Icca madie zatipe Deo Corime ia mari tocanabaqquirrari
1Nazama Zeso Cristoza iquerrenarrarope Deo icca uimasiri manaconi iaza inassonari-rreranitoui. 2Zeso Cristoza iquerrenarrarope Deo Corimena ia zosse zosse narrari. Camittehe rriquerreranicca iaza inanezape uimasiriza imadi-rrerarraro. Zoqquehe rriquerreranicca uima naqui iaza nouerani. 3Narraro uima bicanipe Deorrinena iaza torrarraro. Moizecca marinarrarrine rrerani. Moizecca marinarrape ecauanissa taniuarrine iparrire-rrerani. Madirra iape ibodiza uaidirehe touini inehe imadirraro. Narraroza Deopa: —Uaidira tani. Narrarorrine narrizoue ticarrimananitoui −nanarra narrari. Naraha narraro uimasiri tomossiniuarrinepe Deo Poua Bedi zosse inaronarrari. Pina madirra essire icarrirrarossa naha carrizapa poua assirezana icca uimasiri manaconi Deorrine ssonarirraro. 4Deo nama nazapa pocca zossenirri bicabote inaparrirenissa tehe imadiniuarrine. Nema inaniuarrinepe ibodicca uaidirehe touini inerrereza imadirraro. Deo Corimecca zossenirrizana ibora ineza imadirraro.
5Naraha Zeso Cristoza toquerrena-rrararraridenipa bodideniza uaidirehe touini quenaha madimanarrari. Narraria arra narraro uaidirehe touira bodideni uauatome-mana narrariparra. Naraha arra Zeso Cristoza toquerrenarraridenipa Deo Corime pouadeniza madirraria arra Deo Poua nacassa tauicca uima touira bodideni uauatome-mana narrariparra. 6Naraha arra pouadeni bodicca uaidirehe toui bodideni uauatome-mana narraripa parra zoqquemanariuicca narrizoue pouadeniza torranitoui. Naraha Deo Corimerrine Deo Poua nacassa tauicca toui bodideni uauatome-mana narraripa madimana-zanapouiuarrinecca uima carrimanarrari. Rronehema madimanauissa tarrari. 7Arra pouadeni bodicca uaidirehe toui bodideni uauatome-mana narraripa Deo ihicauadimana narrari. Pocca marinarraza iboraqquiri nauiuarrinepa ssamoqquiri naui. 8Madirra pouadeni bodicca uaidireheza iboraqquiri narraridenipa Deo inauatizemanaha narraraui.
9Naraha tiadenipe tibodidenicca uaidirehe touini tiquenehe timadimana-rrerani. Parrissa Deo Corime tiadeniza madizapa Pouarrine Deo nacassa tauicca uimatouira timadimanani. Naraha madirra Cristo Corime cappirarraripa Cristocca rraraui. 10Tessiredenipe uimasirirrine tizoqquemaneraha ticorimedenina madimana-zanaponitoui. Cristo tibodideniza madirrarirrine —Tiadenipe ouaza bicaqquiri tiquenani −narrari. 11Deopa Zeso inauatonirraria Poua Corime tibodideniza madirrari. Nazapa Poua Corime tiadeniza madirrarirrine Zeso Cristo Nauatonide Pouana tessiredeniza camittehe rriquerreranicca da inarizanitoui.
12Ouimecotedeni, ia zossede icarrini. Narraripa Deo Corime. Nema nezape ibodicca uaidireheza ibora inerrerana. Narrarope icca uima rrerani. 13Uaidirehe touini tiquenaniccaza iboraqquiri tiquenezape zoqquehe rriquerreraniuarri timadimana-zanaponitoui. Naraha Deo Corimecca zossenirrizana iboraqquiri tiquenezape uaidirehe touini tiquenarrarocca tinarriquemanarraro. Nezape camittehe rriquerreraniuarri timadimana-zanaponitoui.
14Bazima Deo Corimecca zossenirriza iboraqquiri tiquenezape Deocca erredeni tiquerrenani. 15Deo Poua Corime tiadeniza inanarraripa bica tarrari. Pouarrine Deocca uadie noppineni ticappinemananiuarrine rrerani. Pina madirracca zozosse toquerrenarrarideni pouadeni zossedecca uadie noppineni cappinemanarrarissa tiquenaniuarrine rrerani. Deo Corimerrinea Deocca erredeni iquerrenarraroparri. Pouarrine naqui Deoza: —Abi −inarraro. 16Deo Corimerrinena ibodiza uima auato tarraro: Parrissa Deocca erredeni iquerrenarraro. 17Nazama Deocca erredeni iquerrenezape pocca danirri bicani iaza torranitoui. Uapima Deorrine pocca erredeni Zeso Cristoza torrarrarope iaza naqui torranitoui. Parrissa Cristo poua tezerre ocasserani ezape niza zotode pocca cacaueheza bacco ineza poua tezerre pocca deni torreheza ia naqui imadinitoui.
Deocca deni torrehe Poua zibehinema qqui inanitoui
18Oua obodi uatozape arrirraro namiza imadiza ocasserani eraha narrarope rricaca tani. Niza memeuarrina Deocca deni torrehe Poua zibehinema qqui inauitoui. Pocca deni torrehe iaza torranitoui. Narrarona iaza denima bica tarraro. 19Deo inauatorizarrari bazimaza Deocca erredeni iquerrenarraro auatoqquiri inaniuarrine ia qquidepa narroremanaui. Pocca nauatonarra bazimapa narraro qquide toui inacomemanarrari. 20Arra Deo inauatorizarrari bazimapa poccadeni biquehe onihi onihi carririzemanaporaha poccadeni uima touaidirarrarope pouadenirrine rrerani. Arra Deo Poua inauatorizarrari bazimapa Pouana inarrizorizarrari. Pouadeniza narrizoue ssonari, comehe ssonari, zoqquehe ssonari narraroparri. Naraha poccadeni uima tobicaniuarrine touini madimanarrari. 21Niza Deo pocca erredenideniza pocca deni torrehe inanarizezape zoqquehecca dacorehepe rricanitoui. Narraro deni torrehe Poua inauatorizarrarideniza naqui inanarizezape zoqquehe tappa inabaqquiuitoui. 22Nauatoqquiri inani: Deo inauatorizarrari bazimapa pina amonerre erredeni comene rroua rroua narrarossa quenaha ocasserani auarronemanarraria rridapana arrirraroparri. 23Iape Deo Corime icarriraha arrirraro namiza nauatorizarrarideni tezerre ocasserani eccani. Arri Deo Poua Corime iaza da inarrarope niza zotode uima bicani icarriniuarrine nauatoqquiri inani. Naraha narraro uima bicanitoui imadizape icca orriema imadiccarraro. Niza zotode narraro uima bicani iaza torrezape Deo Pouarrine pocca erredeni iquerrenarrarope bazimaza auato tanitoui. Pouarrine naco essire cacarriqquimerezape zati torranitoui. 24Zeso Cristoza parrissa inarrarope tossiuauehe icarrini. Nezape itezerremacca uima bicanitoui imadirraro. Narraro qqui inezape denima touini inerreranitoui. 25Naraha arri touini imadirraro qqui inerreraccazape mouaraza narrarotoui imadirraro.
26Rrehe, uima bicani touini imadizape ia acco canarraro. Narrarossa narraro ocasserani eza icca rrehenirri torraparizape Deo Corime ia acco cana taui. Deoza uatide inassamoqquiza naqui Deo Corime poua ssa naha Deoza atti rriraha icca uima uati toqquima taui. 27Deopa ibodi qqui tarizaui. Poua Corimecca uatinarra nauato tarrari. Poua Corimepa Deo Poua rripa tauicca nauato taza pocca erredeni iquerrenarraro icca uima Pouaza uati tauissa tatarra narrari.
Deocca deni torrehe icarrinitoui
28Icca madiezape uima onihi onihi narizarraro. Uima ocassera tanicca naqui iaza bacco bacco narraro. Naraha Deo Pouarrine uima bazima iaza torrarrarocca tassaqquizape iaza uima bicani torraniuarrine nauatoqquiri inarraro. Arra Pouaza uatideni uanaqquiri narrarideni bazimaza nema inananitoui. Narrarideniza uaua narrari, pina Poua bodi: —Arrima onanana −naporrarissa inanarraro. 29Deopa narrarideniza taide nauato taporrari: —Pouadenipa pina occa erredenissa onanabaqquiuitoui −naporrari. Narraria arra Deo Poua Bedipa imecotedeni bazimacca ato torrarrariparra. 30Deo Attipa: —Occa erredenissa onanabaqquiuitoui −naporraria arra pouadeniza uaua narrariparra. Deo uaua inabaqquirrari Zeso Cristoza parrissa quenazapa Deo Attipa: —Poccadeni uimasiripe rricarizani −narrariparra. Poccadeni uimasiri rricarizarrarideniza pocca deni torrehe inanarizarraro.
31Arrirraro uima imittezape: —Rrehe, uima bicani icarrini −inarraro. Deo iaza nacassa tazapa arra madirra iaza nacasseraqquiri narraridenicca uimape ponima torrarraro. 32Deopa pocca erredeni Zeso iaza eccocco-rrararrari. Icassiuaueraniuarrine eccoraza zoqquerrari. Pocca erredeni iaza da inazapa pocca biquehe onihi onihi iaza eccoccopazerre? Nouerani. Bazima iaza da inarizanitoui.
33Nerrecorrarina Deo icatterriza-baqquirrarideniza: —Ticcadeni uima bica terrerani −nauiuarrine parrirerrari? Ssamo taui. Deo Attipa: —Zeso Cristoza parrissa quenarraridenicca uimape ouaza parrirenissa tani −narrari. 34Nerrecorrarina Deo icatterriza-baqquirrarideniza: —Narrizoueuarri ocasserani auemanauitoui −nauiuarrine parrirerrari? Ssamo taui. Zeso Cristopa itoui parrissa zoqquerrari. Narrarina parrissa nauatonirrari. Toccamacossanizapa Imehi Deo uinori nauatoniuarri uittarirrari. Nauiuarri uittariza Imehiza uati uati nanarra narrari, ia touacaua-baqquiuiuarrine. 35Nerrecorrarina Cristocca touati uanehe iaza inauarriniuarrine parrirerrari? Noueraui. Cristo iaza uati uana tazapa iaza paparra narrarauitoui. Ocasserani eza naqui Cristopa itoui uati cauanari cazanaporrari. Uima narro taniccaza naco Cristopa itoui uati cauanari cazanaporrari. Nanarrizo iquerrenaza, pemi imadiza, iccororre imadiza, oppinehema imadiza naqui Cristopa itoui uati cauanari cazanaporrari. Izoqqueza naqui Cristopa iaza nama zanaporrari. 36Deo Atti dozo nanizape arrima narraro:
—Deo, ticca uimatoui dameraqquiri inezape madirra uarrirriraza ia rrara rrara quequenanaui, irricaniuarrine.
Iape pouadenirrine pina eueue bani torrauiuarrine zozoqque nauiuarri iaqquemanarrarissa inarraro
−nani nade Deo Atti dozo naniza.
37Narraro ocasserehe onihi onihi narizarraro bazima iaza ssonariraha Cristo iaza uati cauanari canazapa iana deni iquerrenarraro.
38Arrirraro uimape obodiza nauato onani: Deo iaza uati cauanari canazapa uima onihi onihi narrarorrine Deocca touati uanehe iaza inauarriniuarrine ssamo tani. Izoqqueza naqui Deocca touati uanehe iaza amossi napazerre? Deopa iaza uati uanazanapo taui. Arri imadiza naqui Deocca touati uanehe iaza amossi napazerre? Deopa iaza uati uanazanapo taui. Arra Deocca zozosse tabaqquideni naco Deocca touati uanehe iaza inauarrimananiuarrine parriremanaco? Ssamoqquiri naui. Arrirraro zamacca dacoraqquiri narrarideni naco ssamoqquiri naui. Tocorime-Tamine naco pocca zozosse tabaqquidenima ssamoqquiri naui. Rridapanacca uima naqui ssamo tani. Itezerremacca uima naqui ssamo tani. 39Memeuarri madimanarrarideni naco ssamoqquiri naui. Odi bodi uarri taniuarricca naco ssamoqquiri naui. Deo inauatorizarrari ouaha ouaha quenarrarideni naco Deocca touati uanehe iaza inauarrimananiuarrine nouerauissa taui. Ia Zozossede Zeso Cristo itoui zoqquerrarirrine Deo iaza uati cauanari canaui auato inanarraroparri.
