Jó 26

₂— Ikangy va'e pytyvõa merami rive reiko,

ijyva mbaraete e'ỹ va'e reipytyvõ merami rive!

₃Hi'arandu e'ỹ va'e remongeta kuaa merami rive,

ha'e anhetẽ va'e reikuaa uka porãmba merami rive!

₄Mava'e nembo'ea rupi tu ndeayvu ha'e rami ete?

Mava'e guigua nhe'ẽ tu ndere oĩ ndeayvu kuaa aguã?

₅— Ha'e gui omano va'ekue nhe'ẽ ma oryryipa 'rã okuapy

yy guy py ikuaia py.

₆Nhanderuete gui manoa pygua kuery nonhemi kuaai,

yvykua vaikue ao'iarã noĩ ramo.

₇Mba'eve oĩ e'ỹa áry ha'e oipyo kuaray apu'a'ia katygua,

mba'eve oĩ e'ỹa áry ae avi onhono yvy.

₈Arai ana ikuai va'e mbyte ojoko 'rã yy,

ha'e rami teĩ arai ndoxoi 'rã iguy py.

₉Ojao'i 'rã guenda opena oinyaty,

hi'áry arai pytũa py ojao'i vy.

₁₀Omoĩ raka'e yy apyrã,

hexakãa ha'e pytũa mbyte py.

₁₁Ijayvu atã ramo yva yta

oryryi 'rã onhemondyipa vy.

₁₂Ombaraetea rupi omboja'o raka'e ye'ẽ,

ha'e o'arandua rupi oity ngovaigua kuery.

₁₃Opejua py rive omoexakã 'rã yva,

ha'e opo py ojuka 'rã teju jagua inhakuã va'e.

₁₄Ma'ẽ, ha'e ramigua ma hembiapo ypy rive!

Mba'eta ixugui ma nhaendu mbeguei'i anho.

Ha'e gui mava'e tu oendu kuaa 'rã ipo'akaa ryapu atã va'e?