1Eroangeko rei eme avakue heko vai va'e ikuaia,
neirũ eme guive ha'e kuery re.
2Mba'eta ha'e kuery ma opy'a re omoĩ 'rã jojukaxe aguã,
ha'e ojuru py ijayvu 'rã teko vairã re rive.
3'Arandu rupi vy jajapo 'rã nhanderorã,
mba'emo jaikuaa rupi nhamo'ã atã 'rã.
4Jaiko kuaa vy 'rãe opy ja'o'i ha'e javi rupi nhamonyẽ
opa mba'e porã nhanembovy'aarã.
5Imbaraete va'e gui hi'arandu va'e ipo'akave,
hexaĩ rei va'e gui oiko kuaa va'e mba'emo ojapo kuaave 'rã.
6Mba'eta jaikuaa pota vy 'rãe joe nhapu'ã kuaa,
nhanemongetaarã heta ikuai ramo nhandepo'aka 'rã.
7Hi'arandu e'ỹ va'e pe haxy ete 'rã 'arandu oikuaa aguã,
omboayvua py nombovai kuaai 'rã guive.
8Teko vairã re rive onhembopy'a va'e pe ma
“Nhombo'e vaikue va'e” 'ea 'rã.
9Hi'arandu e'ỹa rupi onhembopy'aa ma jejavya meme,
jojojai rei va'e re avakue nda'ija'ei 'rã.
10Rejexavaia ára py nekangy ri vy ma
nembaraetea ruxã'i ae.
11Peepy pota ke omano aguã katy heraa va'e kuery,
peraa jepe ojukaa aguã katy ho'a-o'a jogueravy va'e.
12Xapy'a rei aipopeje 'rã: “Ndoroikuaai va'ekue rima”,
teĩ nhandepy'a ha'e javi Rexaa ndoexai 'rã ri ty'y?
Nhandereko Kuaa potaa ndoikuaai 'rã ri ty'y?
Ha'e nombopagai 'rã ty'y peteĩ-teĩ oikoague re?
13Xera'y, he'u ke ei, mba'eta nemoexaĩ 'rã,
hetãgue guive, mba'eta ndejurupy rupi voi he'ẽmba 'rã.
14Ha'e rami ae avi 'arandu voi nemoingo porã 'rã nenhe'ẽ py.
Ha'e va'e rejou ramo ojapo 'rã nerenonderã oĩ porã aguã rami,
rearõ reikovya voi ndoaxa rivei 'rã.
15Ndee heko vai va'e, nda'evei rema'ẽ mbegue aguã
heko porã va'e ro gui nemondaxe vy.
Embovaipa eme ha'e kuery opytu'uaty,
16mba'eta heko porã va'e ma sete-kue ho'a rire teĩ opu'ã ju 'rã.
Ha'e rã heko vai va'e ma jexavaia py 'rãe ho'a.
17Nderovaigua ho'a ramo nda'evei revy'a rei aguã,
onhepyxanga rã nda'evei ndepy'a py rerovy'a rei aguã,
18ndereko Senhor oexa vy ndojou porãi vy
nderovaigua gui oipe'a e'ỹ aguã opoxya.
19Mba'emo vai apoa kuery káuxa eiko eme nda'evei reia rupi,
neĩ eroangeko rei eme heko vai va'e ikuaia,
20mba'eta heko vai va'e renonderã ma iporã va'e'ỹ,
ha'e kuery rataendy oguepa rive 'rã.
21Xera'y, eiko Senhor ha'e huvixa kuery renonde rejererokyjea rupi.
Enhemoirũ eme opu'ã rei va'e kuery reve,
22mba'eta ha'e kuery mombaarã ou xapy'a 'rã.
Senhor ha'e huvixa gui imoingo axyarã ou va'e tu mava'e 'rã oikuaa?
Hi'arandu va'e kuery 'arandu regua omombe'u va'ekue oĩa
23Pova'e ayvu voi 'arandu regua hi'arandu va'e kuery omombe'u va'ekue.
Renhomboayvua py nda'evei peteĩ reepyvea rupi rejoguereko aguã.
24Heko vai va'e mboeko porãare re
heta va'e kuery voi ijayvu vai 'rã, amboae regua avi nda'ija'ei 'rã okuapy.
25Ha'e rã heko vai va'e mbopagaare re ma ima'endu'a porãa 'rã,
ha'e hexe oĩ reta 'rã imoingo porãarã.
26Jojuru rayvu va'e rami avi
ayvu porã rupi nhombovaia iporã.
27Enhea'ã oka rupi mba'emo rejapo aguã,
ereko katupa nemba'etyrã,
ha'e gui mae ma ejapo nderorã.
28Ndero katy'igua re ndeayvu rive eme mba'e py e'ỹ,
embotavy eme guive ndeayvua py.
29Aipo're eme: “Ha'e va'e xere ojapo vaiague rekovia hexe ju 'rã xee ajapo ha'ekue rami.
Peteĩ-teĩ pe amboekovia 'rã ojapo vaiague re”, 're eme.
30Xee aaxa avy inhate'ỹ va'e mba'ety rupi,
ava hi'arandu e'ỹ va'e uva onhotỹague rupi.
31Ha'e vy aexa rã juuty anho itui,
pyno ojao'ipa ma yvy,
ikora ita guigua voi ivaipa ma.
32Ha'e nunga aexa vy aikuaa porã pota
vy ajopy xe'arandurã:
33Xapy'a'i rekeve jave, xapy'a'i nderopeyi vy
repytu'ua py renhekuavã jave ma
34ou xapy'a 'rã nemomboriauarã imonda va'e rami,
nembojexavaiarã ou 'rã ava guembiporu revegua rami.
