Apocaripisi 4
Memeuarri Deoza uatizemanarrari
1Arra Zeso Cristo pouaza quequeriqquimana narrarideniza uima uati taui rricani nattinipe qqui onanerre memeuarri pina totoqquezima touabarrarossa nehe qqui onarraro. Atti naco dacorarrari pina rrorro trobeta moui omittaporrarossa narraro omittapomarraro. Nazapa ouaza uati tarrari: —Arriuarri ticcamacossarri. Rridacca qqui tinarraro nattini zotode torraniuarrinecca uima tiaza noue onana −nade.
2Nezape Deo Corimecca nauatoue ouaza ssonariza qqui onanerre meme Deo zamariuarri deni torrauicca uiuittari bicabote qqui ocanarraro. Narraro uiuittariza uittari canaui qqui onarrari. 3Arra uittarirraripa ouaza auato tarrari. Pouapa zibehi tarrari. Zibehine pina siba uatini ccara tanicca zibehinissa narrari. Pina diamante zibehinissa, pina rrobi zibehinissa narrari. Poua uittariui tetepiza naqui meme rranoni porimacossani qqui onarraro. Rranonipe pina siba esemeraoda zibehinissa narraro. 4Poua uittariuiuarri qqui onezape cacauadedeni 24 quenaha rrassi taririzarrari. Zozossededenicca uiuittari bicaqquiri narraroza rrassi nauarranirrari. Poccadeni etero mopoqquiri narraro. Pouadeni tatiza tamine taticca oro nauatoni uittaririzarraro. 5Poua uittariuiza ssissiuede ssiueue canarraro, ttottorode ttororo canarraro. Mouini onihi naqui qquenarizarraro. Pocca uiuittari bicabote tazarranima rrorrororo 7 naha rrororo canarizarrari. Narrari rrorrororopa Deo Corime auatorizarrari. 6Nani pocca uiuittari bicabote tazarranimape pina ueni imehissa naraha ccara tarraro. Tocassiuerreqquimera narraro, pina siba cristaossa narraro.
Naui Poua uittariui uinoriza naco camittaqquiri narrarideni 4 quenaha uaueri nauarranirrari. Poua baccouarri, poua ideuarri, poua ppari nauatoniuarri, poua ppari ssamouarri narizemanarrari. Camittehe carrimanarrari assiredenizape noccodeni irririzarraro. Pouadeni tezerrema qquide nauatoqquiri, pouadeni nattiuarri qquide nauatoqquiri narrari. 7Narrarideni orraria taideccapa pina zomarri. Ouahapa pina boui. Ouahapa pina madirra pano. Ouahapa pina ssibiri imehibote meme toccarrarissa narrari. 8Arra 4 quenarraridenipa eppedeni 6 naha carririzemanarrari. Assiredeniza noccodeni irririzarraro. Eppedeni bodiuarri naqui noccodeni irririzarraro. Nazama pouadenipa ssiuarrabotema rrirriri, zomema rrirriri zazanapomana narrari. Pouadeni attipa:
—Ia Zozossede Deopa bicabote. Bodi ssiuarra taui, uisso taui orrariui.
Pouana dacorabote orrariui.
Pouapa nazama madiporrari. Madiuiparra naui. Niza ccarronauitoui −quequenanarrari.
9Arra deni torrauicca uiuittari bicaboteza uittari canarraripa madizanaporrari. Narrariza camittehe carrimanarraridenipa uati toquenarrari: —Ticca nauatoue deni torrani, tiaza etizerraro, iaza tirrine bica tani, inarraro −quequenanarrari. 10Narraro uati uati totoquena nazapa cacauadedeni 24 quenarrari arra Madizanaporrari tezerrema pouadeni pitoza rrassi taza Pouaza uatizemanarrari. Pouaza uatizemanaza pouadeni taticca oro nauatoni poua uittariui tezerrema ua inaqquimanarrari. Nazapa attideni arrama quenarrari:
11—Ia Zozossede icca Deo, Tiaza etizeni bica tani.
Tiana zama bazimaza carririzarraripa tinauatorizarrari.
Tia touini teza tirrine bazima nauatorizarrari.
Narrarorrine madirra bazima tiaza: “Bica tinani, deni tirrani” quenauiuarrine bica tani, inarraro −quenade.
2020 Sociedade Bíblica do Brasil
