Jó 34

₂— Pene'arandu va'e, pendu ke xee aikuaa va'e.

Penembo'epaa va'ekue, pejapyxaka xeayvua re.

₃Mba'eta nhandeapyxa py nhaendu kuaa 'rã ayvu,

nhandejuru py tembi'u heea nhaendu kuaa rami avi.

₄Ha'evea ramigua jaiporavo 'rã nhandejeupe.

Jojavi 'rã jaikuaa iporã va'e.

₅Mba'eta Jó aipoe'i: “Xereko porã va'eri

Nhanderuete oipe'a xevy guarã va'ekue.

₆Ha'evea rami aiko teĩ ijapu va'e rami xekuaa.

Xeai okuera va'erã e'ỹ oĩ, ajejavya oĩ ramo e'ỹ”, he'i va'ekue.

₇— Oiko 'rã nda'u ava Jó ramigua?

Mba'eta ha'e ma ojojai 'rã Nhanderuete, yy oy'u va'e rami rive.

₈Ha'e rami vy onhemoirũ 'rã oikovy ojapo vai rei va'e kuery re,

avakue heko vai va'e kuery reve anho oiko.

₉Mba'eta aipoe'i: “Nhanderuete jarovy'a teĩ

mba'everã ndovarei nhandevy”, he'i va'ekue.

₁₀— Ha'e nunga rupi peẽ avakue peneakã porã va'e, pejapyxaka xeayvua re.

Nhanderuete ma peteĩve henda py ndojapo vai 'rã,

Ipo'akapa va'e ha'eve'ỹa rami ndajoguerekoi 'rã.

₁₁Mba'eta ome'ẽ 'rãe jaikoague repy,

ojapo 'rã peteĩ-teĩ jaikoague repy jajou aguã rami.

₁₂Anhetẽ ete, Nhanderuete ha'eve'ỹa rami ndoikoi 'rã.

Ipo'akapa va'e ndajoguerekoi 'rã ha'eve'ỹa rami.

₁₃Mba'eta mava'e tu omoĩ raka'e yvy re opena va'erã?

Mava'e tu ipo py omboaxa raka'e ha'e javi regua?

₁₄Xapy'a rei Nhanderuete ojee rive opena va'e rire,

ha'e ojea katy onhe'ẽ ha'e pytuẽa oguerupa va'e rire

₁₅to'o ikuai va'e ha'e javi omanomba 'rãgue,

ha'e yvyku'i ju jajeapo 'rãgue.

₁₆— Ha'e gui Jó, ndere 'arandu oĩ ramo endu ke pova'e.

Ejapyxaka xeayvua re.

₁₇Ha'eve'ỹa rami joguereko va'e teve oĩ 'rã joe opena aguã?

Mba'e re tu ha'vy ndee ndeayvu Heko porã ha'e Ipo'akapa va'e ojejavya rami?

₁₈Huvixave oiko va'e pe nda'u “Mba'e vare'ỹ” 'ea 'rã teve?

Ha'e rami e'ỹ vy yvatekueve pe: “Pendeko vai va'e” 'ea 'rã teve?

₁₉Yvatekueve rive oayvuve e'ỹ va'e pe katuve ma nda'evei.

Ha'e ma iporiaukue'i gui ndoayvuvei 'rã oguerekopa rei va'e kuery.

Mba'eta ha'e javive ma opo py ojapo va'ekue meme ikuai.

₂₀Ha'e kuery omano xapy'a va'erã meme.

Pytũ mbyte jave ha'e kuery oryryipa reve oaxa 'rã,

ipo'aka va'ekue teĩ Ipo'akapa va'e jaexa e'ỹ va'e ogueraa 'rã.

₂₁— Nhanderuete ma oma'ẽ 'rã avakue ikuaia rupi.

Ha'e kuery oguataa ha'e javi ha'e oexapa 'rã.

₂₂Jipoi pytũa neĩ kuaray'ã ana

mba'emo vai apoare kuery ixugui onhemi aguã.

₂₃Mba'eta Nhanderuete ma avakue reko re oikuaa pota are e'ỹ teĩ

ojapo 'rã henonde ojexa uka aguã rami omboayvu aguã.

₂₄Ha'e rami vy oikuaa pota e'ỹ re omopẽmba 'rã imbaraete va'e kuery,

ha'e vy hekovia omoĩ 'rã amboae kuery.

₂₅Ha'e kuery ikuaia ha'e oikuaa ae vy

pyávy oity ramo omongu'i pyre ikuai.

₂₆Pavẽ oexaa py

omoingo axy 'rã heko vai va'e ha'e javi reve,

₂₇ixugui ha'e kuery ojepe'a rire,

peteĩve ma voi ndoikuaaxei ixuguigua tape.

₂₈Ha'e kuery ojapo Nhanderuete renonde iporiaukue'i ojapukaia onhendu aguã rami.

Ha'e ramo oendu ae ojexavai va'e kuery ojae'oa.

₂₉Nhanderuete okyrirĩ teĩ mava'e 'rã tu ombopaga?

Ngova omo'ã rã mava'e 'rã tu oexa, peteĩ regua ha'e javi e'ỹ vy peteĩ ava teĩ?

₃₀Ha'e rami oiko heko vai va'e ipo'aka e'ỹ aguã,

ha'e oiko e'ỹ aguã heta va'e kuery mbotavyarã.

₃₁— Xapy'a rei amongue aipoe'i 'rã Nhanderuete pe:

“Aiko axy vaipa ma, ndajejavyvei ma 'rã.

₃₂Xembo'e ke mba'emo xee ndaikuaai va'e re.

Ha'eve'ỹa rami ajapo va'ekue teĩ ndajapovei ma 'rã”, he'i 'rã.

₃₃Ha'e rami rã Nhanderuete omboekovia kuaa aguã nda'u

oporandu 'rã teve ndee reipotaa e'ỹ vy ndee ndereipotaia re?

Ndevy pe teve aipoe'i 'rã: “Ndee ae eiporavo, xee'ỹ.

Emombe'u ke reikuaa va'e, ndeayvu ke”, he'i 'rã teve?

₃₄— Avakue hi'arandukueve omombe'u 'rã xevy,

inhakã porã va'e kuery xeayvua re ojapyxaka vy aipoe'i 'rã xevy:

₃₅“Jó ma oikuaa vy e'ỹ ijayvu,

ijayvua re 'arandua noĩ”, he'i 'rã.

₃₆Ha'e nunga rupi tove Jó reko re toikuaa pota opa peve,

heko vai va'e rami ombovai rire.

₃₇Mba'eta ojejavya áryve omoĩ Nhanderuete re opu'ã rei aguã.

Nhanembyte py ojepopete ombojaru reia rupi,

ha'e Nhanderuete rovai ijayvu reta rive.