Jó pe Eliú ijayvu eteague
1— Ha'e gui Jó, endu ke aikuaa va'e re xeayvu rã,
ejapyxaka xeayvua ha'e javi re.
2Aỹ ma xeayvu ta,
xejuru py xeapekũ ijayvu aguã rami oĩ.
3Xeayvua oikuaa uka 'rã xepy'a re anhetẽ va'e anho oĩa,
xeayvu 'rã mba'emo aikuaa va'e re anho.
4Nhanderuete Nhe'ẽ ae xemoingo va'ekue,
Ipo'akapa va'e oipejua py rive ome'ẽ xerekoverã.
5Xapy'a rei rembovai kuaa vy ke xembovai,
ereko katu reikuaa va'e xevy pe remombe'u va'erã.
6Ma'ẽ, Nhanderuete renonde ma ndee ramigua ae avi aiko,
Yapo gui avi xeapo rire.
7Ha'e ramo xee noromongyjei 'rã,
nde'áry noĩ 'rã xepo poyia.
8— Anhetẽ xee aendua py ndeayvu rã
ange aendu kuri
9“Ha'eve va'e aiko, ajejavy va'e'ỹ.
Xeky'a va'e'ỹ ha'e xereko vai va'e'ỹ”, 're ramo.
10“Ma'ẽ, Nhanderuete xembopagaa rupi onhea'ã,
hovaigua aikoa rami xekuaa vy.
11Ha'e rami vy yvyra pa'ũ py omboty xepy,
ha'e oikuaa pota 'rã aikoa ha'e javi re”, 're va'ekue.
12Ha'e rami ndeayvuague ha'eve'ỹa ramigua ramo
xee rombovai 'rã.
Mba'eta avakue ikuai va'e gui Nhanderuete yvateve va'e.
13Mba'e re tu ixupe ndeayvu ete vy
“Peteĩve henda py nerenhemombe'u porãi ri”, 're?
14Ha'e rami 'rãgue py Nhanderuete ma peteĩ rami ijayvu ma vy
teĩgue ju 'rã omombe'u porãve.
Ha'e rami teĩ ijayvua re avakue noendu porã potai 'rã.
15Nhandevy pe oexa ra'u uka 'rã mba'emo, pyávy mba'emo jaexaa rupi,
nhanderopeyi vaipa reve
nhanderupa rupi jake jajupy jave.
16Nhandeapyxa voi oipe'a vy
nhanembo'e 'rã oipota va'e re,
17ojapo aguã nhanhembopy'aa gui jajepe'a aguã rami,
jajejou porã reia gui nhandereraa jepe aguã,
18yvykua katy nhanderekove oo rã ojoko vy,
kyxe py nhandejukaa gui guive.
19— Nhanderupa rupi nhandetui ramo nhanembopaga 'rã haxy va'e py,
nhanekãgue re haxy nhaendu riae va'e py.
20Ha'e ramo jajeguaru 'rã tembi'u gui,
tembi'u hee va'e teĩ nhanenhe'ẽ py ndaja'uxei ae.
21Nhandero'o oĩ porã va'ekue aỹ ndojekuaavei.
Ha'e rã nhanekãgue ndojekuaai va'ekue ma aỹ ojekuaapa.
22Nhanenhe'ẽ oo tema 'rã yvykua katy,
nhanderekove onhemboja 'rã ovy ipe'aarã kuerya katy.
23— Xapy'a rei ou 'rã peteĩ anjo nhandere ojerure va'erã, mbovy e'ỹ ikuai va'e regua,
nhandevy oikuaa uka aguã ha'evea ramigua jajapo aguã.
24Ha'e ramo Nhanderuete nhanemboaxy vy aipoe'i 'rã anjo pe:
“Eraa jepe ke, yvykua py ho'a e'ỹ aguã.
Ajou ma hepyrã”, he'i 'rã.
25Ha'e rami rã nhandero'o hexaĩ ju 'rã nhanekyrĩ jave nhanembaraeteague rami,
nhanekunumi jave jaikoague rami ae ju 'rã jaiko.
26Ha'e ramo jajerure 'rã Nhanderuete pe, ha'e rã nhanepytyvõ 'rã.
Ha'e ramo javy'a reve 'rã jaexa Nhanderuete rova.
Ha'e ramo nhanemboeko porã ju 'rã.
27Ha'e ramo avakue oendua py japoraei reve aipoja'e 'rã:
“Ajejavy va'ekue, ha'eve'ỹa ramigua ajapo,
teĩ apaga aguã va'ekue rami e'ỹ guive xembopagaa.
28Nhanderuete ojogua xenhe'ẽ yvykua py ooa gui,
xerekove reve aexa aguã hendy va'e”, ja'e 'rã.
29— Ha'e va'e ha'e javi ma Nhanderuete ojapo
nhandevy mokoĩgue, mboapykue mba'e,
30yvykua gui nhanderekove ogueru ju aguã,
oikove va'e kuery moexakãa py nhanderexape avi aguã.
31Ha'e nunga rupi Jó, endu ke, ejapyxaka xeayvua re.
Ekyrirĩ ke, ha'e rã xee xeayvu 'rã.
32Ndee ndeayvu aguã rereko ri vy xembovai.
Ndeayvu ke, mba'eta xee romboeko porãxe.
33Ha'e gui mba'eve ndererekoi ri ramo ejapyxakave tema xeayvua re.
Ekyrirĩ, ha'e rã rombo'e 'rã 'arandu re — he'i.
