ha'e mba'emo kuaa ukaa regua,
21ndevy aikuaa uka aguã ayvu anhetẽ ete va'e,
nemondoukaare kuery rembovai porã aguã?
22Nemonda eme iporiaukue'i gui, mba'eta iporiaukue'i ae ma,
ojexavai'i va'e ekorepa rei eme guive omboayvua py.
23Mba'eta ha'e va'e regua ma Senhor ae oepy 'rã,
ha'e vy oipe'a 'rã imbojexavaiare rekove.
24Neirũ eme ivai ja rei va'e re,
neĩ eiko eme avakue ojerovia rei va'e reve,
25ndee avi reiko e'ỹ aguã ha'e kuery reko vaia rupi,
mba'eta ha'e ramia py rembo'a uka 'rã nderekovea.
26Nda'evei ndee voi reiko aguã ha'e ae oĩ vai aguã rami ijayvu va'e regua,
oreve va'e rekovia opaga aguã rami opyta va'e kuery rami,
27mba'eta xapy'a rei nderejoui 'rã repaga aguã.
Mba'e re 'rã tu nderupa reipe'a uka ndeguy gui?
28Erova eme yvy markaarã
neramoĩ kuery yma omo'ã va'ekue.
29Rexa pa avakue omba'eapo porã kuaa va'e?
Ha'e kuery ma huvixa kuery renonde 'rã omoĩa, yvyĩgueve mbyte py e'ỹ.
