Jó 31

₁— Xerexa reve ajapo ma areko aguã.

Mba'exa tu ha'vy xee apena reia rupi ama'ẽ ta kunhataĩ re?

₂Ha'e rami rire mba'e 'rã tu xee ajopy Nhanderuete yvategua gui,

mba'e nunga tu yvate oĩa gui ome'ẽ 'rã xevy?

₃Mba'eta heko vai va'e peguarã omoĩ okanhy aguã,

mba'emo vai apoa pe omoĩ oiko axy aguã.

₄Ha'e rã xee aikoa ma Nhanderuete oexapa,

oipapa aguataa ha'e javi.

₅— Ha'e gui aiko porã merami rive va'e rire,

ha'e ajokore aguã katy xepy inhakuã ovy va'e rire,

₆(Nhanderuete toikuaa pota porã xere,

anhetẽ rupi aikoa oikuaa aguã,)

₇xapy'a rei tape porã gui ajepe'a vy

mba'emo aexa va'e rupi rive anhembopy'a,

e'ỹ vy xepo re iky'a va'e oĩ va'e rire,

₈ha'e rami ri ramo amboae kuery rive to'u xee ama'etỹague gui,

ha'e xemba'ety rupi henhoĩ va'ekue tomondoropa rive.

₉— Xapy'a rei xekuraxõ py kunha mboae re anhembotavy uka,

ha'e xea katygua rokẽ py ama'ẽ mbeguea rupi aiko va'e rire,

₁₀ha'e ramo xera'yxy tojapo tembi'u amboae ava pe,

hexeve amboae tonheno.

₁₁Mba'eta ha'e rami aiko va'e rire nda'evei ete 'rãgue,

ajejavyague re huvixa kuery xembopaga 'rãgue.

₁₂Ha'e ramigua ma tata rami ombovaipa 'rãgue opa peve,

omomba 'rãgue mba'emo areko va'e ha'e javi.

₁₃— Xapy'a rei xerembiguai ava e'ỹ vy kunha mba'e

ha'eve'ỹa rami xee areko va'e rire,

₁₄mba'e tu xee ajapo 'rãgue Nhanderuete xere opu'ã ramo?

Xere oikuaa pota ramo mba'exa tu xee ambovai 'rãgue?

₁₅Mba'eta xeryru'i py aĩ aguã xemoingo va'ekue e'ỹ ri ty'y ha'e kuery voi omoingo raka'e?

Ha'e e'ỹ teve nhanderyru'i py nhanemoingo pavẽ va'ekue?

₁₆— Xapy'a rei iporiaukue'i oipota va'e name'ẽi vy

imeve'ỹ va'e ndaexa pyxovei aguã rami ajapo va'e rire,

₁₇ha'e rami e'ỹ vy xee ae'ia py akaru va'e rire

tyre'ỹ pe amboja'o e'ỹ re,

₁₈(mba'eta xekunumi guive xereve ae areko tuu rami,

ha'e xeryru'i py aĩ guive imeve'ỹ va'e rerekoa aiko,)

₁₉xapy'a rei ijao e'ỹ va'e ojexavai rã ama'ẽ rive va'e rire,

e'ỹ vy onheovã aguã oguereko e'ỹ vy ojexavai rã,

₂₀xapy'a rei xerymba vexa'i rague py namboakui ramo

ha'e kuery opy'a py ndaxereroayvu porãi va'e rire,

₂₁xapy'a rei okẽ py joguerekoa kuery ikuai va'e xemboeko porã reve teĩ

tyre'ỹ rovai xepo aupi va'e rire,

₂₂ha'e rami ri ramo to'a rive xeaxi'y kãgue,

ha'e tomboia xejyva oĩague gui.

₂₃Mba'eta ha'e rami va'e rire Nhanderuete xembopaga aguã gui ndaxerekorãvei 'rãgue,

hexakãa rive xee ndaropo'akai 'rãgue.

₂₄— Xapy'a rei ouro re rive ajerovia vy

ouro oiky'a'o pyre pe “Ndere ajeko” ha'e va'e rire,

₂₅xapy'a rei arekopa etea

ha'e xepo py ajou reta va'e arovy'a va'e rire,

₂₆xapy'a rei kuaray rexakãa re,

e'ỹ vy jaxy hendy porãa re ama'ẽ reve

₂₇xepy'a py ajekore nhemia rupi

xepo py ayvua aikuaa uka va'e rire,

₂₈ha'e va'e py voi ajejavy 'rãgue joguerekoa kuery xembopaga aguã rami,

Nhanderuete yvategua e'ỹ amboete rire.

₂₉— Ha'e gui xere ija'e'ỹ va'e kuery ojexavai rã aexa vy ndavy'ai,

ha'e kuery re mba'emo vai oiko rã ndarovy'ai.

₃₀Ha'e rami avi ndarojejavyi xejuru

ha'e kuery omano aguã re ajerurea py.

₃₁Ha'e xero py ikuai va'e aipo nde'i:

“Xo'o ha'e nome'ẽ porãi rire ndajakaru porãi”, nde'i,

₃₂mba'eta xee ndaejai yvy mboae guigua tape py rive pytũ oaxa aguã,

xerokẽ aipe'a jepi riae oguata va'e kuery amovaẽ vy.

₃₃Ha'e gui Adão rami e'ỹ xepy'apy py nanhomi

xereko vaia ha'e ajejavya.

₃₄Mba'eta xee ma heta va'e kuery gui ndakyjei,

xeretarã kuery xere ija'e e'ỹa naxemongyjei

akyrirĩ ha'e xero gui naẽi aguã rami.

₃₅Xeayvu renduarã oĩ va'e rire!

Ma'ẽ, apy ma oĩ xereko regua xerery reve ambopara va'ekue!

Ipo'akapa va'e xembovai va'e rire,

ha'e rami e'ỹ vy xerovaigua ombopara va'e rire xere ijayvua!

₃₆Ha'e va'e kuaxia para araa 'rãgue xeaxi'y áry,

xeakã áry ajokua 'rãgue coroa rami.

₃₇Nhanderuete pe xee aikuaa uka 'rãgue aikoa ha'e javi.

Ha'e oĩa py ajexa uka 'rãgue yvateve va'e rami.

₃₈— Xapy'a rei xemba'ety káuxa xere ijayvua,

ha'e yvy aikaraĩ heravyague káuxa ojae'oa va'e rire,

₃₉xapy'a rei ijaju ma ramo ha'u omba'eapo va'e kuery pe ha'evea rami apaga e'ỹ re,

ha'e ijopyarã va'ekue amomba va'e rire,

₄₀ha'e rami ri ramo trigo 'rãgue py juu rive toiko xevy,

ha'e cevada 'rãgue py toiko trigo ramigua rive — he'i.