Jó 7

₁— Yvy re avakue ojexavai aguã rami e'ỹ teve ikuai?

Oikovea ára omba'eapo va'e rami e'ỹ teve ojexavai?

₂Escravo kuaray'ã oeka teĩ va'e rami,

ha'e omba'eapo va'e opagaa aguã oarõ va'e rami,

₃xevy pe ha'e rami ae avi ome'ẽa mba'erã e'ỹ aiko aguã jaxy nhavõ re,

ha'e pytũ aiko axy aguã ome'ẽa avi.

₄Anheno vy aipoa'e: “Mbovy hora nda'u ha'eve 'rã avy ju aguã?”

Ha'e rami teĩ pytũ ipuku ramo

xerupa rupi ajere-jere tema ajupy ko'ẽ peve.

₅Xero'o re oĩ taxo ha'e pekue vaikue.

Xepire re ipekue oĩ va'e gui ipeu jepi.

₆Xe'ára ma mba'emo mbovyvya gui ipojavave,

ha'e vy opa 'rã arõ e'ỹkue re.

₇Nema'endu'a ke xerekovea yvytu rami rive oaxapa vyvoia re.

Xerexa ndoexavei ma 'rã iporã va'e.

₈Aỹ xerexa okuapy va'e ma ndaxerexavei ma 'rã.

Ha'e kuery rexa oxareko rei teĩ xee ndajekuaavei ma 'rã.

₉Arai ivaipa reve oaxa va'e rami avi

onhono porã mbyre noẽvei 'rã.

₁₀Ha'e kuery ndojevyvei 'rã ngoo katy,

ikuaiague py ae teĩ ha'e kuery re na'ima'endu'aavei ma 'rã.

₁₁— Ha'e nunga rupi ae xee ndajokoi xejuru.

Ha'e rami vy xeayvu 'rã xenhe'ẽ py ajexavaia aendu va'e re,

anhemombe'u 'rã xerekove re ajexavaia rupi.

₁₂Xee nda'u ye'ẽ, e'ỹ vy vixo ye'ẽ rupigua teve,

ndee xerarõ uka aguã?

₁₃Xee aipoa'e: “Xerupa py aĩa py avy'a 'rã,

xerupa py apytu'u 'rã ajexavaia re xeayvua gui”, ha'e.

₁₄Ha'e rami teĩ ndee xemondyi 'rã mba'emo aexa ra'u va'e gui,

xemongyje aexa merami va'e gui.

₁₅Ha'e nunga rupi xenhe'ẽ pe ha'eveve 'rãgue xejyryvipya va'e rire.

Aiko axy 'rãgue py ha'eveve amano aguã.

₁₆Xevy pe ha'eve ma aikovea.

Raka'e rã peve xee ndaikovexei.

Xereja ha'vy, mba'eta xe'ára ma yvytu rami rive oaxapa vyvoi.

₁₇Mba'e nunga tu avakue ikuai rejou porã aguã,

ha'e kuery re repena aguã?

₁₈Mba'eta ára nhavõ reju reikuaa pota aguã,

ha'e hora nhavõ 'rã rexa pota.

₁₉Raka'e peve tu ndereipe'ai 'rã nderexa xegui?

Raka'e peve 'rã nda'evei xerendyry amokõ aguã?

₂₀Xapy'a rei ajejavy vy mba'e nunga ha'eve'ỹ va'e tu ajapo ndevy,

ndee avakue re reikuaa pota va'e?

Mba'e re tu xeapo hu'y rea'anga aguã,

xejeupe ae ipoyi va'e apyta aguã rami?

₂₁Mba'e re tu neremboguei xereko vaia,

ha'e ndereipe'ai ajejavyague?

Mba'eta aỹ ha'a ta ma yvy rupi.

Ha'e va'e rire ndee xereka vy ndaxejouvei ma 'rã — he'i.