Jó 24

₁— Mba'e re nda'u Ipo'akapa va'e noa'angai ri joe oikuaa pota aguã ára?

Mba'e re tu oikuaa va'e kuery ndoikuaai ha'e va'e ára?

₂Mba'eta ikuai yvy markaa oguerova rive va'e,

ha'e mymba re imonda vy guymba kuery reve ae omongaru va'e.

₃Ha'e kuery oipe'a 'rã tyre'ỹ rymba mburika,

imeve'ỹ va'e gui voi oipe'a 'rã hymba vaka.

₄Ojexavai va'e kuery pe ojavy uka 'rã tape.

Ha'e kuery gui iporiaukue'i yvy re ikuai va'e onhemimba 'rã okuapy,

₅Ha'e va'e kuery ma omba'eapo aguã katy oje'oi 'rã kavaju'i tekoa e'ỹa rupigua rami,

iporiaukue'i voi yvy joja reia rupi oeka 'rã oje'oivy ho'u va'erã.

Ha'e rami vy 'rãe ojou tembi'u ojeupe ha'e gua'y kuery pe.

₆Heko vai va'e mba'ety py omono'õ 'rã mba'emo aju,

ha'e omondoro 'rã uva.

₇Ipire rei reve oaxa 'rã pytũ ao oguereko e'ỹ vy.

Onheovã aguã ndoguerekoi vy yro'y oendu.

₈Yvyty rupi inhakỹmba 'rã oky gui.

Onhemi aguã oguereko e'ỹ vy itaova rupi rive 'rã onhemi okuapy.

₉Tyre'ỹ'i kuery omboia 'rã okambua gui,

ha'e iporiaukue'i gui oipe'a 'rã oguereko'i va'ekue.

₁₀Ha'e ramo ha'e va'e kuery ipire rei va'e ikuai ao oguereko e'ỹ vy.

Karuai oendu vy ogueraa 'rã mba'emo aju ojokua pyre.

₁₁Heko vai va'e kuery roka py onhami 'rã azeite-rã,

uva oumbiri avi teĩ oendu riae 'rã oy'uxea.

₁₂Tetã rupi voi avakue ipoaẽ 'rã okuapy, ojeaipy kuery ojapukai 'rã onhe'ẽ py.

Ha'e rami teĩ ha'e nunga re Nhanderuete ndoikuaa potai merami.

₁₃— Ha'e rã heko vai va'e ma hendy va'e rovaigua ikuai,

ndoikuaai 'rã guive tape hendya katy oo va'e,

ha'e va'e rupi ndooxei guive.

₁₄Ko'ẽ rai jave jojuka rive-rive va'e opu'ã vy

ojuka 'rã iporiaukue'i ha'e ojexavai va'e.

Ha'e gui pyávy ma oo ju 'rã imonda aguã katy.

₁₅Itavy rei va'e voi oarõ 'rã pytũ'i ta maa.

Ha'e vy aipoe'i ojeupe: “Avave rei ndaxerexa kuaai 'rã”, he'i vy omo'ã 'rã ovy ngova.

₁₆Pytũ jave avakue oike 'rã joo rupi,

ha'e gui ara py ma ngoo rupi ae 'rã ikuai.

Neĩ ndoexaxevei 'rã hendy va'e.

₁₇Mba'eta ha'e kuery ma ko'ẽa pe “Manoa pytũ guigua” he'i 'rã,

ha'e rã pyávy nhomongyje reia ma ha'e kuery oexa va'ety ae oiko.

₁₈— Peẽ aipopeje: “Heko vai va'e kuery ma ogueraapaa vyvoi 'rã yxyrya py.

Yvy re ha'e kuery pegua oĩ va'e ma ayvu vaipy anho.

Ndoovei 'rã tape uvaty katy oo va'e rupi omba'eapo aguã.

₁₉Ipirua ha'e haku ma yro'y omboyku-a rami avi

manoa voi omomba 'rã ojejavy va'e kuery.

₂₀Ha'e ramo ha'e kuery re ixy ae hexarai 'rã,

ho'okue re taxo ovy'a reve okaru 'rã okuapy.

Heko vai kuery re na'ima'endu'aavei ma 'rã.

Ha'e kuery omopẽmbaa 'rã yvyra rami,

₂₁imemby va'erã e'ỹ ha'e kuery omomba rire,

ha'e imeve'ỹ va'e pe ndojapo porãi rire”, peje.

₂₂— Any! Ha'e rami 'rãgue py Nhanderuete ombaraetea rupi ombopukuve 'rã ojerovia rei va'e kuery ára.

Ha'e kuery ndaekorãvei teĩ opu'ã ju nho 'rã.

₂₃Ha'e kuery pe ha'e ome'ẽ 'rã opytu'u aguã.

Ha'e ramo ikuai atã 'rã.

Nhanderuete oma'ẽ 'rã ha'e kuery ikuaia rupi.

₂₄Ha'e kuery ma xapy'a'i 'rã omboyvatea.

Ha'e rire oaxa ju xapy'a 'rã, amboae kuery rami oipe'apaa 'rã,

mba'emo ra'yĩgue rami avi ojayaa 'rã.

₂₅Ha'e rami e'ỹ rã mava'e 'rã tu oikuaa uka xeapua,

ha'e ombovaipa xeayvua? — he'i.