Izarraeo potemaui pocca madirra toquerrenauiuarrine icatterrizabaqquirrari
1Cristocca madirra orrezape parrissehera uati onarraro. Omaize-rrerani. Deo Corimerrine obodi nauato teza parrissa uati onarraro. 2Obodi qquezehe omadi, obodi coma tehe omadi narraro. 3Occa madirra zodeodeni Zeso Cristoza toquerrenauiuarrine touini onezape ouara oua ouaccoreza Deocca uadie ouaza ssonarina, onabote nani. Occa madirra tocassiuauerauiuarrine Cristoza peperri oneza narrizoue rriquerreraniuarri orraniuarrine bica tani, oneraha ssamo tani. 4Occa madirra zodeodenipa idi Izarraeo potemaui. Narraridenina Deo pocca erredenissa inanabaqquirrari. Deo pocca dacorehe, poua zibehinema pouadeniza madirizarrari. Deo pouadeni tezerre rrehe canirerrari. Pocca zossenirriza madimanauiuarrine Moizeza uati tarrari. Deo Pouaza uatizemanauiuarrine naco mari icanabaqquirrari. Pouadeni tezerremacca uima bicani uapi tani uati taporrari. 5Occa madirra zodeodeni potaporraridenipa Abarahao, Izaqui, Zaca quenarrari. Narrarideni potemauidenizana Cristo-Mesia tossonarrari. Pouapa Deo. Bazima cacauade torrarrari. Pouaza etizezanaponiuarrine bica tani. Parrissa nema nana.
6Naraha Deo Poua uati taporraricca uima bicani pouadeniza inaparrirenissa terrerarraroqui? Nouerani. Uimape arrima narrarona parri: Izarraeo potemaui bazimapa parrissa Deocca madirra querrena-rraraui. Motana Deo pocca madirra. 7Abarahao potemaui uapima naco pocca erredeni parrissehecca querrena-rraraui. Motana pocca erredeni parrissehecca querrenarrari. Deopa Abarahaoza uati taporrari: —Ticca erredeni Izaqui potemauizana: “Tia tipotemani” onanitoui −narrari Deo. 8Narraro uima imittarrarope: Abarahao potemaui bazimapa Deocca madirra toquerrena-rraraui. Arra Deo uati taza tossonarrari potemauizana: —Occa madirra −narrari. 9Arra Deo Abarahaoza uati taporraripa arrama narrari: —Uarrano ouahaza occarronapomazana ticca amonerre Sara erredeni carrinitoui −naporrari.
10Nazapa Saracca erredeni Izaqui pocca amonerre Rrebeca icarriza inarriuezape izoniza erredeni papamade carrirraro. Imehidenipa icca idi Izaqui poua orrariui. 11-12Erredeni papamade tocatorra-rraraccazapa uima bicani inanemana-rreraccani, uima uaidira tanicca naqui inanemana-rreraccani naraha Deopa pouadeni tezerremacca uima Rrebecaza uati taporrari: —Taidecca tossonarraripa zotodeccarrinena zozosse torrauitoui −naporrari. Deo Poua nacassa tauicca inanarizaniuarrine madirra icatterrizabaqquirrari. Touideni uaua narraripa madirra pouadeni inanemanarrarorrine rrerani. 13Deo Atti dozo nanizape arrima narraro: —Ouape Zacaza ouati uana tarraro. Esaopa ouattarrorrari −naui nade Deo.
14Narraro uima imittezape ibodiza nerrecoma inani? Deo pocca tocatterrizanirri parrirenissa terrerani inaniuarrinequi? Nouerani! Deorrine parrirenissa tani. 15Deopa Moizeza uati tarrari: —Oua madirra ocatterriza-baqquirraridenizana occa acco canehe onanarizanitoui. Narraridenizana ouati uana tanitoui −narrari. 16Deo iaza uati uana tarraripa ia touini inarrarorrine rrerani, izepe irrinissa tarrarorrine rrerani. Deo Poua uati uana tarrarirrine. 17Pina zama Ezitocca tamine icatterrizarraricca uimassa narraro. Deo Atti dozo naporraroza uima anirraro. Deopa tamineza arrama naporrari: —Tiaza ossonariza occa dacorehe auato onananiuarrine tia tamine onanarraro. Nema onarrarope zama bazimaza otauimari mittarizemanauiuarrine −naui nade. 18Narraro uimazape iaza auato tani: Deo Poua nacassa taza madirraza: —Occa −nazapa narrarizana uati uana tarrari. Naraha Deo nacassera taza madirraza: —Occa −narrarazapa Pouarrine madirra parra touiboriui zanapo taui.
19Narraro uima nauatoto tinezape arrima tiquenanitide: —Deo Poua nacassa tauicca uima madirrarrine cacarriqquimerani ssamo tezape nerrecotoui Deopa Pouaza iboqquiri narrarideniza: “Ticcadeni uima uaidira tani” nanarra narrari? −tiquenanitiderra. 20Naraha nema tiquenerrerarri. Tiadenipe madirraraha nerrecotoui Deoza tettideni nema narraro? Arrina zipape attini carri-rrereraha poni nanauatodeza: —Nerrecotoui oua tinauatoza arrima onarraro? −naniuarrinequi? 21Naraha zipa nanauatodena ssiqui napporitarraroza poua nacassa tauicca ihinauato narraro. Narraro ssiqui napporitarraroza zipa bicani inauato, zamatapa tabottouarrine inauato nanerre narraro.
22Deo naco pina zipa nanauatodessa naha Poua nacassa tauiccara ihinana narraro. Arrana Pouapa: —Madirra Ouaza iboqquiri narrarideniza occa uadie onassonarina, nani occa dacorehe auato onananiuarrine −narrari. Narrarideni nanarrizo toquerrena-zanapouiuarrine inanarrorabaqquirrari. Deopa nama nauiuarrine nacassa taraha pouadeni inarrizobaqquiuiuarrine narroccaui. Mouaraza poccadeni uimasiri inauanaccani. 23Pouapa narroccazama iaza uati canauari canaza ia tonassiuauabaqquiuiuarrine ia tonanarrora-baqquirrari. Pocca deni torrehe, pocca biquehe iaza auato inananiuarrine touini naza nema inanarraro. 24Ia motape zodeodeni iquerrenarraro, motape zodeo tiquerrena-rrerarraro bazima Deo pocca madirra iquerrenaniuarrine ia uaua tabaqquirrariparra. 25Narraroa arri Deo Atti cacomerabote Ozea dozo inaporraroza uima arrima narraroparri:
—Occa madirra querrena-rrararrarideniza: “Occa madirra” onanitoui.
Pouadeniza ouati uanera tarrarossa naporaha
pouadeniza ouati uana tanitoui.
26Nezape pouadeni madimanauiuarri pouadeniza: “Occa tiquerrena-rrerani” onaporaha
narraro zamaza pouadeniza: “Deo camitta tarraricca erredeni tiquerrenani” quequenanauitoui
−napoui nade Deo Atti Ozea dozo inarraro. 27Deo Atti cacomerabote Izaiapa Izarraeo potemaui zodeodeni tauimari uati taporrari:
—Izarraeo potemauideni touapizapa pina coriza imenicca ssiqui potera zequeriri tarraro rriquerrerarrarossa quenauitoui
naraha mota pamehema nahana tocassiuauerauitoui.
28Arra Deo Poua uati taporraricca inanabote nani.
Zama bazimacca madirraza narrizoue inanezape Pouarrine pouadeniza parrirenissa tanitoui −naui nade.
29Uati toqquimade Izaia uima dozo inaporraro naqui arrima narraro:
—Deo Dacorabote icca idideni potemaui mota ecauabaqqui-rrarazapa
iape pina oza panani Sodomacca madirra, Comorracca madirra rricarrarissa inanitouiraha −naui nade.
Zodeodenipa: —Icca marinarra ecauezape Deoza ibicaniuarrine −quenaraha
30Uima nema nezape nerrecoma inaniuarrine? Taide zodeo querrena-rrararraridenipa: —Icca uima Deoza tobicana-quenapo-rrararaha Zeso Cristoza parrissa quenazapa Deo pouadeniza: —Ticcadeni uimasiri ouaza nouerani −narrari. Nezape poccadeni uima Deoza tobicarraro. 31Naraha Izarraeo potemaui zodeodenipa poccadeni uima Deoza tobicaniuarrine Moizecca marinarra inaparriremananiuarrine dameraqquiri naraha parriremana-rraraui. 32Nerrecotoui zodeodenipa Deoza tobiquemana-rrararrari? Pouadenipa uima bicani inanemanarraroza Deoza tobiquemanauiuarrine touini quenaraha narraroza tobiquemana-rrararrari. Deoza parrissa quenauissa tarrararrari. Poccadeni uimape pina sibaza madirra ssonarimanarrarissa quenarrari. 33Narrarope Deo Atti dozo naporraroza arrima narraro:
—Ticattomama canarri! Oza panani Siouarripe siba ouattarraro.
Narraro sibape madirra inassonaribaqquiuitoui.
Narraro sibaza parrissa quenarraridenipa niza zotode ponicca mamaiza tabaqqui toquerrena-rrarauitoui
−naponi nade Deo Atti dozo naniza.
