Tito 3

₁Ticca mamari tabaqqui bodideni uatome-manauiuarrine pouadeniza uati tinarri, arra tamine attideniza, zama cacauade attideniza naco iboraqquiri nauiuarrine. Poccadeni zama cacauadedenicca marinarrassa inanemananiuarrine, uima bicaniza zepedeni irrimanauiuarrine zosse zosse iquenaza naco: —Rrehe, acco canade nacassaqquiri inani −quenauiuarrine mari ticanabaqquirro. ₂Ticca mamari tabaqqui naco madirraza tatamasso quena-rrarana. Rroneqquiri nana, pina arrauarri uati arrauarri uati quena-rrarauiuarrine. Bicaqquiri naza attideni bica tauiuarrine. Bodidenipa: —Ouape deni orrarrerani −quenaza naco madirra bazima accode iboraqquiri nauiuarrine, onarraro.

₃Ia naqui taidepe ponima imadirizaccade. Deoza ssamoqquiri, iboqquiri inaccade. Arri ia touini inanicca zozosse iquerrenarrarossa inaccade. —Rrehe, uima nema narrarona bica tani −ihinanariza naccade. Uaidiraqquiri inaccade. Itesse zepetarri acconi uadiqquiri ihinanaccade. Arri ia bazima naqui arrauarri nacassera arrauarri nacassera inarizaccade. ₄Naraha arra ia Tonassiuauade Deo Pouana madirra bazimaza uati uanarride razapa pocca biquehe, pocca touati uanehe zama bazimacca madirraza auato inanarizarraroparri. ₅Deopa ia tonassiuauabaqquirrari. Naraha narrarope ia bica inanarrarorrine rrerani, Deona itoui uati uana tarrarirrine. Ia tonassiuauabaqquiuiuarrine Pouana ibodi inauissoza ibodi zati torrezape Deo Corimerrine madie zati icarrirraro. ₆Deopa Poua Bedi Zeso Cristoza Poua Corime da inaza manaco Zeso Cristo ia Tonassiuauadena iaza da inarizarrariparra. Deo iaza accora taza Poua Corime namanaha iaza inanarizarrariparra. ₇Deo nama narraripa iaza uati cauanari canarrarirrine. Iape bicaqquiri inerreraraha icca uimasiri manaconi iaza torra-rreraniuarrine ia todinibaqquirrari. Nazama arri pocca camittehe rriquerreranicca touini imadirrarope iaza inanarrorarraroparri.

₈Nazama Tito, arri tiaza uima dozo onarrarope parrissa. Arrirraro uimaza Deoza rrehe quenarrarideni maride damera tinarri, onarraro. Naui uima bicaniza zepedeni irririzemanaza madirra naco acco icanarizabaqqui-manauiuarrine. Narraro uimape bica tani. Narraro uimazana madirra bazima tobicarizemanauiuarrine. ₉Naraha uima ponimacca nebomanana. Ididenicca uima rradani naqui uati nimanimana-rrarana Narraro naqui uima ponimacca. Moizecca marinarraza rrehe canire-rraraza uadi uadi cacana narrari naco nebomanana. Narraro uima ponimaccape bica terrerani. Narrarozapa madirra tobiquemana-rrarauitoui.

₁₀Ticca mamari tabaqqui orrariarrine Zeso Cristoza quequeriqquimana narrarideni torraribaqquimanabote nazapa pouaza uati tinarri, pocca uima nebouiuarrine. Mitta-rrarazapa pouaza uati timanipomarri. Naraha mitta-rrarazapa poua tinebomanarro, tiadeniza qquezimapoma-rrarauiuarrine. ₁₁Madirra namarriderauipa poua atti uaidira tanicca uatide nebo-rrarazapa nauatoqquiri tiquenani: bodi uaidira tarrari. Pouapa uimasiri inanarrarorrine poua uauattarro torrarrariparra.

₁₂Nazama oua naqui niza zazarradezape otesse Artema uitide, otesse Tiquico uitide tiauarri zosse onauitoui. Naui tiauarri bacco tazapa manaco tiape oza panani Nicoporiuarri oua qquide ticcarronaniuarrine damera tinarri. Niza zazarradezape naniza omadinitoui. ₁₃Nazama arra uima cacattemade Sena, poua tesse Aporo tezerre naco poccadeni bobodeza cappiremana-rrarauiuarrine acco ticanabaqquirro, onarraro. ₁₄Icca mamari tabaqqui naco uima bicani inanarizemananiuarrine tocauatterana, onarraro. Madirra cappiremanaza acco canade iboraqquiri nauiuarrine tocauatterana. Nama quenazapa pouama madirizemana-rrarauiuarrine. Uima bicanizara zepedeni irrimana-zanapouiuarrine, onarraro.

₁₅Nazama Tito, arra madirra uapima ouaza madimanarraridenipa tiaza nirra quenarrari. Arra timadiniuarricca itessedeni Zesoza toquerrenarrari bazimaza naco nirra inarraro. Deo tiadeni bazimaza biquehe inanana, onarraro.

Peperri. Oua onipe Paoro.