Tito 1

₁Nirra Tito? Ouape Paoro. Ouape Deocca zozosse orrani. Bedi Zeso Cristocca zozosse orrarraro. Zeso Cristopa oua cazosserraria arri poua tauimari ouacomera-rizezape pouaza rrehe quenauiuarrine. Deopa taide nauato taporraria arra madirra icatterriza-baqquirrariparra. Narrarideni Deo pocca parrissehe tocauatterauiuarrine pouadeni mari ocanabaqquiuiuarrine oua cazosserrari. Rrehe, Deocca parrissehepe Deo Pouaza imadinissa taniuarrine ia mari tocanabaqquirraro. ₂Pocca parrissehe icauatterezape camittehe rriquerreranicca icarriniuarrine touini imadirraro. Deopa maizera taui. Narraro uima torraniuarrinepe maittaccazama Deo uati taporrari. ₃Rrehe, narraro uima zati bicanipe rridapana Deo inanarroraporrarocca uada bacco teza iaza auato inanarraroparri. Narraro Poua tauimari mari ocanabaqquiuiuarrine ia Tonassiuauade Deo oua zosse narizarrariparra. —Ouatti tecomerarizarri −narrariparra ouaza. ₄Tito, tiaza occa uima dozo onarraro. Arri oua titezerre: —Parrissa Zeso Cristopa ia Tonassiuauade −inezape tiape pina occa erredenissa tarraro. Icca Abi Deo, ia Tonassiuauade Zeso Cristo tezerre tiaza uima bicani inanemanana. Tibodiza naqui poccadeni rronehe torrana, onarraro.

₅Rrehe Tito, arri passo nocconiza zama uittacossarraro oninipe Creta, iape naniza Deo Atti torrarizaniuarrine izepe irrirrarode. Narraro uima rriquerrereraha ouape occarrarode. Nani Cretaza tia oneborrarope tiana narraro uima tinarricaniuarrine, arra Zesoza rrehe quenarrarideni cacauadedeni ticatterrizabaqquiuiuarrine tia mari ocanarrarode. Cretauarricca oza onihi onihi narizarrarocca arra Zeso Cristoza quequeriqqui-rizemana nauiuarricca cacauade toquerrenauiuarrine ticatterrizarizarro, onarrarode. ₆Nazama Zesoza rrehe quenarrarideni cacauade torrauiuarrinepa bica tarrarira ticatterrizarro. Naui madirra ouaha attideni pouaza: —Pocca uima uaidira tani −quena-rrarauiuarrine. Amonerre orrarini carrirrarina ticatterrizarro. Arra madirra poua bedideni Zesoza rrehe quenarrarira ticatterrizarro. Madirra ouahadeni poua bedideniza: —Pouama madimanarrari, iboqquiri naui –quena-rrarauiuarrine. Arra madirra bedideni madimanauissa tarrarira ticatterrizarro. ₇Nazama Zesoza rrehe quenarrarideni cacauade torrauiuarrinepa madiuissa tarrarina ticatterrizarro. Naui Deocca uimaza zepe irriuissa tauiuarrine. Arra madirra poua deni totonana narraripa poua. Uadi tarrari naco poua. Zeze coma tanicca touini narrari naco poua. Poua tessecca narrizo tarrari naco poua. Maizeheza ziniro cacarri narrari naco poua. Tozepetarritoui mamaiza narrari naco poua. ₈Nazama arra Zesoza rrehe quenarrarideni cacauade ticatterrizarraripa madirra ouaha pocca ozaza bacco narronazapa: —Nirra, bica tinaqui? Tipemiqui? −nauina bica taui. Pouapa uima bica taniccaza uauatize nazana bica tarrari. Poua bodi uatomauissa taza uima bicanira tocatterrizade nauato tarrarina bica tarrari. Pouapa uimari borocco, Deoza uati uana, Deoza damera, uimasiri inane-rreraniuarrine poua cacauauissa tarrarina bica tarrari. Madirra nama narrarina Zesoza rrehe quenarrarideni cacauade torrauiuarrine ticatterrizarro, onarraro. ₉Nazama Zesoza rrehe quenarrarideni cacauade torrauiuarrinepa arra Zeso tauimari parrissehecca poua mari icanemanaporrariza damera tarrarina bica taui. Naui pouarrine pocca marinarra Deo Atti parrirenissa tezape pocca mamari tabaqquicca rrehenirri todacorani naniuarrine. Naui pocca marinarra ettarromanarrarodeni naco pocca marinarraza: —Rrehe, parrissa −quenauiuarrine.

₁₀Rrehe Tito, Zeso tauimari parrissehecca maride damera tauiuarrine toui onarrarope naui tiaza quequeriqqui narrarideni motapa Zeso tauimariza touibomanaui uapi taui. Pouadenipa uima ponimaccara uati uati totoquena nazapa madirra ihicamaiza-baqquimana narrari. Narraridenipa zodeodeni mota Zesoza rrehe quenaraha poccadeni marinarra arra zopori cotani eteroni uissinarra carrimanauirrinecca nebomana-rrararrari. ₁₁Narraridenipa denima mari quena-rrarauiuarrine zamarrima tinanabaqquirro. Arrana, poccadeni marinarrarrinepe madirra ouaha ouaha poccadeni ozacca madirrama ssamoni auemanaui. Poccadeni marinarra uaidira taraha narraroza ziniro cacarrimana narrari. ₁₂Arrina, maittaccazamacca uima pouadeni tauimarissa narraro Cretadenicca madirra orraria uima nauatorride rabote uati taporraripa: —Occa madirra Cretadenipa maizarridede raui. Pouadeni tessecca naco uadiqquiri naui. Pina bani uadi tarrarissa quenaui. Tarabaieraqquiri naraha rriparridede raui −naui nade. ₁₃Rrehe Tito, poua attipa parrissa. Nezape ticca madirraza tetti dacorehema uati ticanabaqquirro: —Parri, marinarra maizehecca maridedeni carri taui. Tiadeni tocamaizabaqquiuiuarrine touini quenarrari. Zeso tauimari parrisseheccazara rrehe tiquenarri −tana, onarraro. Daco tirrirarri. Tetti mittemanazapa poccadeni rrehenirri todacorapomaniuarrine. ₁₄Nazapa zodeodenicca uima ponimacca nebomanauiuarrine. Zeso tauimari parrissehecca ettarromanarraro attideni naco nebomanauiuarrine. ₁₅Arrirraro uimape nauatoqquiri inani. Narraria arra madirra Deorrine bodideni uissoqquiri narraridenizapa bazima oppinera taui. Pina rripemanauicca, pina dama quenauicca, pina qqui toquenauicca uapima bodideni uissoqquiri narraridenizapa bica taui. Naraha arra Zesoza rrehe quena-rrararraridenipa bodideni uaidiraqquiri nazapa pouadeniza bica tauicca noueraui. Bazima pouadeniza oppina taui. Pouadeni bodicca uaidireherrine uima bicanira icatterrizemananiuarrine ssamoqquiri narrari. Bodideni uima bicanitoui uauatome-mana narrararrari. ₁₆Pouadeni attipa: —Deoza rrehe inani −quequenanaraha poccadeni madieza pouadenirrine uima auato tani: Deoza rrehe quena-rraraui. Pouadenipa Deoza touarrari naziqquiri naui. Deo Poua Attiza naco iboqquiri naui. Pouadenipa uima bicani inanemananiuarrine ssamoqquiri narrari.