Jó 29

₂— Ai! Kueve'igua jaxy re aikoague rami ju aiko va'e rire,

Nhanderuete xere opena javegua re rami!

₃Ha'e jave ma xeakã áry rupi omoexakã va'ekue,

ha'e hendy va'e xerereko heravy ramo pytũ rupi ete aguata aikovy va'ekue.

₄Ha'e jave ma xerexaĩ aikovy va'ekue,

xero áry rupi Nhanderuete xerayvua oexa uka rã.

₅Ha'e jave ma Ipo'akapa va'e oiko teri xereve,

ha'e xera'y kuery voi xeyvýry teri ikuai.

₆Kamby py xepy ajoi ainy va'ekue,

ha'e itaova gui yakã'i oxyry va'e rami azeite oxyry oiny jave.

₇— Tetã kora rokẽ katy aa,

ha'e tetã mbyte py guive aguapy ainy aguã ome'ẽa jave

₈kunumigue xerexa vy ojepe'apa,

ha'e tujakue'i voi opu'ãmba okuapy va'ekue.

₉Yvatekueve voi ijayvu ta vy ojuru ojoko okuapy va'ekue,

ojuru re opo omoĩ reve.

₁₀Omboetevepy kuery ayvu nonhenduvei va'ekue,

ijurupy py inhapekũ nomyĩvei ramo.

₁₁Xeayvua rendua kuery ma “Ovy'a va'e” he'i okuapy xevy,

xerexaa kuery voi xere ima'endu'a porã va'ekue.

₁₂Mba'eta xee ma iporiaukue'i ojapukai rã aepy va'ekue,

tyre'ỹ opytyvõarã oguereko e'ỹ va'e kuery guive.

₁₃Omano ta va'e voi xereroayvu porã va'ekue,

xee ajapo avi va'ekue imeve'ỹ va'e kuery okuraxõ py ovy'a aguã rami.

₁₄Xejee amoĩ va'ekue teko porã,

ha'e va'e anho oĩ va'ekue xeao rami.

Manto ha'e akã nhovãa rami oĩ va'ekue ha'evea rami joe apenaa.

₁₅Xee ajeapo va'ekue ára revegua e'ỹ rexarã rami,

hi'u rovaikue'i va'e pyrã rami guive.

₁₆Iporiaukue'i pe ma tuu aiko va'ekue,

oikuaapy e'ỹ ikuai va'e re guive aikuaa pota va'ekue.

₁₇Ha'e rã porayvu e'ỹ va'e kuery raĩ'y kã ma xee amopẽmba va'ekue,

ha'e kuery raĩ gui xee araa jepe va'ekue omokõ ta va'e.

₁₈Xee aipoa'e va'ekue: “Xero py ae 'rã amano,

amboetave 'rã xe'ára ita ku'i rami.

₁₉Xee aiko 'rã yy peve yvyra rapo ovy va'e rami,

ha'e pyávy hakã re yxapy oĩa va'e rami.

₂₀Xemboeteave tema 'rã,

ha'e xepo py xerapa ajopy atã tema 'rã aikovy”, ha'e va'ekue.

₂₁— Xeayvu rã ojapyxaka va'e kuery oarõ okuapy va'ekue amongeta aguã,

xeayvua oendua rupi okyrirĩ pavẽ va'ekue.

₂₂Xee xeayvupa ma rã naxembovai kuaai va'ekue.

Ha'e kuery áry xeayvua oguejy va'ekue yxapy rami.

₂₃Ha'e kuery xerarõ va'ekue oky re rami,

ojuru oipe'a reve oarõ okuapy xeayvu aguã, haku-a ára py oky oarõ va'e rami.

₂₄Ha'e kuery nda'ipy'a guaxui jave ha'e kuery pe xerory va'ekue.

Xerova omoexakã rã xererovy'a va'ekue.

₂₅Ha'e kuery raperã xee aiporavo va'ekue huvixa rami aguapy ainy reve,

huvixave oxondaro kuery mbyte oĩ va'e rami,

ha'e ojae'o va'e kuery mbopy'a porãa rami ajoguereko va'ekue.