1Ouimecotedeni, occa madirra Izarraeo potemaui zodeodeni tocassiuauerauiuarrine obodi touini onarraro. Deo inassiuauabaqquiuiuarrine Pouaza uati uati ohonanarraro. 2Ouape poccadeni uima nauato onarraro. Pouadenipa Deoza dameraqquiri naraha Deocca nauatoue parrisseheccaza bodideni uatouissa tarraraui. 3Deo Poua orrarirrarina madirracca uima inanabicaniuarrine parrireui pouadenipa ssamoqquiri narrari. Poccadeni uima Deoza bica taniuarrinepe poccadeni marinarrazara dameraqquiri narrari. Naraha Deo madirra inanabica-baqquiuiuarrinecca inazapa iboqquiri narrari. 4Moizecca marinarra bazimape Cristo inaparrirenissa tezape rricarraro. Nazapa madirra Zeso Cristoza parrissa quenarraridenicca uima Deoza tobicarraro.
5Arra madirra poccadeni uima Deoza tobicaniuarrine poccadeni marinarraza dameraqquiri narraridenicca uimape Moize dozo inaporraro: —Arrirraro marinarrassa inaneza madirraripa narraro marinarrazara madiuitoui −naui nade. 6-7Naraha icca uima Deoza tobicaniuarrinepe icca rrehenirrina parri. Pina Moizecca dozonirrissa narraro tibodideniza arrima tiquenanitide: —Nerrecorrari memeuarri toccamacossauiuarrine parrireui? Nerrecorrari nami odini uarri taniuarri rricaporrarideni madimanauiza toccaronauiuarrine parrireui? −tiquenaraha nema tiquenerrerarri. Cristotoui memeuarri rrauirramacossa-rrerani. Rricaporrarideniuarri naqui rrauirrarona-rrerani. 8Moizecca dozonirri onihipe arrima narraro: —Narraro uima tiadeniza uarrira tani. Tibodideniza ticarrimanani, uati tiquenaniuarrine terrerideniza narrorani −naui nade. Narraro uimape Zeso Cristoza parrissa ineza icca uima Deoza tobicaniuarrine. Narraroa arri mari mari ihinanarraroparri. 9Madirraza tecomeremanezape: —Zesopa oua Zozossede, occa tamine deni torrauicca −tiquenarri. Tibodideniza naqui: —Zeso uatiaraha Deo inauatonirraripa parrissa −tiquenezape ticassiuaueranitoui. 10Ibodi Zeso Cristocca uimaza parrissa inezape icca uima Deoza tobicarraro. Madirraza ecomerezape: —Zesopa oua Zozossede −inezana Deo ia tonassiuauarrari.
11Deo Atti dozo naporrarozape uima arrima narraro: —Pouaza parrissa quenarraridenipa niza zotode pocca mamaiza tabaqqui toquerrena-rrarauitoui −nani nade. 12Narraria zodeodenipa, zodeo querrena-rrararrarideni tezerre narrarissa caniqquimerarrariparra. Ia Zozossedepa poua orrarirrari, bazima Zozossededeni. Madirra pouaza uaua quenarrarideni accode nacassa tarrari. Pocca biquehe rriquerreranicca pouadeniza dade nacassa tarrari. 13Deo Atti dozo nanizape arrima narraro: —Bazima ia Zozossede oniza uaua quenazapa tocassiuauerauitoui −nani nade Deo Atti dozo naniza. 14Naraha nerrecoma quenaza pouaza uaua quenauiuarrine? Pouaza parrissa quena-rrarazapa pouaza uaua quenauiuarrine ssamoqquiri narrari. Nerrecoma quenaza pouaza parrissa quenauiuarrine? Poua tauimari mittemana-rrarazapa parrissa quenauiuarrine ssamoqquiri narrari. Naraha nerrecoma quenaza poua tauimari mittemanauiuarrine? Pouadeni maride cappiremanazapa poua tauimari mittemana-rrararrari. 15Nazapa nerrecoma naza pouadeni maride torrauiuarrine? Mamaride zossede nouerazapa maride torra-rraraui. Narraroa arri Deo Atti dozo naporrarozape arrima narraro: —Madirra uima bicani icassiuaueraniuarrinecca maride bacco nazapa uatizehe torrarizani −nani nade.
16Naraha madirra bazimapa icassiuaueraniuarrinecca uima bicaniza parrissa quena-rraraui. Pina Deo Atti cacomerabote Izaia uati tarrarissa narraro: —Oua Zozossede nerrecorrarina icca uimaza parrissa narrari? −napoui nade. 17Nazama Zeso Cristoza parrissa quenauiuarrinepa taide poua tauimari icassiuaueraniuarrinecca mittemanazana parrissa quenarrari.
18Naraha ouattipe: Izarraeo potemauidenipa narraro uima bicani mittemana-rraraco? oneraha mittemanaui. Deo Atti dozo naporrarozape arrima narraro:
—Narraro bazima zama nemaneheza mittarizemanarrari.
Zama uapima rricaqquiniuarri naqui bacco tarizarraroparri −naui nade Deo Atti.
19Nezape ouatti onihi naqui: Narraro uima Izarraeo potemauidenipa bodideniza mittemanauissa tarraraco? oneraha nauatoqquiri naui. Moizecca dozonirriza Deo Attipa:
—Izarraeo potemaui tiadenipe niza ticcadeni madirra querrena-rrararrarideniza ouati uana tani qqui tiquenezape tedimananitoui.
Madirra ouaza ssamoqquiri narrarideni ouacauabaqquiui qqui tiqueneza naqui pouadeniza tedimananitoui −naui nade.
20Deo Atti cacomerabote Izaia naco cappinera taza Deo Atti ecomerarraro:
—Madirra ouahadeni naco Otoui quena-rrararaha Ouaza bacco toquenarrari.
Otoui quena-rrararaha occa uima pouadeniza auato onanarraro −naui nade Deo.
21Izaiapa Izarraeodenicca uima onihi Deo uati taza ecomerarraro:
—Occa madirra odinibaqquiuiuarrine uarrirriraza pouadeniza uaua ohonaneraha iboqquiri naui.
Poccadeni uima nebomanauiuarrine nacasseraqquiri narrari −naui nade Deo.
