Jó 35

₂— Ha'evea rami teve aipo're:

“Nhanderuete gui xereko porãve”, 're va'ekue?

₃Mba'eta aipo're: “Mba'e nunga py tu xereko porãa ovare?

Mba'e tu xereko porãa py ajouve 'rã ajejavya py ajou va'e gui?” 're va'ekue.

₄Ha'e ramo xee rombovai 'rã,

ndee ha'e neirũ kuery guive.

₅Ema'ẽ yva re ha'e exa.

Exa pota nde'áry rupi arai yva re ikuai va'e re.

₆Rejejavya py mba'e nunga py tu hexe rejapo vai?

Ndereko vaia hetave ovy rã mba'e tu rejapo hexe?

₇Ha'e rami e'ỹ vy ndereko porãa py mba'e tu reme'ẽ ixupe?

Mba'e tu ojopy 'rã ndepo gui?

₈Ha'e rami 'rãgue py ndereko vaia ma avakue ndee ramigua pe ae 'rã ojapo vai.

Ha'e ndereko porãa ma voi ha'e rami ae avi avakue ra'y kuery pe anho 'rã ojapo porã.

₉— Ha'e gui avakue omoingo axya vaipa rã haxẽ 'rã,

ha'e vy ojapukai 'rã ipo'aka va'e kuery po gui ogueraa jepea aguã.

₁₀Ha'e rami teĩ avave rei aipo nde'i 'rã: “Mamo tu oĩ Nhanderuete xemoingoare,

pyávy avy'a reve aporaei aguã ome'ẽ va'e?

₁₁Ha'e ma yvy rupi vixo ikuai va'e gui nhanderekombo'eve va'e,

ha'e guyra yvate rupi oveve va'e gui nhanemo'aranduve va'e”, nde'i.

₁₂Ha'e kuery ojapukai teĩ ha'e nombovai,

gueko vaia rupi rive onhemboyvate ramo.

₁₃Ojapukai rive ramo Nhanderuete noendui 'rã,

ha'e kuery re Ipo'akapa va'e noma'ẽi 'rã.

₁₄Jó, ndee ma Nhanderuete nderexaia rami ndeayvu,

ha'e rã henonde ma ndereko ojekuaapa.

Ha'e nunga rupi earõ hexe.

₁₅Aỹ peve Nhanderuete opoxya rupi nanhombopagai,

neĩ heko vai va'e re ndoikuaa potai teri ramo

₁₆ndejuru reipe'a vy ayvu ovare'ỹ va'e rupi ndeayvu.

Ndeayvu reta ma, reikuaa vy e'ỹ.