Rromanodeniza 13

₁Arrirraro zamacca taminedeni bazimapa Deorrine zossehe carrimanarrari. Deo tamine inana-rrarazapa tamine torra-rraraui. Narrarorrine madirra bazimapa taminedeniza iboraqquiri nauiuarrine bica tani. ₂Naraha madirra taminedenicca cacaueheza uattarroqquiri narraridenipa Deocca zossenirriza naco uattarroqquiri narrari. Narrarorrine pouadeniza narrizoue ssossonari narraro. ₃Taminedenipa madirra uima bicani tonanemanarrarideni inarraborreri-baqquiuiuarrine rraraui. Madirra uima tonanemanarraridenina inarraborreri-baqquiuiuarrine. Tamine noppinedeni ticappinemana-rreraniuarrinepe uima bicanira tinanemanarri. Nema tinanemanezana ticcadeni taminepa tiadeniza: —Ticcadeni uima bica tani −nauitoui. ₄Ticcadeni taminepa Deorrine zepe irrirrari tiadeni cacauade. Naraha uaidirehe tinanemanezape ticappinemanarri. Taminepa pouama zosse zosse narrararrari. Deocca zossenirri carrizapa madirra uima inanemanarraro manaconipe pouadeniza inassonari tani. ₅Nema nezape taminedeni noppine ticappinemaneza attideniza iboraqquiri tiquenarri, nani tiadeniza Deocca narrizoue ssonari-rreraniuarrine, tibodideni bica taniuarrine. ₆Nema nezape ticcadeni zama ecauemananiuarrine taminedeni ticcadeni ziniro motatoui uati toquenazapa pouadeniza da tiquenarri. (Narraro ziniro mota cariua attizape: imposto, quenarrari.) Arri ziniro inequeriqquimanarrarope taminedenicca tarabaia torraniuarrine. Deo nacassa taza ticcadeni zama cacauade zepedeni ihirrimana narrari.

₇Madirraza dirri tiquenezape parrirenissa tanicca da tiquenarri. Tamineza ziniro mota imposto dirri tiqueneza naqui da tiquenarri. Imposto onihitoui uati toquenaza naco da taqquimanarri. Tamine noppine ticappinemaneza poua atti naqui mouaraza timittemanarri. Pouarrine uima bica teza naqui pouaza: —Rrehe, tirrine bica tani −tiquenana.

₈Madirraza dirri nani tizanapomana terrerarri. Naraha dirri orrarie ticarrimana-zanaponiuarrinepe touati uanehe, arri tinoridenicca bazimaza tetideni cauanerara canarizaniuarrine. Nema tinanemanezape Deocca zossenirri nemanehe tinaparriremananissa tarraro. ₉Deocca zossenirri Moizeza da inarraro motape arrima narraro: —Madirra ouahacca amonerre tirra terrerarri. Amonerre naqui maqquiderre amonerre carrirrari tinarra tarrararro. Madirra naco tinanazoqque tarrararro. Tiboti terrerarri. Madirra carrirraricca touini terrerarri −narraro. Deocca zossenirri mota denima uapi taraha bazima tassaqquiza orrarie torrezape arrima narraro: —Tinorideniccaza tetideni uanaqquiri narri, pina tiadeniza tetideni uanaqquiri narrarossa narri −naui nade. ₁₀Tinorideniccaza tetideni uanaqquiri nezape pouadeniza uima tinanemana-rreranitoui. Tetideni cauanerara canehe timadimanezape Deocca zossenirri nemanehe tinaparriremananissa tarraro.

₁₁Nema tiquenarri onarrarope icassiuaueraniuarrinecca uada uarrirarronani. Taide Zeso Cristoza parrissa inapozape: —Ia touaccamacossani-baqquiuiuarrinecca uada uarri taccani −inaporaha rridapanape uarrira tani. Tibodideni uatomanarri. Ticauadirrarrarossa naporaha rridapanape nocco tiquerrenarri. ₁₂Zizini rricarronani. Ssiuarrarronani. Zizinicca uimape inebona. Pina eterobote ssiti coro inarrarossa inana. Nezape ssiuarranira ezana. Pina etero zati oro izimarrarossa inana. ₁₃Rridapanape mouaraza imadina, pina madirra ssiuarraniza madimanarrarissa inana. Comani eriza-rrerana. Moua moua inariza-rrerana. Uananehe inana-rrerana. Imecca touini inarraroza imadi-rrerana. Uadieza naqui arriuarri atti arriuarri atti inerrerana. Madirra carrirrari acconi naqui edirrerana. ₁₄Arrima tiquenanina bica tani: Ia Zozossede Zeso Cristocca dacorehera oro tizimemanarri. Arri tibodideniza touini tiquenanicca uaidirehe naqui tinanemana-rreraniuarrine poni dacoco tirrirarri.