Jó 36

₂— Ejapyxakave'i ranhe, ha'e rã amombe'u porãve 'rã ndevy

Nhanderuete amboeko porãa rupi xeayvu aguã arekove teri va'e.

₃Mombyry gui 'rã aru xe'arandurã

Xemoingoare amboeko porã aguã.

₄Mba'eta anhetẽ, xeayvu ma rive'ỹ.

Ndereve oĩ va'e ma mba'emo oikuaapa va'e.

₅— Ne'exa, Nhanderuete ma tuvixa ete va'e.

Ha'e rami teĩ nopena e'ỹi 'rã peteĩve re.

Oikuaa py avi tuvixa ete va'e oiko.

₆Ndogueraa jepei 'rã heko vai va'e rekove,

ha'e rã ojexavai va'e kuery ma ha'evea rami 'rã oguereko.

₇Ndopytu'ui 'rã heko porã va'e kuery re oma'ẽa gui.

Ha'e rami 'rãgue py omboyvate vy huvixave kuery reve

omboguapy 'rã henda openaaty py raka'e rã peve.

₈Xapy'a rei ha'e kuery corrente py ombo'aague py 'rã ikuai,

ixã imoingo axyarã py ojokuaa rire.

₉Ha'e rami ha'e ojapo 'rã ha'e kuery ha'eve'ỹa rami ojapoague oikuaa aguã,

ojejou porã reia rupi ikuai rire.

₁₀Ha'e kuery apyxa oipe'a 'rã ombo'e aguã.

Ha'e rami vy ha'e kuery pe ijayvu 'rã heko vaia gui ojeko rerova aguã.

₁₁Xapy'a rei ha'e kuery onhe'ẽ rendu ha'e ixupe ju ikuai ramo

opaa py oiko 'rã ha'e kuery ovy'a aguã ára,

ha'e ma'etỹ mba'emo re ovy'a rei okuapy aguã.

₁₂Ha'e rã ha'e kuery noendu potai ri ramo

hu'y guaxu py rami onhyvõa 'rã,

ha'e ramo omano 'rã hexa ogue reve.

₁₃Opy'a py heko vaia anho omoĩ va'e ma ojeupe guarã omboaty 'rã poxya.

Nhanderuete ombo'a uka teĩ ndojapukai 'rã okuapy heraa jepearã va'ekue pe.

₁₄Ha'e rami vy kunumi teri reve teĩ omokanhy 'rã guekove.

Omano 'rã avakue ta'angaa pegua itavy rei va'e mbyte py.

₁₅Ha'e rã ojexavai va'e kuery ma ha'e ogueraa jepe 'rã ojexavaia py ae oeko mbo'e vy,

mba'eta ombojexavaia rupi oipe'a 'rã ijapyxa.

₁₆— Ha'e rami ae ndee voi reiko axya gui Nhanderuete ndepe'axe avi

peteĩ henda tuvixaa py, reiko axy ve'ỹ aguã py,

ha'e rekaru aguã mesa áry tembi'u hee va'e anho oĩa py.

₁₇Ha'e rã ndee ma renhemonyẽ heko vai va'e kuery reve repaga aguã.

Ha'e nunga rupi nderupity 'rã ndejou vaia ha'e nembopagaa aguã anho.

₁₈Enheangu ke ha'vy ipoxya rendua py rejojai rei e'ỹ aguã,

ejepe'a uka eme guive “Xerekovia heta ome'ẽa” 're vy rive.

₁₉Rejae'o rei ha'e opa mba'e py renhea'ã ramo rive nda'u

nemboaxy 'rã rejexavaia gui reo jepe aguã?

₂₀Earõ eme eikovy pytũ pyguarã,

mba'eta heta ikuaiague gui oipe'apaa heravy aguã ae oĩ.

₂₁Enheangu ke teko vai re reo e'ỹ aguã,

ha'e va'e pe “Jexavai gui ha'eveve va'e” 're vy rive.

₂₂Ma'ẽ, Nhanderuete opo'akaa py yvate ete va'e ojekuaa!

Mava'e porombo'ea 'rã tu ha'e rami oiko?

₂₃Mava'e tu omboeko mbo'e ta,

ha'e'ỹ vy ixupe “Ha'eve'ỹa rami rejapo” he'i ta?

₂₄— Nema'endu'a porã Nhanderuete rembiapo

avakue pavẽ oguerovy'a va'e re.

₂₅Ha'e nunga re avakue ha'e javi oma'ẽ vy

mombyry gui ojou porã 'rã okuapy.

₂₆Ma'ẽ, Nhanderuete ma yvate ete va'e, jaikuaa aguã rami e'ỹ.

Oikoa ma'etỹ guive ndajaipapa kuaai 'rã.

₂₇Mba'eta ojea katy ogueru 'rã yy tykyrã,

yvyxĩ gui ombo'oky aguã.

₂₈Ha'e rami vy arai gui onhoẽ 'rã

avakue áry otyky reta va'erã.

₂₉Amongue nda'u oikuaa 'rã ri marã rami pa arai oipyo heravya,

yapu guive oĩa gui omonhendua?

₃₀Ma'ẽ, ha'e va'e áry rupi oexa uka 'rã imondovy nhemboxi,

ye'ẽ typyvea ha'e javi rupi peve omoexakã va'erã.

₃₁Ha'e nunga py oguereko 'rã yvy regua ikuai va'e,

ha'e vy ha'e kuery pe ome'ẽ 'rã tembi'u oata aguã rami e'ỹ.

₃₂Opo py overa va'e ojopy reta vy

omombo 'rã ngovaigua kuery re.

₃₃Ára vai revovo voi oikuaa uka 'rã heko,

mba'eta nda'evei etea oexa uka 'rã ha'eve'ỹa rami joguereko va'e rovai.