Jó 11

₂— Nanembovaiai 'rã ri ty'y po rami ndeayvu reta rei rã?

Ha'evea rami teve reiko ndeayvu kuaa etea py?

₃Ndeayvu reta rivea gui teve avakue okyrirĩ 'rã?

Ha'e rã ndee rejojai 'rã teve avave rei nemoxĩmbaa ju e'ỹ re?

₄Mba'eta aipo're: “Xee ma anhetẽgua meme aikuaa va'e,

ha'e nerenonde iky'a e'ỹ va'e aiko”, 're va'ekue.

₅Ai! Nhanderuete ijayvu ma va'e rire,

nderovai ojuru oipe'a va'e rire,

₆omombe'u porãve 'rãgue 'arandua ndoikuaa ukai teri va'e,

mba'eta hi'arandua ma anhetẽ va'e meme, joo rami e'ỹ-e'ỹ oikuaa uka teĩ.

Ha'e rami teĩ reikuaa pota pova'e re:

Amongue henda py Nhanderuete neĩ ndoikuaa potai rejejavya ha'e javi re.

₇— Ndee teve reikuaa 'rã Nhanderuete mba'emo oikuaa uka e'ỹ va'e?

Reikuaa pota ta teve Ipo'akapa va'e re oĩ va'e ha'e javi re?

₈Mba'eta hi'arandua ma yvatea rupi peve oo.

Mba'e tu ndee rejapo kuaa ta?

Hi'arandua ma yvykua vaikue gui ipy pukuve va'e.

Mba'e tu ndee reikuaa ta?

₉Ko yvy gui eteve voi ipukuve va'e,

ha'e ye'ẽ gui ipyve va'e.

₁₀Xapy'a rei ha'e oaxaa rupi amongue ombo'a vy

omboayvu aguã katy ogueraa ta ramo mava'e 'rã tu ojoko?

₁₁Mba'eta ha'e ma oikuaa avakue ovare e'ỹ va'e ha'e javi,

oexa pota e'ỹ re oexa ma voi 'rã heko vaia.

₁₂Ha'e gui ava hi'arandu e'ỹ va'e onhemoingo kuaa 'rã teve hi'arandu va'e?

Mburika'i yvy'ã rupigua ra'y ava ojeapo kuaa ramo mae ha'e nunga ha'eve.

₁₃— Xapy'a rei nekuraxõ rerova vy

Nhanderuete pe ndepo reupi,

₁₄xapy'a rei ndepo py rejapo vaiague mombyry remombo,

ha'e ndero gui ha'eve'ỹa ramigua reipe'a vy,

₁₅ha'e rami vy mae nderova reupi 'rã ndeky'a e'ỹ reve,

ha'e reĩ atã 'rã mba'eve nemongyjeve e'ỹ re.

₁₆Ha'e rami vy nderexarai 'rã rejexavaiague re,

ha'e nungakue re nema'endu'a teĩ yy oxyry ovy va'ekue re rami rive.

₁₇Reikoa ma kuaray mbyte jave hexakãa gui hexakãve 'rã.

Pytũ oĩa py teĩ ko'ẽa rami 'rã ndevy.

₁₈Renhenhandu porã 'rã, mba'eta oĩ ju 'rã rearõ reikovy aguã.

Ndeyvýry rupi rema'ẽ ma vy reke porã 'rã.

₁₉Renheno rejupy ramo avave rei nanemondyi 'rã.

Heta 'rã ou ndevy onhepytyvõ uka vy.

₂₀Ha'e rã heko vai va'e ma ndaexa pyxovei 'rã,

ha'e kuery onhemi aguã va'ekue ivaipa 'rã.

Ha'e kuery oarõ okuapya ma ojeapo 'rã inhe'ẽ okanhy aguã rami rive — he'i.