Rromanodeniza 14

₁Madirra Zeso Cristoza rrehe naraha pocca rrehenirri rrapari tarraro tiadeniza bacco nazapa: —Iaza tiqquezimani bica tani −tiquenarri. Naraha poua tezerre arriuarri uati arriuarri uati tiquenerrerarri. ₂Arra imecotedeni motapa: —Bani bazima, zamatapa uapima irripani bica tani −quenaraha imecote ouahadenicca rrehenirri rrapari tezape: —Bani irripani oppina taui −quenarrari. Nazapa zamatapara rrirripemana narrari. ₃Nazama bani, zamatapa bazima rripemanarraridenipa arra bani rripemana-rrararrarideniza: —Ssamoqquiri tiquenani −quena-rrarana. Bani rripemana-rrararrarideni naco pouadeni imecotedeniza: —Bani tirripemanezape ticcadeni uima bica terrerani −quena-rrarana. Tetideni rrimemana terrerarri: Deopa timecotedeni bazimaza: —Occa madirra −narrari. ₄Nazama madirra ouahacca zozosseza —Tirrine bica terrerani −tiquenaniuarrinequi? Narrarope ticcadeni uima rrerani. Pouarrine uima bica teza, bica terreraza poua zozossedena pouaza uati tauiuarrine. Narraro uimassa narraro timecotedenicca uima nattome tiquenani bica terrerani. Ia Zozossede pouana madirracca uima inanabicaniuarrine parrireui.

₅Madirra mota naco: —Iape arrirraro uadazara Deoza etizeniuarrine bica tani −quenaraha mota attidenipa: —Uada bazima narrarossa caniqquimerarraro. Uarrirriraza Deoza ehetize narraro −quenarrari. Madirra poua poua bodiza uima bica tanicca icatterrizezape narrarossa inanani bica tani. ₆Imecotedeni motapa: —Arrirraro uadape Deoza etizeniuarrine icatterrizarraro −quenarrari, Deoza bica inanemananiuarrine. Imecotedeni motapa bani, rrirripa uapima rripemanarrari. Deoza bica inanemananiuarrine nama quenazapa Deoza: —Ticca danirri bica tani −quequenanarrari. Imecotedeni motapa Deoza bica inanemananiuarrinepe zamatapara rripemanaza Deoza: —Ticca danirri bica tani −quequenanarrari.

₇Iape ia touini inanicca touira imadi-rrerani. Izoqqueniuarrine naqui ia touini inanicca rrerani. ₈Imadiccazape ia Zozossede inauatizeuiuarrine imadirraro. Izoqqueza naqui pouaza imadiniuarrine. Nema narraroa arri imadiza, izoqqueza ia Zozossedecca iquerrenarraroparri. ₉Narrarotoui Cristopa zoqquerrari. Nauatonizapa madipomarrari. Pouapa rricarrarideni, camittaqquiri narrarideni Zozossededeni torrarrari.

₁₀Nerrecotoui timecoteza: —Ticca uima uaidira tani −tiquenarraro? Nerrecotoui poua arramani tinanemanarrari? Iape uapima Deo tezerrema idomo uanitoui. Naniza icca uima bazima Pouana icattemanitoui. ₁₁Deo Atti dozo nanipe arrima narraro:

₁₃Nezape timecotedeni tezerre: —Ticca uima bica terrerani −ticanirere cana-rrerana. Arrima tiquenanina bica tani: —Ouimecote uimasiriza oneuedima-rrarauiuarrine −tiquenarri. Timecotecca rrehenirri tinassamo-rreraniuarrine tia tiara ticca madie tecauarri, onarraro. ₁₄Ouape ia Zozossede Zeso Cristocca orrarrarorrine obodiza nauato onarraro: Zamatapa, bani oppina tauicca noueraui. Naraha madirra bodi: —Arrarrari bani orripanipe Deoza oppina taui −naza rripazapa Deoza bica terrerani. Pouaza pina uimasirissa narraro. ₁₅Nazapa timecoteza oppina tauicca poua qqui taza tirripezape uarro tinanauitoui. Pouaza oppina tauicca tirriparrarope pouaza rripera tinarrarossa narraro. Cristopa timecotetoui naco zoqquerrari. Parri tirriparrarocca uimaza pocca rrehenirri tinassamorana. ₁₆Cristorrine tiaza oppinera taraha madirra ouaha attidenipa: —Tirrine bica terrerani −quenarana. Nama quena-rrarauiuarrine tia tecauarri. ₁₇Deocca cacauehepe irripanicca, ze inanicca rrerani. Pocca cacauehepe Poua Corime ia acco canaza uimasiri rrirehe imadinissa tarraro, rroneheza imadirraro, etizeri narizarrarona parri. ₁₈Zeso Cristocca zozosse iquerrenezape narrarossa inanaza imadiniuarrine. Nazana Deo iaza uatizeuitoui. Madirra naco: —Bicaqquiri tiquenani −quenauitoui.

₁₉Imecotedeni uapima icarronerara cananiuarrine, icca rrehenirri denima todacorani naniuarrine naqui dameraqquiri inana. ₂₀Deorrine timecote madiuissa tarraricca uima tirriparraroza tinassamo terrerarri. Iaza rrirripa oppina tauicca noueraui. Bazima bica taui. Naraha ia irriparraroza imecotecca rrehenirri tossamorrarona Deoza bica terrerani. ₂₁Icca uima bica taniuarrinepe imecote ineuedima-rrarazana bica tani. Pouaza bani rripauiuarrine oppina tazapa narrari bani irripa-rrerana. Zeze inocco rrano tanicca naqui ze inerrerana. Imecote ineuedimauiuarrinecca uima onihi aniza naqui narraro inana-rrerana. ₂₂Tibodiza: —Parrissa oppinera taui −tezape narraro tibodizara nauato tinarri. Deopa tibodi nauato taui. Madirra pocca uimarrine poua bodi ocassera tarrarazapa uatizehema madirrari. Pocca uima bica tani nauato tarrari. ₂₃Naraha madirrapa: —Arrarrari orripaza bica taqui? Bica terreraqui? Ssamo onani –naza rripazapa Deoza bica terrerani. Pocca rrehenirri parrirenissa terreraza Deorrine oppinera taui ssamo tarrari. Ssamo taraha nama naha rripazapa pocca uima bica terrerani. Madirra poua bodiza: —Arrima onanezape Deoza uaidira tani −naraha nama naha narraro uima inanezape uimasiri carrirrari.