Jó 12

₂— Peẽ kuery anho ma nhi'ã avakue peiko,

ha'e pemano ramo ndoikovei 'rã hi'arandu va'e.

₃Ha'e rami avi xee voi peẽ rami xe'arandu va'e.

Xee ma pendegui xe'yvyĩve va'e'ỹ.

Mava'e tu ndoikuaai 'rã ha'e ramigua?

₄Ha'e gui xee ma xeirũ kuery xejojai rei va'e aiko,

Nhanderuete pe ajapukai rã xembovai teĩ.

Mba'eta heko porã ha'e ha'evea rami ikuai va'e ma ojojai rei pyrã meme ae ikuai.

₅Iporiau e'ỹ va'e kuery oikuaa rã iporiaukue'i ojou vaipy ikuai.

Ha'e rami vy ha'e kuery omoanha-anha 'rã ho'a rai'i va'e oityxe vy.

₆Porayvu e'ỹ va'e kuery ikuaia py ovy'apa rei 'rã,

Nhanderuete re ijayvu rei va'e kuery ma iporiau e'ỹ va'e meme merami.

Ha'e kuery nguueterã rami oguereko opo mbaraetea rive.

₇— Ha'e rami teĩ eporandu na aỹ mymba ikuai va'e pe.

Ha'e rã ha'e kuery nembo'e 'rã ha'e nunga re.

Guyra oveve va'e pe reporandu rã ha'e kuery oikuaa uka 'rã ndevy.

₈Ha'e rami e'ỹ vy eporandu na yvy pe,

ha'e ramo nembo'e 'rã.

Pira ye'ẽ rupigua voi omombe'u porã 'rã ndevy.

₉Mava'e nda'u ha'e va'e kuery regua ndoikuaai 'rã

Senhor opo py ha'e nunga ojapopaague?

₁₀Mba'eta opo py oguereko guemimoingo kuery ha'e javi,

avakue ha'e javive nhe'ẽ guive.

₁₁Xeapyxa py nda'u naendu kuaa potai 'rã ayvu aendu va'e,

xejuru py tembi'u heea aendua rami avi?

₁₂Tyrã pa tujakue'i re anho teve oĩ 'arandua?

Oikove puku va'ekue re anho teve oĩ mba'emo oikuaa aguã?

₁₃— Any! Nhanderuete re ae oĩ 'arandua ha'e mbaraetea.

Hexe ma oĩ nhomongeta ha'e mba'emo oikuaapa aguã.

₁₄Mba'emo ha'e oity va'ekue ma nomopu'ãavei 'rã.

Nhuã py ha'e ombo'a va'ekue avave rei ndoipe'a kuaai 'rã.

₁₅Yy ha'e ojoko ramo opa mba'e ipirupa 'rã.

Ha'e rã yy ha'e ombou ramo ombovaipa 'rã yvy.

₁₆Hexe anho oĩ mbaraetea ha'e 'arandua.

Ombotavy pyre ha'e imbotavya ma ha'e oguereko va'e meme.

₁₇Oipe'a 'rã nhomongeta va'ety kuery nhomongetaague gui,

nhomboayvua kuery voi ojapo 'rã na'inhakã porãvei aguã rami.

₁₈Ombovaipa 'rã huvixave kuery po'akaa,

ha'e omoxã uka 'rã heravy iku'a rupi.

₁₉Sacerdote kuery ma ha'e oipe'a 'rã sacerdote ikuaiague gui,

ha'e iporiau e'ỹ va'ekue ma oitypa vyvoi 'rã.

₂₀Ijayvu kuaa va'e kuery gui ha'e oipe'a 'rã ayvu,

ha'e tujakueve gui ma oipe'a 'rã hi'arandua.

₂₁Yvatekueve re omoĩ 'rã nomboeteavei aguã,

ha'e ojora 'rã imbaraete va'e kuery ku'akuaa.

₂₂Pytũ reia gui oexa uka 'rã mba'emo ndoikuaai pyre,

pytũ ana eteve voi ogueru 'rã omoexakã aguã katy.

₂₃Yvy regua kuery ha'e omboetave 'rã, ha'e gui omokanhymba ju 'rã.

Omoaĩmba 'rã, ha'e gui omboatypa ju 'rã.

₂₄Yvy regua yvatekueve gui oipe'a 'rã 'arandua,

ojapo 'rã tekoa e'ỹ rupi oguata rei aguã rami, tape rupi e'ỹ.

₂₅Ha'e ramo pytũ reia rupi ha'e kuery opovyvy 'rã oje'oivy hendy va'e ndoguerekoi vy,

ojapo 'rã oka'u va'e rami ho'a-o'a oje'oivy aguã rami.