Jó 5

₁— Ejapukai aỹ! Ha'e rami teĩ oiko ri nda'u nerenduarã?

Mava'e anjo iky'a e'ỹ va'e pe tu renhepytyvõ uka ta?

₂Mba'eta hi'arandu e'ỹ va'e ipoxya ae ombovaipa 'rã.

Inhakã porã e'ỹ va'e ivaia rive 'rã ojuka.

₃Xee ma aexa porã hi'arandu e'ỹ va'e onhemoingo porã merami ramo.

Ha'e rami teĩ are'ỹ'i re aikuaa hoo oĩa ayvu vaipy oikoa.

₄Ta'y kuery voi mombyry ikuai ipytyvoarã gui.

Tetã kora rokẽ py ha'e kuery ojexa uka rã ombopagaa,

heraa jepearã ndoikoi ramo.

₅Ha'e kuery onhotỹ va'ekue ma ijajupa rã ikaruai va'e kuery ho'upa rive 'rã,

juu mbyte rupi henhoĩ va'ekue voi oipe'apa 'rã.

Ha'e mba'emo oguereko va'ekue ma oikuaa pota rei va'e kuery omokanhymba 'rã.

₆Mba'eta teko axy ma yvyku'i gui rive ndoikoi,

yvy gui e'ỹ henhoĩ jajexavai aguã.

₇Ha'e rami 'rãgue py avakue ojexavai aguã rami ae 'rã itui'i,

tapyĩ gui tata raviju yvate katy ae 'rã ovevea rami.

₈— Ha'e gui xee va'e rire ma aeka 'rãgue Nhanderuete,

ixupe anho amboaxa 'rãgue xereko.

₉Mba'eta ha'e ma ojapo 'rã mba'emo tuvixa va'e oikuaa pyrã e'ỹ,

ha'e nhomondyipaarã omombe'u kuaa pyrã e'ỹ.

₁₀Ombo'oky 'rã yvy áry rupi,

omoakỹ 'rã mba'ety ikuai va'e.

₁₁Ha'e rami vy ogueraa jepe 'rã yvyĩgue'i peteĩ henda yvatea py,

ojae'o va'ekue oiko porãa rupi ovy'a nho aguã.

₁₂Ha'e rã jokorea kuery onhembopy'aa ma ha'e ombovaipa 'rã,

opo py ojapoxe va'ekue ndojapo kuaai aguã.

₁₃Ombo'a 'rã oikuaapave va'e nhombotavya py ae.

Ha'e ramo oikuaapa va'e onhembopy'aague opa rive 'rã.

₁₄Ha'e kuery ma ara py teĩ ojou 'rã pytũa anho,

kuaray mbyte jave teĩ pytũ rupi merami ikuai, opovyvy 'rã oje'oivy.

₁₅Nhanderuete ma jogueraa jepe 'rã ha'e kuery juru gui kyxe oẽ va'e gui,

ipo'akave va'e po gui ogueraa jepe 'rã ojexavai va'e.

₁₆Ha'e rami rã oĩ 'rã iporiaukue'i oarõ okuapy aguã,

ha'e rã joapo vaia kuery ma okyrirĩmba 'rã.

₁₇— Ovy'a ete 'rã avakue Nhanderuete omo'arandu va'e.

Ha'e nunga rupi endu rive eme Ipo'akapave va'e nemo'arandu rã.

₁₈Mba'eta ha'e ma nhomboai 'rã, ha'e gui ha'e ae ju oipoano 'rã.

Nhomomba'eaxy 'rã, ha'e gui opo py ae ju 'rã omonguera.

₁₉Seis-kue rejexavaia gui ha'e ndereraa jepe 'rã,

ha'e sete-a py voi mba'emo vai nanderupityi 'rã.

₂₀Karuai py teĩ ndereraa jepe 'rã remano aguã gui,

joe opu'ãa py guive ndereraa jepe 'rã kyxe po'akaa gui.

₂₁Nderepy 'rã ayvu vai gui,

ha'e ramo mba'emo mbovaipaarã ovaẽ rã rexa teĩ nderekyjei 'rã.

₂₂Mba'emo mbovaipaa ha'e karuai oiko rã repuka 'rã,

vixo ka'aguy regua gui guive nderekyjei 'rã.

₂₃Mba'eta yvy rupi ita ikuai va'e reve voi rejapo 'rã peteĩ rami ikuai porã aguã,

mymba yvy regua voi ndereve ikuai 'rã peteĩ rami.

₂₄Reikuaa 'rã ndero py mby'a porã oĩa,

ha'e mba'emo rereko va'e ikuaia rupi reikuaa pota reovy rã ndoatai 'rã mba'eve.

₂₅Reikuaa avi 'rã neramymino kuery heta 'rãa,

ndeguigua kuery yvy re jai rogue ikuai va'e rami 'rã heta.

₂₆Ndetuja'i jave teĩ nembaraete reve 'rã reo yvyra rupa py,

trigo ojokua pyre hi'ára py porã omono'õa rami.

₂₇— Ma'ẽ, ha'e nunga re roikuaa pota rã ha'e rami ae.

Ejapyxaka ndee voi, ha'e nunga re eikuaa pota avi reiko porã aguã — he'i.