Jó 9

₂— Anhetẽ, xee voi aikuaa rã ha'e rami ae.

Ha'e rami teĩ marã rami vy 'rã tu avakue onhemboeko porã Nhanderuete renonde?

₃Mba'eta xapy'a rei hexeve avakue nhombojovake ramo

mil-kue oporandua regua neĩ peteĩve ma nombovai kuaai 'rã.

₄Ha'e ma opy'a py oikuaapa ha'e ipo'akapave va'e.

Mava'e tu hexe opu'ã reiague gui oo porã ju 'rã?

₅Ha'e ma oipe'a 'rã yvyty ikuai va'e oikuaa okuapy e'ỹ re.

Opoxya py ombovaipa 'rã.

₆Ha'e ma yvy omomyĩ vy oguerova 'rã oĩa gui,

ha'e ramo ijyta oĩ va'e oryryipa 'rã.

₇Kuaray pe ha'e ijayvu rã ndojopevei 'rã.

Omo'ã 'rã guive jaxy-tata ikuai va'e.

₈Ha'e ae'i oipyo va'ekue yva,

ha'e ye'ẽ áry rupi oguata 'rã oikovy.

₉Ha'e ma jaxy-tata apoare: Ursa, Hendy guaxu va'e,

Eixu, jaxy-tata kuaray ijapu'a'ia katy ikuai va'e guive.

₁₀Ha'e ma mba'emo tuvixa va'e oikuaapy e'ỹ apoa,

mba'emo porã omombe'u kuaapy e'ỹ guive.

₁₁Ma'ẽ, xapy'a rei xeyvy'iry rupi ha'e oaxa rã xee ndaexai 'rã.

Xerenonde rupi ete oiko teĩ xee ndaikuaai 'rã.

₁₂Mba'emo ha'e oipe'a ta ramo mava'e tu ojoko 'rã?

Mava'e tu aipoe'i 'rã ixupe: “Mba'e tu rejapo?”

₁₃— Nhanderuete ma nomboaxa rivei 'rã opoxya.

Ha'e ramo henonde rupi ojero'a 'rã okuapy Egito pygua pytyvõa kuery.

₁₄Ha'e ramo mba'exa tu xee ambovai ta?

Mba'exa tu aikuaa 'rã xeayvurã, hexeve ajogueroayvu aguã?

₁₅Xee xereko porã va'e rire teĩ ixupe ma ndaxeayvu kuaai 'rãgue.

Ha'e rami 'rãgue py xemboayvuarã pe ajerure 'rãgue xemboaxy aguã re.

₁₆Hery rupi ajapukai rã ombovai teĩ

xee aikuaa rã noendui 'rã ajerurea.

₁₇Mba'eta xemou'ũ yvytu atã va'e py,

ha'e mba'e re'ỹ xemoingo axyve tema.

₁₈Ha'e ndoejai xepytuẽ aguã rive.

Ha'e rami 'rãgue py xere ombou xereko axyarã.

₁₉Xapy'a rei ipo'akaa re aikuaa potaxe ramo ma ha'e aipoe'i 'rã: “Apy ma aĩ.”

Ha'e gui anhemboeko porãxe ri ramo “Mava'e tu xerenoĩ?” he'i 'rã.

₂₀Xee ma heko porã va'e aiko va'e rire teĩ xeayvu py ae rive 'rãgue aexa uka xereko vaia.

Anhetẽ rupi xepy'a teĩ ae ma ha'e xekuaa 'rã otekoavy va'e rami.

₂₁— Ha'e rami avi xee ma anhetẽ rupi xepy'a va'e, xenhe'ẽ py ndajeayvuveikue py aiko,

neĩ xerekove re ae ma voi napenai.

₂₂Xevy pe ma opa mba'e peteĩ'i rami meme merami.

Ha'e rami vy aipoa'e: “Ha'e ma joo rami 'rã omomba anhetẽ rupi ipy'a va'e ha'e heko vai va'e”, ha'e.

₂₃Mba'emo vai jojuka xapy'a ramo

ha'e ojojai 'rã ojejavy e'ỹ va'e ojexavai rã.

₂₄Heko vai va'e kuery po py omboaxaa ma yvy

teĩ Nhanderuete omo'ã joguerekoa kuery rova.

Ha'e'ỹ ri ha'e nunga moingoa oiko ramo mava'e tu omoingo?

₂₅— Xe'ára aikoa ma onha va'e gui oaxa pojavave.

Oaxa vyvoi, ha'e rã ndaexai xembovy'aarã va'ekue.

₂₆Oaxa pojava ovy kanoã jai rogue gui ojapo pyre rami,

ha'e taguato vixo'i re oguejy xapy'a va'e rami.

₂₇Xapy'a rei xee aipoa'e 'rã: “Xee xerexarai 'rã ajexavaia re,

ajepe'a 'rã xeporiaua gui, ha'e vy avy'a 'rã”, ha'e.

₂₈Ha'e rami va'e rire teĩ haxy aendu va'e xemongyje teri 'rãgue,

mba'eta aikuaa porã ndee xekuaa 'rã heko porã va'e rami e'ỹ.

₂₉Ha'e rami vy xembopaga 'rãe.

Ha'e ramo mba'erã tu anhea'ãve ta?

₃₀Xapy'a rei yro'y rykukue py ajau,

ha'e kavõ py xepo aiky'a'o

₃₁teĩ ndee yapo py ju 'rã xemombo.

Ha'e ramo xeao ae voi ojapo 'rã xegui ojeguarua aguã rami.

₃₂Mba'eta Nhanderuete ma xee ramigua ava e'ỹ oiko.

Ha'e rami e'ỹ va'e rire xee ambovai 'rãgue oremboayvu aguã katy rojoguerua rupi ma voi.

₃₃Ndoikoi orembyte

ore mokoĩve re opo omoĩ va'erã.

₃₄Xe'áry rupi gui yvyra po'i'i ha'e oipe'a,

ha'e naxemongyjevei ma va'e rire

₃₅ha'eve 'rãgue akyje e'ỹ re xeayvu aguã.

Ha'e rami e'ỹ rã nda'evei xevy.