Jó 23

₂— Aỹ voi ju xeayvu ta opu'ã rei va'e rami,

xepo py xepoaẽa ajoko teĩ.

₃Ai! Xee aikuaa va'e rire Nhanderuete ajou aguã!

Ha'e rami vy ajexa uka 'rãgue oikuaa pota oinya py.

₄Henonde anhemombe'u porã 'rãgue,

xejuru amonyẽ 'rãgue aikoa re xeayvu aguã.

₅Ha'e rami vy xembovai rã aikuaa 'rãgue,

aendu kuaa 'rãgue xevy ijayvu rã.

₆Opo'aka etea rupi nda'u ijayvu ete 'rãgue xevy?

Any, oikuaa pota porã'i 'rãgue xere.

₇Ha'e py ma heko porã va'e ijayvu 'rãgue hexeve,

ha'e raka'e rã peve xee aa jepe 'rãgue xemboayvu aguã gui.

₈— Ha'e rami teĩ ma'ẽ, xerenonde katy xee aa rã noĩ 'rã ha'e py.

Xerakykue katy ajevy teĩ ha'e py voi ndajoui.

₉Xeaxua katy mba'emo ojapo teĩ xee ndaexa reguai.

Xeaxua katy voi onhemi rã xee ndaexai 'rãe.

₁₀Ha'e rã ha'e ma oikuaapa xee aikoa.

Xera'anga va'e rire ouro iky'a e'ỹ va'e rami ajekuaa 'rãgue.

₁₁Mba'eta xepy ma ha'e oikoa rupi anho oiko.

Aĩ atã ixuguigua tape rupi aikoa rupi, ndajepe'ai ae.

₁₂Ojuru py ojapo uka va'e gui xee ndajepe'ai,

xepy'apy py amoĩ porã ijayvuague.

₁₃Ha'e rã ha'e ma mba'emo ojapo aguã re onhembopy'a ramo

mava'e 'rã tu ojoko?

Mba'eta ha'e ojapoxe vy ojapo 'rãe.

₁₄Ha'e rami vy ojapopa avi 'rã xerekorã re ijayvuague.

Ha'e va'e ramigua ma mbovy rei e'ỹ ojee omoĩ ojapo va'erã.

₁₅Ha'e nunga rupi xepy'a eta rei 'rã henonde.

Ha'e nunga re aikuaa pota vy akyje.

₁₆Nhanderuete ojapo xepy'a re xekangya aendu aguã rami,

Ipo'akapa va'e ae xembopy'a eta rei.

₁₇Mba'eta pytũ vaikue gui e'ỹ xekangya aendu,

pytũ reia xerova ojao'i va'e gui e'ỹ guive.