Tinoridenicca tinauatize-baqquimanauiuarrine bica tani
1Imecotedeni motapa Deo rripa tauicca ssamoqquiri narrarirrine poccadeni rrehenirri rrapari tarraro. Naraha ia icca rrehenirri dacoraza pina acco icanabaqquina. Poccadeni ssamoue mouaraza inauanana. Ia ia inauatizenira orrari-rrerana. 2Ia bazima inoridenicca inauatizebaqquiuina bica tarraro. Poccadeni uima tobicaniuarrine, poccadeni rrehenirri naqui denima todacoraniuarrine dameraqquiri inana. 3Cristopa poua poua nauatizeuiuarrine bodi uato-rrararrari. Nama narraripa Deo Atti dozo naporrarocca pouaza torrarraro. Narrarope arrima narraro: —Abi, Tiaza tatamasso quenarraridenicca tamassoue ouaza naqui ssonarini −narrari. 4Maittaccazama Deo Atti dozo iquenaporrarope icauatteraniuarrine dozo iquenarraro. Narraro iaza uarirronarraro ua inezape ia acco canarraro, Deoza dameraqquiri inaniuarrine. Imitteza naqui etizerraro. Nema nezape itezerremacca uima bicani icarrinitoui nauatoqquiri inarraro. 5Deo Pouaza dameraqquiri inaniuarrine, etizeniuarrine Pouana iaza inanarraro. Pouapa tiadeni acco tocanabaqquiza timecotedeni tezerre ticarronerara canehe timadimananiuarrine. Pina Zeso Cristocca madiessa tinanemananiuarrine. 6Nema tiquenezape tiadeni uapima tirrariqquimaneza tettideni orrariqquiza ia Zozossede Zeso Cristocca Abi Deoza rriri rriri titiquena nana.
Uima bicanipe zodeo querrena-rrararrarideniza bacco tarizarraro
7Nazama Zeso Cristoza rrehe quenarrarideniza: —Itesse tiquerrenani bica tani −ticanirere canarizana, pina Cristo tiadeniza: —Ouaza tiquerrenarri −narrarissa tinanemanarri. Nema tinanemanezape Deocca deni torrehe auato tinanemananitoui. 8Tiadeniza uati onarraro. Cristo zodeodeni acco icanabaqquiuiuarrine ccarronarraripa Deo icca idideniza uati taporraricca uima inaparrirenissa taniuarrine ccarronarrari. Parrissehera uati uati narronarraria Cristorrine auato tarraroparri. 9Cristopa zodeo querrena-rrararraridenitoui naco ccarronarrari, Deocca touati uanehe qqui toquenaza Pouaza uatizemanauiuarrine. Narraro uimape Deo Atti dozo naporraroza arrima narraro:
—Zodeo querrena-rrararrarideni madimanauiuarri “Deopa bica taui” onarizanitoui.
Tia oni deni torrarraro mittemanauiuarrine naqui rriri rriri onarizanitoui −napoui nade.
10Deo Atti dozo naporraro onihi naqui:
—Zodeo tiquerrena-rrerarrarodeni Deocca madirra tezerre Deoza tetizerizemanarri −napoui nade.
11Deo Atti dozo naporraro onihipe:
—Zodeo tiquerrena-rrerarrarodeni ia Zozossedeza tetizemaneza: “Bica tinani, deni tirrani” titiquena nana.
Zama bazimacca madirradeni Pouaza uatizemanaza: “Bica tinani, deni tirrani” quenana −napoui nade.
12Deo Atti onihi Izaiarrine dozo narraro naqui:
—Nizaranibote Zese-Izahi potemaui tamine deni torrauicca torrauitoui.
Zodeo querrena-rrararrarideni ecauabaqquiuitoui.
“Pouarrine itezerremacca uima bicani torranitoui” quenauiuarrine −napoui nade Izaia.
13Itezerremacca uima bicani rrinede Deopa Pouaza parrissa tiquenarrarodeniza pocca uatizehe, pocca rronehe inanarizana. Titezerremadenicca uima bicanitoui Poua Corimecca dacorehema timadimanana, onarraro.
14Ouimecotedeni, ticcadeni uima nauato onarrarope madirra bazimaza bicaqquiri tiquenani. Deorrine nauatoqquiri tiquenarraro. Nema nezape timecote bodideni acco ticanabaqqui-manauiuarrine tiparriremanani. 15Naraha arrirraro uima teppeza tibodideni acco ocanabaqquiniuarrine uima onihi onihi dacoranicca tiadeniza dozo onarraro. Nauatoto tineraha tetideni rrimemana-rreraniuarrine. Nema onarrarope Deo ouaza uati uana taza oua cazosserrari. 16Zodeo querrena-rrararrarideniza uima bicani torraniuarrine Zeso Cristoza ozepe irrirraro. Pina poccadeni Deoza dada toqquimadessa oneza Deocca uima bicani icassiuaueraniuarrinecca mari ocanabaqquirrari. Nema onezape pouadenipa pina occa danirri Deoza da onarrarossa quenarrari. Narraro danirripe Pouaza bica tarraro. Poua Corime pouadeni inauissobaqquizapa Pouaza toquerrenauissa tarrari.
17Zeso Cristo oua acco canazapa Deo oua cazosserrariza ozepe irrinissa tarrarorrine ouatizerraro. 18Ouatizezape arrirraro uimara uati uati onarizanitoui: Cristo oua tonadacorazapa zodeo querrena-rrararrarideni Deoza iboraqquiri onanabaqquirrari. Ouatti mittemanaza, occa madie naqui qqui toquenarrarirrine Zeso Cristoza parrissa quenarrari. 19Deo Corimecca dacoreherrine ocanauatoriri canani qqui toquenaza naco parrissa quenarrari. Nema onarizezape Zeso Cristo tauimari icassiuaueraniuarrinecca oza panani Zerozarezama mari mari onarizarraroa zama Iririauarri bacco onauarranirraroparride. 20Ouape Zeso Cristo tauimari icassiuaueraniuarrinecca mittemanapo-rrararrarideni mittemanauiuarrine touini oneza pouadeni maride damera onarrarode. Nema onarrarope madirra ouaharrine Deoza rrehe quenarrari ozaza totoqueriqquimana napouiza ozepe irriniuarrine rrerani. 21Orrinepe pina Izaiarrine Deo Atti dozo naporrarossa narraro:
—Deo Poua tauimari mittemanapo-rrararraridenipa noccodeni ssire-re nauitoui.
Poua tauimari pouadeniza bacco tapo-rrereraha mittemanauitoui −napoui nade Deo Atti.
Paoropa: —Rromauarri occana −narrari
22Madirra Zeso Cristo tauimari mittemanapo-rrararrarideniza ozepe irrirrarorrine tiadeni qquide occaniuarrine tossamo-zanaporrarode. 23Uarrano uapi taha tiadeni qquide occana occana ohonanade. Naraha rridapanape arriuarricca zama bazimaza Zeso Cristo tauimari ouacomera-rizehe rricani. 24Nezape zama Espanauarri oqqueza tiadeniza ouibocossaccaniuarrine oparrirezape nema onanitoui. Naniuarri tiadeni qqui onabaqquiza ouatizezape Espanauarri occaniuarrine oua acco ticanemanana, onarraro, occa bobode parrirenissa taniuarrine. 25Naraha taidepe oza panani Zerozareuarri occaccaniuarrine. Naniuarri imecotedeniza acco canehe zorro onaniuarrine. 26Arra zama Masedoniauarricca, Acaiauarricca imecotedenipa Zerozarecca imecotedeni cappiremanaha madimanarrarideniza ziniro zosse iquenarraro. Pouadenipa cappiremanarrarideni acco canade rripaqquiri naza ziniro da inaqquimanarraro. 27Pouadeni touini quenazapa uatizemanaza nama quenarrari. Arra zodeodeni motarrine zodeo querrena-rrararrarideni Zeso Cristo tauimariza toquerrenarrari. Narraro uima bicani pouadeniza torrarraro manaconipe pina zodeodeniza dirrihe carrimanarrarissa quenarrari. Narrarorrine zodeo querrena-rrararrarideni poccadeni ziniro mota zodeodeniza da iquenarraro bica tani. 28Narraro poccadeni da naqquinarra Zerozareuarri zorro oneza bacco onezape nauicca Zeso Cristoza toquerrenarrarideniza da onanissa taniuarrine. Nezape Espanauarri occaniuarrine orroppemanitoui. Naza oqquezana tiadeni qqui onabaqquinitoui. 29Nani ticcadeni oza panani Rromaza bacco onezape Cristocca uima bicani tocassiuauerauiuarrine uatizehema sse onehe tiadeniza bacco onanitoui.
30Ouimecotedeni, ia Zozossede Zeso Cristo onima tiadeniza uati onana. Deo Corimecca touati uanehe iaza inanarraroza oua acco ticanemanarri. Otoui Deoza uati uati tiquenarri. Ticcadeni uatinarra occa uatinarra tazarrani pina irrariqquirrarossa naza Deoza uatide dameraqquiri inana. 31Zama arobeni Zodeacca rrehe quena-rrararraridenicca narrizoueza Deo oua zori tonanauiuarrine Pouaza uati uati tiquenarri. Arra Masedoniadeni, Acaiadenicca acco canehe Zerozarecca imecotedeniza da onezape uatizemanaza: —Rrehe bica tani −quenauiuarrine naqui uati uati tiquenarri. 32Nema tiquenarri onarrarope Deo nacassa taza occa uima toccanissa taniuarrine. Nezape ouatizeza tiadeniuarri bacco onaniuarrine. Tiadeni qqui onabaqquiza obodi rrassi naniuarrine naqui Deoza uati uati tiquenarri. 33Rronehe rrinede Deopa tiadeni acco tocanabaqquina, onarraro. Parrissa nema nana.
