Tito 2

₁Naraha Tito, tiana madirra mari ticanabaqquizapa Deocca marinarra parrirenissa taniccama pouadeni mari ticanabaqquirro. ₂Rradauideni arrama quenauiuarrine mari ticanabaqquirro. Mouaraza madimanana. Naui madirra ouahadeni madierideni qqui toquenazapa: —Rrehe, poccadeni uima bica tani −quenauiuarrine. Bodideni uatome-manauissa taza uima bicanira tocatterrizade nauatoqquiri nauiuarrine. Pina arri Deocca uimassa narrarora icatterrizemananiuarrine. Rradauidenipa Zesoza rrehe quenauissa tauiuarrine. Deocca touati uanehema bazimaza uatideni uanaqquiri nauiuarrine. Uima ocassera tanicca naqui mouaraza inauanemana-zanaponiuarrine. ₃Narrarossa narraro amonerre rradanideni naqui mari ticanabaqquirri. Deo noppine cappinemaneza madimananissa taniuarrine. Madirra pouama inauaidiremanauiuarrine uima ponima uati uati nanarizemana nerreraniuarrine. Zeze coma tanicca naqui touini quene-rreraniuarrine. Ponidenicca madieza uima bicani auato inanemananiuarrinena bica tarraro. ₄Rrehe, amonerre imani rroconi toquerrenaporrarope arrirraro uimaza zotodedeni mari icanabaqquimananiuarrine bica tani. Ponidenicca maqquiza, ponidenicca erredeniza naqui uatinideni uanaqquiri neza inamadibaqquimanauissa tauiuarrine. ₅Bodinideni uatome-mananissa teza uima bicani tocatterrizade tocauatteraniuarrine. Maqquiderre ouaha toui quena-rreraniuarrine. Uima bica terreraniccatoui bodinideni uauatome-mana nerreraniuarrine. Ponidenicca oza bica taniuarrine cacauadera tocauatteraniuarrine. Ponideni attinideni bica teza ponideni tassani acco acco ihicanariza-baqquimana naniuarrine. Ponidenicca maqqui attideniza naqui iboraqquiri naniuarrine. Rrehe, narraro uima tocauatterezape madirra ouaha ponidenicca madie qqui toquenaza: —Deo Attipe uaidira tani −quenauiuarrine ssamo tani.

₆Rrehe Tito, narrarossa narraro zabissodeni naco bodideni uatome-manauissa tauiuarrine mari ticanabaqquirro, arri uima bicanira tocatterrizade tocauatterauiuarrine. ₇Tito, tia naqui timadinissa tarri, ticca madie pouadeniza auato taniuarrine. Naui zabissodeni ticca madie qqui toquenazapa: —Ia naqui nema inana −quenauiuarrine. Mari ticanabaqquiza naco maizehe rrirehe, rrizehe rrirehe, parrissehera Deo Atti ponira mari ticanabaqquirro. ₈Ticca marinarra bica teza tinaparrirenissa tarri. Naui ticca marinarraza: —Bica terrerani, parrirenissa terrerani −quena-rrarauiuarrine. Nazapa madirra ticca marinarraza nacasseraqquiri narrarideni tiaza uima inanemananiuarrineraha pouadenipa cappinemanauitoui. Tetti parrirenissa tezape iaza uima inanemananiuarrine ssamomo tauitoui.

₉Nazama arra madirracca zozosse mamadimaneri narrarideni naco arrama quenana: Pouadeni zossede attideniza iboraqquiri nauiuarrine. Uatizehema zepedeni ihirrimana nauiuarrine. Pouadeni zossede attiza naco tossonizimemana-rrarauiuarrine. ₁₀Botimana-rrarana. Maizemana-rraraza pouadeni zossede atti inaparriremananissa tana. Naui poccadeni madie qqui toquenazapa: —Ia Tonassiuauade Deocca marinarra bica tani −quenauiuarrine.

₁₁Rrehe, Deo madirraza uati cauanari canaui auato inanarraro. Narraroza madirra bazima tocassiuauerauiuarrine parrireni. ₁₂Deo iaza uati cauanari canarraricca uimape ia mari canarraro, arri ibodicca uimasiri ineboniuarrine, arrirraro namicca uima touini inarraro ineboniuarrine. Arrirraro namiza imadiza icca madie bica taniuarrine naqui ia mari canarraro. Ibodi uatomanissa teza uima bicanira tocatterrizade icauattera, icca uima Deoza parrirenissa taniuarrine icauattera, Deo Poua touira damera inaniuarrine icauattera narraroparri. ₁₃Rrehe, Deocca touati uanehema imadizape Zeso Cristo ccanipomauicca uadatoui imadirraro. Arra icca Deo bicabote ia Tonassiuauade Zeso Cristo ccanipomazapa poua zibehinema pocca deni torrehema auato taha ccanipomauitoui. Narraro parrissa torrezape etizenitoui. ₁₄Zesopa itoui uati uana taza poua ccaccorarrari. Uaidirehe bazima inanarizehe imadiporaha ia todinibaqquiuiuarrine zoqquerrari. Pocca iquerrenani orrari naniuarrine ia tonauissobaqquirrariparra. Pocca iquerrenarrarope uima bicani tonanade dameraqquiri inaniuarrine.

₁₅Rrehe Tito, arri uima bazima orrine dozo onarraroza mari ticanabaqquirro. Pina arri Deo Attissa inanemananiuarrine tinauatizebaqquirro. Arri Deo Attissa inanemana-rrerezape tetti dacorehema uati ticanabaqquirro. Pouadeniza: —Narraro uimape bica terrerani −tana. Madirra tia arrimani inanemana-rrerana. Nama quena-rrarauiuarrine ticappinarrereza daco tirrirarri.