Jó 16

₂— Aendu riae ma ha'e ramigua.

Peẽ ha'e javive ma xembopy'a porã 'rãgue py xemoangeko rei.

₃Ndopai 'rã teve yvytu rami pendeayvua?

Mba'e tu pendu ra'e ha'e rami ete xembovai aguã?

₄Xee voi xeayvu kuaa peẽ pendeayvua rami.

Xee aiko axya rami peẽ peiko axy va'e rire

xee voi xeayvu reta kuaa 'rãgue peẽ kuery pe,

penderovai xeakã ambovava reve.

₅Xee romombaraete kuaa avi 'rãgue xeayvua py,

xejuru py romboaxya aexa uka va'e py aipe'a aguã haxy pendu va'e!

₆— Xeayvu ainy teĩ haxy aendu va'e ndoaxai 'rã.

Ha'e rami e'ỹ vy akyrirĩ teĩ mba'e nunga py 'rã tu anhenhandu porã?

₇Anhetẽ opa ma xembaraetea areko va'ekue.

Ndee Xeruete remomba ma xero pygua kuery ha'e javi.

₈Ha'e nunga aexa uka xexorĩmbaa py,

xeangaia voi xerovai opu'ã vy xembojexavai riae.

₉Ndepoxya py xemboa'ypa, xere nandea'ei vy.

Xerovai neraĩ jekyty ha'e rema'ẽ ratã xerovaigua rami.

₁₀Avakue voi xerovai oipe'a okuapy ojuru.

Ha'e rami vy xere ija'e e'ỹa rupi xepetepa,

xerovai ha'e javive ijaty okuapy.

₁₁Ojerovia e'ỹ va'e po py Nhanderuete xemboaxa,

heko vai va'e kuery po py ha'a aguã rami xeapo.

₁₂Xee aiko porã rei va'ekue ri ha'e xemopẽmba.

Xeaju'y re ojopy vy xemboa'ypa.

Xemoĩ guembiporu hu'y oa'anga aguã.

₁₃Xejoko ngu'y py,

oipyxo xepyky raxĩ re xemboaxy e'ỹ re,

ha'e ramo xepy'a upia onheẽ yvy re.

₁₄Xemboguaiague rupi ae ju xemboguai,

ha'e vy xere ou joe opu'ã va'e ramigua.

₁₅Xejee amoĩ ae ajukue voxa guigua,

ha'e yvy ku'i py aity anhemboyvate reia rupi aikoague.

₁₆Ajae'o rã xerova ma pytãmba rei,

ha'e xerexa pepi ma manoa guigua omo'ãmba,

₁₇xepo re ajojukaague noĩ,

ha'e xeky'a e'ỹa rupi anhembo'e teĩ.

₁₈— Ndee yvy, ejao'i eme xeruguy,

toĩ eme guive ajapukaia onhendu e'ỹa!

₁₉Ma'ẽ, aỹ ma voi xereko mombe'u porãvearã oĩ yva re,

yvate ma oĩ xere ojerure va'erã.

₂₀Xeirũ kuery xejojai rei okuapy ramo

Nhanderuete renonde xerexay reve tema aĩ,

₂₁arõ vy Nhanderuete pe ha'e va'e ojerure aguã avakue re,

oirũ pe avakue ra'y kuery joe ojerurea rami avi.

₂₂Mba'eta ma'etỹa oĩ reta ve'ỹa py

aa 'rã peteĩ tape rupi ndajevyvei aguã.