Jó 6

₂— Ai! Xeayvua re anhetẽ oikuaa potaa va'e rire,

ha'e mba'emo opejaa py xeporiaua opejaa va'e rire

₃ha'e va'e ma anhetẽ ita ku'i ye'ẽ rembe rupi ikuai va'e gui ipoyive 'rãgue.

Ha'e nunga rupi ae xevai reve xeayvu va'ekue.

₄Mba'eta Ipo'akapave va'e ma guembiporu hu'y py xenhyvõmba,

ha'e ramo xenhe'ẽ py aendu veneno ramigua.

Xerovai meme Nhanderuete ombou xemongyjearã.

₅Mburika'i yvy'ãa rupigua nda'u nhuũ re okaru reve onhe'ẽ 'rã teve?

Vaka kuery nda'u onhe'ẽ 'rã okaru porãa py?

₆Juky e'ỹ re teve ja'u 'rã he'ẽ e'ỹ va'e?

Tyrã uru rupi'a xiĩa re oĩ 'rã teve heea?

₇Xenhe'ẽ py nda'uxei va'ekue

aỹ ajeguaru reve teĩ ha'u.

₈— Nhanderuete ajerurea ojapo va'e rire,

aipota va'e ha'e omoingo va'e rire!

₉Nhanderuete pe ha'eve va'e rire xemokanhy voi aguã,

opo oupi vy xejuka ete aguã!

₁₀Ha'e nunga oiko ma va'e rire xepy'a guaxu 'rãgue,

haxy aendu temaa py teĩ apo-apo 'rãgue avy.

Mba'eta xee ma Iky'a e'ỹ va'e ayvu rovai xeayvu va'e'ỹ.

₁₁— Mba'e tu arõve ta, xembaraete vy e'ỹ?

Mba'erã tu aikove riae ta, amano aguã rami tema aiko vy?

₁₂Xembaraetea nda'u ita rami hatã va'e?

Xero'o nda'u overa va'e guigua rami hatã va'e?

₁₃Any! Naendui ae xepytyvõarã.

Xegui oipe'apaa ma xembaraeterã va'ekue.

₁₄— Ojexavai va'e pe irũ kuery omboaxya'i oexa uka va'e rire,

Nhanderuete renonde ojererokyjea gui ojepe'a e'ỹ rã.

₁₅Ha'e rã xeryvy kuery ma anhetẽ rupi e'ỹ xerereko.

Ha'e kuery ikuai peteĩ yakã oxyry atã vy hembe rupi oĩa rami

₁₆yro'y ogueroxyry reve,

yro'y apĩ hyku ovy jave,

₁₇ha'e rami teĩ haku jave oxyry atã va'ekue typa rive va'e rami,

ndaevovovei ha'e oxyryague rupi ndoxyryvei va'e rami.

₁₈Ha'e ramo oguata va'e kuery yy rekaa rupi ojepekuavo 'rã jogueravy tape oo aguã va'ekue gui,

ha'e vy tekoa e'ỹa katy oje'oi vy omanomba 'rã ha'e py.

₁₉Temá yvy gui oguata va'e kuery oeka teĩ yy oxyry atã va'e,

Sabá gui oguata va'e kuery voi iporiaupa 'rã yy re.

₂₀Yy oĩ aguã re ojerovia va'ekue oxĩmba 'rã okuapy.

Oxyryague py ovaẽ vy ndoikuaavei rei 'rã okuapy.

₂₁Ha'e rami ae peẽ kuery voi xevy pe mba'everã ovare e'ỹ va'e pendekuai.

Mba'eta ajexavai rã pexa vy penhemondyipa rive.

₂₂Xee nda'u aipoa'e: “Peme'ẽ ke mba'emo xevy”, ha'e teve?

Tyrã pa “Peme'ẽ mba'emo pereko va'e xepytyvõ aguã”, ha'e teve?

₂₃“Xereraa jepe ke xemoingo axya po'akaa gui”,

e'ỹ vy “Xerepy ke porayvu e'ỹ va'e kuery po gui”, ha'e teve pẽvy?

₂₄— Xerekombo'e na, ha'e rã xee akyrirĩ 'rã.

Pemombe'u porãve na mba'e nunga py pa ajejavyague.

₂₅Anhetẽ ayvu ha'evea ramigua ma oenduxe vai pyrã meme!

Ha'e rã peẽ kuery ma mba'erã tu pendeayvu ete xevy?

₂₆Peẽ kuery xemongetaxe ri ty'y xeayvua re,

peteĩ ndaekorãvei va'e yvytu pe rive ijayvu va'e rami xeayvu rire?

₂₇Tyre'ỹ kuery re teve pexa 'rã xortea,

ha'e pejogueroayvu 'rã teve peneirũ repyrã re?

₂₈Ha'e gui aỹ peẽ kuery xemboaxy'i ri vy pema'ẽ porã xere,

ha'e pexa penerenonde ndaxeapuia.

₂₉Peikuaa pota ju ke, ajerure pẽvy, ha'eve'ỹa rami xekuaa e'ỹ aguã.

Peikuaa pota ju, ha'e vy peikuaa 'rã ha'evea rami aikoa.

₃₀Xeayvua py teve ha'eve'ỹa ramigua pendu?

Xejuru py ha'eve'ỹ va'e re xeayvu va'e rire nda'u xee voi ndaikuaai 'rãgue teve?