Heko vai va'e kuery ikuai axy aguã re Jó ijayvuague
1Jó ijayvuve tema. Ha'e vy aipoe'i:
2— Anhetẽ ete Nhanderuete Ipo'akapa va'e xevy guarã va'ekue pe'aa
ha'e xenhe'ẽ moingo axya va'e rekove rupi aura vy aipoa'e:
3xee aikove teria ja,
ha'e xeapyĩgua py xepytuẽ aguã Nhanderuete ome'ẽ teria ja
4xejuru nda'ijayvui 'rã ha'eve'ỹa rami,
xeapekũ nda'ijapui 'rã guive.
5Nda'evei ete “Ha'evea rami pendeayvu”, ha'e aguã!
Amano peve ndajepe'ai 'rã anhetẽ rupi aikoa gui.
6Aĩ atã 'rã xereko porãa re, ndajepe'ai 'rãe.
Aikoa ára nhavõ xepy'apy py ndaikuaai ajejavya.
7— Xerovaigua kuery topa heko vai va'e rami,
xerovai opu'ã va'e kuery ma ha'eve'ỹa rami ikuai va'e rami topa.
8Mba'eta ojerovia e'ỹ va'e kuery ma mba'e tu oĩ oarõ aguã,
hekove ojayaa,
ha'e inhe'ẽ Nhanderuete oipe'a rã guarã?
9Ha'e kuery áry teko axy ou ramo
Nhanderuete oendu 'rã teve ojapukaia?
10Heko vai va'e nda'u oguerovy'a 'rã Ipo'akapa va'e?
Ixupe ojapukai 'rã teve oikoa ha'e javi py?
11— Xee rombo'e 'rã Nhanderuete po'akaa re,
namombe'u e'ỹi 'rã Ipo'akapa va'e reve mba'emo oĩ va'e.
12Mba'eta peẽ kuery ha'e javi pexa ae ma ha'e nunga.
Mba'e re tu ha'vy ovare e'ỹ va'e anho pejou porã?
13Ma'ẽ, po ramigua anho heko vai va'e ojopy 'rã Nhanderuete po gui,
Ipo'akapa va'e gui nhomoingo axya kuery ojopy 'rã po rami.
14Ha'e kuery ra'y kuery hetave oje'oivy teĩ kyxe pyguarã meme ikuai,
hamymino kuery voi ndojou retai 'rã ho'u va'erã.
15Ha'e kuery va'e regua hembyre va'ekue ma mba'eaxy omomba 'rã,
ha'e rã ta'yxykue ndojae'oi 'rã.
16Heko vai va'e ma yvyku'i rami 'rã omboaty prata,
oaorã guive yapo rami ojou-jouve 'rã.
17Ha'e nunga omoĩ porã teĩ heko porã va'e kuery ju 'rã onhemonde,
prata oguereko va'ekue voi ojejavy e'ỹ va'e kuery ju omboja'o 'rã okuapy.
18Heko vai va'e ngoorã ojapo va'e ma tanambi raity rami,
ha'e oguy'irã mba'ety rarõa ojapo va'e rami rive.
19Iporiau e'ỹ va'e ma mba'emo oguerekopa va'e mbyte py onheno teĩ
guexa oipe'a ju vy ndoexavei 'rã.
20Ha'e kuery re imongyjearã ou vy ipo'aka 'rã yy oxyry atã va'e rami,
pyávy ma yvytu vaikue ogueraapa 'rã.
21Kuaray oua katy gui yvytu ou va'e ogueraa ramo okanhymba 'rã.
Oipe'apa 'rã heravy oĩague gui.
22Nhanderuete po gui ojava vyvoixe teĩ
hi'áry ha'e nunga ha'e javi ombou 'rã omboaxy e'ỹ re.
23Heko vai va'e ho'a rã ojepopetepaa 'rã,
okanhy ovy ramo otuvy nhe'ẽ pavẽ 'rã imondovy — he'i.
