Jó 10

₁— Xenhe'ẽ py ndarovy'avei ma xerekove.

Xeayvu 'rã ndavy'aia ha'e javi re,

xenhe'ẽ py ajexavaia aendu reve 'rã xeayvu.

₂Aipoa'e 'rã Nhanderuete pe: “Xembopagave eme.

Eikuaa uka porã ke mba'emo vai xere rejou va'e.

₃Ndee nda'u xembojexavaixe vai ri?

Mba'eta reja merami neremimoingo ndepo py ae rejapo va'ekue.

Tyrã pa heko vai va'e kuery onhembopy'aa rive rejou porãve?

₄Ndee voi teve to'o guigua nderexa va'e?

Avakue oexaa rami ae avi teve ndee voi rejoexa?

₅Imarã va'e kuery oikoa ára rami teve nde'ára voi oĩ?

Ha'e ndee reikoa ma'etỹ teve avakue oikoa ma'etỹ rami,

₆xereko vaia re reikuaa pota aguã,

ha'e ajejavya re rexa pota aguã?

₇Ndee ma reikuaa porã ojejavy va'ety e'ỹ aikoa.

Ha'e rami teĩ ndoikoi ndepo gui xereraa jepearã.

₈Ndepo py ae xemboypy ha'e xeapopa va'ekue.

Aỹ ma xemombaxe ju.

₉Nema'endu'a ke yapo gui rive xeapoague re.

Ha'e rã aỹ ta'vy yvy ku'i ju xemoingoxe?

₁₀Kamby rami e'ỹ teve renhoẽ xerekove,

ha'e kamby kekue rami rive teve xeapo?

₁₁Xepire ha'e xero'orã py xemonhemonde,

ha'e gui xekãgue ha'e xerajyrã reipopẽ va'ekue.

₁₂Xerekoverã reme'ẽ va'ekue ndeporayvua rupi,

ha'e xere repenaa rupi xerarõ va'ekue.

₁₃Ha'e nunga renhomi nekuraxõ py.

Va'eri aikuaa porã po rami renhembopy'aa.

₁₄Xapy'a rei ajejavy ramo ndee reikuaa pota 'rã.

Ha'e rami vy neremboguei 'rã xereko vaiague.

₁₅Xapy'a rei xereko vai ramo nda'evei ete 'rã xevy!

Ha'e rami avi xereko porã vy ma nda'evei avi xeakã amopu'ã aguã,

mba'eta axĩmba reve anho aexa xeporiaukuea.

₁₆Mba'eta xeakã amopu'ã ramo ndee xembo'a 'rã guary inharõ va'e rami.

Ha'e vy xerovai rexa uka ju 'rã ndepo'akapaa.

₁₇Rembou ju 'rã xerovai ijayvu va'erã,

ha'e remboeta 'rã xerovai ndevaia.

Mba'emo vai anho rembou 'rã xere opu'ã va'erã.

₁₈Mba'erã tu ha'vy xerenoẽ raka'e ha'i rye gui?

Ai! Avave xerexa e'ỹ re amano ma voi va'e rire

₁₉xee ndaikoi ma voiague rami 'rãgue aĩ,

ha'e xeryru'i py aĩa guive xereraa 'rãgue xenhono porãa aguã katy.

₂₀Mbovy'i e'ỹ teve oĩ xe'ára?

Epytu'u ke ha'vy, xereja,

xapy'a'i ri jepe xekane'õgua aguã,

₂₁ha'e xee aa e'ỹ mbove peteĩ henda ha'e gui ajevy ju e'ỹa katy,

yvy pytũa ha'e manoa'ã oĩa py,

₂₂yvy huũ reia, pytũ etea,

yvy manoa'ã ha'eve'ỹa ramigua anho oĩa,

hendy va'e eteve voi pytũa py”, he'i.