Jó 22

₂— Ha'e gui avakue nda'u mba'emo ovare 'rã ri Nhanderuete pe?

Any, oikuaapa va'e teĩ ojeupe ae ovare va'e.

₃Tyrã pa ndereko porãa teve ombovy'a 'rã Ipo'akapa va'e?

Xapy'a rei ndee rejejavy e'ỹ re reiko rã ha'e ojou porã 'rã teve?

₄Nhanderuete renonde rejererokyjea re teve nembopaga,

nderovai oikuaa potaa py?

₅Ndereko vaia ndatuvixai teve?

Rejejavya ma opa va'erã e'ỹ teve?

₆Mba'eta mba'e re'ỹ reipe'a mba'emo nderyvy gui,

ha'e iporiaukue'i gui voi reipe'a ijao.

₇Ikane'õ va'e pe ma yy nereme'ẽi oy'u aguã,

okaruxe va'e pe voi nerakãte'ỹ tembi'u re.

₈Ipo'akakueve pe rive yvy itui,

avakue yvatekueve anho 'rã ikuai ha'e py.

₉Ha'e rã imeve'ỹ va'e kuery ma ipo rei reve rembojevy,

ha'e tyre'ỹ kuery mbaraetea remomba.

₁₀Ha'e nunga rupi ae nhuã ndejokopa,

ha'e rekyjea rendu xapy'a vy renhemondyipa rei,

₁₁pytũa guive, mba'eve rexa e'ỹ teĩ.

Ha'e ramo ae yy tyguaxu va'e ndeao'i 'rã.

₁₂— Yva re yvatevea py e'ỹ teve Nhanderuete oĩ?

Ema'ẽ ha'vy jaxy-tata yva re ikuai va'e re.

Ha'e va'e ma nda'yvate ma ra'agai!

₁₃Ha'e rami teĩ aipo're: “Mba'e tu Nhanderuete oikuaa?

Ha'e nda'u oikuaa pota 'rã mba'emo re,

oexa 'rã teve pytũ ana rupi?

₁₄Mba'eta yva apy rupi ha'e oguata oikovya rupi

arai ana ojao'i 'rã

mba'emo oexa aguã rami e'ỹ”, 're.

₁₅Ha'e gui ndee nda'u reikoxe teri tape ymague rupi,

heko vai va'e kuery ikuaiaty rupi?

₁₆Ha'e va'e kuery ma oipe'apaa vyvoi raka'e hi'ára ovaẽ e'ỹ mbove.

Ha'e kuery ytarã oĩ va'ekue ma yxyry atã va'e ogueraapa.

₁₇Mba'eta Nhanderuete pe aipoe'i: “Ejepe'a ke orea gui!

Mba'e tu Ipo'akapa va'e ojapo 'rã orere?” he'i rire.

₁₈Ha'e rami teĩ ha'e kuery ro ha'e omonyẽ mba'emo porã anho.

Ha'e rã xevy pe nda'evei ae heko vai va'e kuery onhemongetaa rami aiko aguã.

₁₉Ha'e kuery opa rã heko porã va'e kuery oexa vy ovy'a 'rã.

Ha'e kuery re ojejavy e'ỹ va'e opuka 'rã.

₂₀Ha'e vy aipoe'i 'rã: “Anhetẽ, nhanderovaigua kuery omombaa ra'e,

ha'e rã mba'emo oeja va'ekue ma tata ju omomba”, he'i 'rã okuapy.

₂₁— Ha'e nunga rupi peteĩ rami ju pota ke eiko Nhanderuete reve,

revy'a nho aguã.

Ha'e ramo ndere ou 'rã iporã va'e.

₂₂Ajerure ndevy, ejapyxaka porã pota ke nembo'e rã,

ha'e ndepy'a re emoĩ ijayvua.

₂₃Mba'eta Ipo'akapa va'e pe rejeko rerova uka ramo reiko porã ju 'rã.

Xapy'a rei ndero gui mba'emo vai reipe'a ramo,

₂₄ha'e ouro rereko va'e yvy ku'i py remombo ramo,

ouro Ofir guigua rereko teĩ yakã'i rupi ita ikuai va'e mbyte rupi remombo ri ramo,

₂₅ha'e ramo Ipo'akapa va'e ae 'rã ndevygua oiko

ouro ha'e prata oiporavo pyre rami.

₂₆Mba'eta rerovy'a 'rã Ipo'akapa va'e anho,

ha'e nderova rembovy 'rã Nhanderuete-a katy.

₂₇Ixupe rejapukai ramo oendu 'rã,

ha'e ixupe ju rejapo 'rã renhemboayvuague.

₂₈Mba'emo rejapo aguã re renhembopy'a ramo oiko porã 'rã,

ha'e tape reikoa rupi omoexakãmba 'rã.

₂₉Nhomo'yvyĩ'ia rã rexa vy “Emopu'ã ju ke” 're ramo

Nhanderuete ogueraa jepe 'rã onhemo'yvyĩ'i va'ekue,

₃₀oepy 'rã ojejavy va'ekue teĩ.

Ndepo iky'a e'ỹa re oma'ẽ vy 'rã ogueraa jepe — he'i.