Jó ha'e irũ kuery mboapy ikuai va'e pe Eliú ivaiague
1Ha'e gui mboapyve avakue opytu'u ma Jó onhemboeko porãa rupi ijayvu rã ombovaia gui.
2Ha'e ramo buzita Baraquel ra'y Eliú, Rão ramymino regua ju ivai Jó pe, Nhanderuete gui eteve voi onhemboeko porãvexe ramo.
3Irũ kuery mboapyve pe voi ivai, mba'eta ha'e kuery nombovai kuaavei va'eri Jó rovai tema ijayvu rire.
4Ha'e gui Eliú ma Jó gui kunumive va'e vy oarõ ranhe ixupe ijayvu aguã.
5Ha'e rami avi mboapy avakue nombovai kuaaveia Eliú oexa vy ivaive oiny.
Jó pe ombovai ypy vy Eliú ijayvuague
6Ha'e gui buzita Baraquel ra'y Eliú aipoe'i:
— Xee ma xekunumive va'e, ha'e rã peẽ ma pendetujakueve meme.
Ha'e rami vy xee arõ ranhe, pendua py xee aikuaa va'e amombe'u aguã ndaxepy'a guaxui vy.
7Xee aipoa'e va'ekue: “Heta ára ha'e ma'etỹ mbovy e'ỹ oguereko va'e kuery ranhe ta'ijayvu 'arandu re nhombo'ea rupi”, ha'e va'ekue.
8Ha'e rami teĩ anhetẽ avakue re oĩ 'rã peteĩ Nhe'ẽ,
mba'eta Ipo'akapa va'e oipejua py rive nhomo'arandu 'rã.
9Hi'arandukueve ma tujakueve anho e'ỹ ikuai,
tujakue'i anho e'ỹ 'rã oikuaa ha'evea ramigua.
10Ha'e nunga rupi xee aipoa'e: “Pejapyxaka ke xere,
ha'e gui xee voi amombe'u 'rã aikuaa va'e”, ha'e.
11— Ma'ẽ, xee amoĩ porã pendeayvuague,
pendeayvua re ajapyxaka pota porã
pendeayvurã re teri peikuaa pota peiny reve.
12Ha'e gui pendeayvu aendu rã
peẽ kuery peteĩve ma voi ndapeikuaa ukai Jó ha'eve'ỹa rami ijayvua,
napembovai kuaai pekuapy ha'e ae oikuaa rami ijayvu rã.
13Ha'e gui nda'evei penhemboeko porã ukaa rupi aipopeje aguã:
“Ore rojou ma 'arandu.
Nhanderuete ju tombovai, avakue ma nda'evei”, peje aguã.
14Ma'ẽ, xevy pe'ỹ ha'e ijayvu rire
xee ma pendeayvuague rupi e'ỹ 'rã ambovai.
15— Jó, neirũ kuery mboapyve onhemondyi vy nanembovai kuaavei,
ha'e kuery pe oata ma merami ayvu.
16Ha'e gui xee pa arõve ta ha'e kuery nda'ijayvui ma rire?
Mba'eta okyrirĩmba ma, peteĩ henda py ma voi nombovaivei vy.
17Ha'e rami vy xee ju 'rã xeayvu,
amombe'u 'rã aikuaa va'e.
18Mba'eta heta areko xeayvu aguã,
xenhe'ẽ oĩ va'e ae xemokyre'ỹ ramo.
19Mba'eta xepy'apy rupi aendu vinho ryru mba'emo pirekue guigua ipyau va'e ramigua,
onhembotypa vy oxoro rai'i va'e rami.
20Ha'e rami vy tove taxeayvu oẽmba ovy aguã.
Aipe'a 'rã xejuru rombovaia rupi xeayvu vy.
21Xee ma peteĩ rive joegui ayvuvea rupi e'ỹ 'rã xeayvu,
neĩ avakue pe ajejou porã ukaa rupi e'ỹ guive.
22Mba'eta xee ma ajejou porã ukaa rupi ndaxeayvu kuaai.
Ha'e rami e'ỹ va'e rire xemoingoare xereraa voi 'rãgue.
