Jó 15

₂— Hi'arandu va'e nda'u ombovai 'rã yvytu rami rive?

Onhemonyẽ 'rã ri ty'y kuaray oua katy gui yvytu ou va'e py?

₃Ayvu mba'everã ovare'ỹ va'e py nda'u ijayvu 'rã,

ayvu nhomoingo porã va'erã py 'rãgue py?

₄Mba'eta ndee ma Nhanderuete renonde ojererokyje va'e pe “Ovare va'e'ỹ” 're,

ha'e rejapoxe nomboeteavei aguã rami.

₅Mba'eta ndereko vaia rupi ae ndeayvu,

ha'e nhombotavy va'e kuery ayvu anho rejou porãve.

₆Ndejuru guigua ae 'rã nembopaga, xee e'ỹ.

Nerembe ae ijayvu nderovai.

₇— Ndee teve ava jypy'i itui va'ekue reiko?

Yvyty ikuai e'ỹ mbove ma voi teve reiko raka'e?

₈Ndee teve rendu raka'e Nhanderuete opy'a re mba'emo omoĩ rã?

Ndere anho'i teve oĩ 'arandua?

₉Mba'e nunga tu ndee reikuaa, ore kuery roikuaa avi va'e'ỹ?

Mba'e nunga 'arandu tu ndere oĩ, ore kuery re oĩ va'e'ỹ?

₁₀Mba'eta oreregua ikuai avi tujakue'i hi'a xiĩmba va'e,

nderu gui voi tujakue'ive va'e.

₁₁Ndee teve nerembovareive ta Nhanderuete nembopy'a guaxu ukaa,

ha'e ayvu porã'i rupi ndevy oreayvua?

₁₂Mba'e re tu rejereraa uka nekuraxõ py oĩ va'e rupi rive?

Mba'e re tu rema'ẽ vaikue rei ri,

₁₃Nhanderuete rovai ndevaia rupi,

ha'e rami ete ndeayvu aguã?

₁₄Marã ramigua tu avakue, iky'a e'ỹ va'e ikuai aguã?

Marã ramigua tu kunha gui itui'i va'ekue, heko porã va'e oiko aguã?

₁₅Ma'ẽ, Nhanderuete ma ndojeroviai neĩ ojeupegua iky'a e'ỹ va'e kuery re.

Ha'e oexa rã neĩ yva re voi iky'a e'ỹ va'e noĩ.

₁₆Avakue katuve ma ojou vaipy ha'e ojeguarupy meme ikuai,

yy oy'u va'e rami mba'emo vai ojee omoĩ va'e!

₁₇— Ejapyxaka ke xeayvua re, ha'e rã rombo'e 'rã.

Mba'emo aexa va'ekue amombe'u 'rã ndevy,

₁₈hi'arandu va'e kuery omombe'u va'ekue ae,

nguu kuery gui oendu vy ndoikuaa uka e'ỹi va'ekue.

₁₉(Ha'e va'e kuery pe ae yvy ome'ẽa raka'e,

peteĩve henda rupi amboae regua kuery nda'ikuai.)

₂₀Ha'e rã heko vai va'e kuery ma ko'ẽ nhavõ 'rã ojexavai,

ikuaia ma'etỹ ijapu'a'i 'rã, nhomoingo axya kuery pegua ae.

₂₁Ha'e kuery apyxa py onhendu 'rã imongyjearã.

Mba'emo oguerekopa rei teĩ ha'e kuery re ou 'rã imbovaipaarã.

₂₂Ha'e kuery ndogueroviai pytũ vaikuea gui ojevy ju aguã,

ha'e rami 'rãgue py oarõ kyxe imombaarã rive.

₂₃Ho'u va'erã oeka oje'oivy vy “Mamo tu oĩ?” he'i 'rã okuapy.

Oikuaa porã avi pytũ aguã ára hexe ou ta maa.

₂₄Jexavaia ha'e moingo axya ma omongyjepa rei 'rã.

Ha'e kuery re ha'e nunga ipo'aka 'rãe, huvixave joe opu'ã aguã oiko katu porã va'ekue rami,

₂₅Nhanderuete rovai opo oupi rire,

Ipo'akapa va'e ombojaru rei vy.

₂₆Ha'e rami vy hexe opu'ã okuapy onhea'ã rei reve,

hu'y jokoa inhana va'e re rive ojerovia va'e rami.

₂₇Hova re ikyra anho oĩ,

ijyke kyrapa avi

₂₈teĩ tetã ivaipa va'ekue py hekoa,

oo oĩ aguã nda'eveia py,

ombovaipa pyrã py rive ikuai.

₂₉Ha'e nunga rupi ha'e kuery ndojou retai 'rã mba'emo,

mba'emo ojapo va'e noĩ arei 'rã guive,

imba'e rei-rei voi ndaetai 'rã yvy re.

₃₀Ha'e kuery ndoo jepei 'rã pytũ vaikue gui.

Tata rendy vuku-vuku overepa 'rã hoky.

Ha'e gui Nhanderuete ojuru gui oipejua rive 'rã ogueraa.

₃₁Ha'e nunga rupi ovare e'ỹ va'e re ejerovia eme, ndee ae rejekore vy,

mba'eta ovare e'ỹ va'e rive 'rã oĩ ndevy guarã.

₃₂Ha'e nunga omomba 'rã hi'ára ovaẽ e'ỹ mbove,

ha'e ramo hakã nda'ipyauvei ma 'rã.

₃₃Ha'e kuery ikuai 'rã uva aky'i oitypa pyre rami,

ha'e oliveira ipoty ho'apa va'ekue rami rive.

₃₄Mba'eta heko vai va'e kuery heta ikuai teĩ ndata'yi 'rã,

ha'e tata oapypa 'rã nhomba'e rei-rei pe'aare kuery ro.

₃₅Ha'e kuery ma mba'emo vai anho oguereko'i rire oikuavã'i 'rã teko vai,

nhombotavy aguã rive opy'a re omoĩ rire — he'i.