Jó 17

₁— Xenhe'ẽ opa ovy ma,

xe'ára voi opa avi ovy,

ha'e xerenonde oĩ va'e ma xenhono porãa aguã anho.

₂Anhetẽ porojojai rei va'e kuery xembojere rei okuapy,

xerexa py xemoangeko reia kuery anho rei aexa.

₃Ha'e gui eme'ẽ xevy mba'emo aikuaa aguã ndee xemboeko porã 'rãa.

Enhemoĩ ndee ae ha'e nunga kuaa ukaarã.

Mba'eta ndee e'ỹ vy mava'e 'rã tu ikuaa ukaarã oĩ?

₄Mba'e ha'e kuery kuraxõ remboty ma hi'arandua oĩ e'ỹ aguã.

Ha'e rami vy neremboyvatevei ma.

₅Amongue oirũ kuery imombaarã pe omboaxa ramo

ta'y kuery voi ndaexa pyxovei 'rã.

₆— Ha'e rã xee ma xemoĩa heta va'e kuery xejojai rei okuapy aguã.

Xemoingoa xerova re onyvõmbaa rei aguã.

₇Ha'e nunga rupi ae ndaxerexa pyxovei ma xeporiau rã,

ha'e xerete regua ha'e javi kuaray'ã rami ndojekuaa porãvei.

₈Heko porã va'e kuery xerexa vy onhemondyipa rei okuapy.

Ha'e rami vy ojejavy e'ỹ va'e kuery opu'ã 'rã heko vai va'e rovai.

₉Ha'e rami teĩ heko porã va'e kuery oo tema 'rã guape rupi ae,

ipo ky'a e'ỹ va'e kuery imbaraeteve 'rã oje'oivy.

₁₀Ha'e gui peẽ kuery ha'e javi pejevy, peju ju kyvõ katy.

Ha'e rami avi peẽ kuery regua peteĩve ma ndajoui 'rã hi'arandu va'e.

₁₁Xe'ára oaxa ma ovy,

anhembopy'aague voi oaxa rivepa ma,

xepy'a re aipotaa amoĩ va'ekue ha'e javi.

₁₂Xevy pe pytũ peikuaa uka ára oĩa rami rive.

Ha'e vy aipo peje: “Pytũ teri teĩ hendy va'e ovaẽ rai'i ma”, peje rive.

₁₃Ha'e rã xee ma xenhono porãa aguã py arõ xerorã,

pytũa py ae xeruparã itui.

₁₄Xenhono porãarã pe ajapukai vy “Ndee ma xeru”, ha'e.

Taxo ikuai va'e pe voi “Peẽ ma ha'i ha'e xereindy kuery”, ha'e.

₁₅Ha'e gui mba'e tu oĩ arõ aikovy aguã?

Tá, xee arõ va'e mava'e 'rã tu oikuaa?

₁₆Ha'e nunga oguejy 'rã manoa rokẽ peve

xereve yvy ku'i py apytu'u ma jave — he'i.