Jó 30

₁— Ha'e gui aỹ ma xegui kyrĩgueve xejojai okuapy,

ha'e va'e kuery ru ma neĩ jagua reve xerymba vexa'i kuery oarõ aguã katy

namondoukai va'ekue ri.

₂Mba'eta ha'e kuery inhangaipa ramo

mba'e nunga py tu xevy ovare 'rãgue ipo mbaraetea?

₃Jexavai ha'e karuai gui ha'e kuery ikangypa okuapy.

Oixu'u okuapy mba'emo pirukue,

yma ma tekoa noĩveia rupi mba'emo vaikue ikuai va'e guive.

₄Jai rogue ha'e yvyra'i rogue rive oipo'o,

zimbro rapo guive ho'u okuapy.

₅Avakue mbyte gui omoxẽa.

Ha'e kuery rovai ojapukaia okuapy imonda va'e rakykue ojapukaia rami.

₆Yvy'ã peguy kuaray'ã reia rupi ikuai,

yvykua ha'e itakua rupi.

₇Onhendu okuapy jai rupi,

juu guy rupi rive ijaty okuapy.

₈Inhakã porã e'ỹ va'e ra'y kuery ikuai,

ima'endu'apy e'ỹ regua,

ijyvy gui omoxẽmba pyre.

₉— Ha'e rã aỹ ma ha'e kuery xembojaru rei okuapy,

ojojai pyrã aiko ramo.

₁₀Xegui ojeguaru vy ojepe'a 'rã mombyry'i,

ndokyjei guive xerova re onyvõ aguã.

₁₁Mba'eta Nhanderuete ombopyu xerapa xã xembojexavai vy.

Ha'e ramo ha'e kuery ndojejokovei ma xerenonde.

₁₂Ha'e rami vy xeaxu e'ỹa re opu'ã okuapy xemoanha rei aguã,

ha'e xerovai jogueroayvu okuapy xemomba vy ou aguã re.

₁₃Ombovaipa okuapy xee aa aguã va'e rupi,

xeapo ajexavai aguã rami.

Ha'e kuery ma oipytyvõ pyrã e'ỹ ae.

₁₄Xere ou okuapy tetã kora oitypaague rupi oike va'e rami,

ha'e kuery ouve tema 'rã ivaipaague mbyte rupi.

₁₅Xere ou xemongyjearã,

yvytu ombovevepa rire omboetepy aikoague.

Avy'aague oaxa ma ovy arai rami.

₁₆— Aỹ ma xepy'apy py anhenhandu xenhe'ẽ ivaipa maa rami.

Xembojexavaia ára ou ma xere.

₁₇Pyávy xekãgue hu'ũmba ha'e ovapa va'e ramigua aendu,

ha'e mba'emo vai xexu'u va'e ndopytu'ui.

₁₈Mba'emo vai aendu va'e gui xeao voi ojepokapa rei 'rã,

mba'emo vai xejyryvipy 'rã xeao puku jyryvi rami.

₁₉Xeruete, ndee ae xemombo yapo py,

ha'e ramo yvy ku'i ha'e tanhimbu rami aiko.

₂₀Ndevy ajapukai rã ndee naxembovai.

Apu'ã ha'amy teĩ rema'ẽ rive xere.

₂₁Porayvu e'ỹ va'e renhemoingo xevy.

Ha'e vy ndepo mbaraete reve repu'ã xere.

₂₂Rejapo yvytu xereupi vy hi'áry xereraa aguã rami.

Xemou'ũmba ára vai revovo rupi.

₂₃Ha'e gui xee aikuaa amano aguã katy xereraa,

oikove va'e ha'e javi ikuai aguã katy.

₂₄— Ha'e rami avi yty áry ava omomboa imoinyague gui nokuave'ẽi 'rã teve,

ojexavaia gui ndojapukai ratãi 'rã teve ipytyvõarã pe?

₂₅Xee ndajae'oi va'ekue teve ojexavai va'e re,

ha'e xenhe'ẽ py namboaxyi teve oiko axy va'e?

₂₆Iporã va'e xee arõ teĩ xere ou mba'emo vai.

Hendy va'e arõ va'e 'rãgue py pytũ anho ou xere.

₂₇Xeryepy rupi omyĩ va'e ndopytu'ui,

xere aiko axya ára ou ramo.

₂₈Xeporiau aikovy kuaray ojope e'ỹa rupi.

Heta va'e kuery mbyte py ajerure ha'amy xepytyvõa aguã.

₂₉Xee ma jagua-tuvy nhe'ẽ ryke'y,

ha'e guyra nhandu ryvy aiko.

₃₀Xepire hu'ũmba reve ho'apa xegui,

xekãgue voi okai merami xepire raku gui.

₃₁Ha'e nunga rupi ixã reta va'e ambopu 'rãgue py xeraxẽ ainy xepy'a vai vy,

ha'e mimby amonhe'ẽ 'rãgue py ojae'o va'e rami anhendu.