Oza panani Saradisiocca Zeso Cristoza quequeriqquimana narrarideniza Zeso Cristo poua atti zosse inarraro
1Zeso Cristo ouaza uati zanaporrari: —Saradisiouarri otauimariza quequeriqquimana narrari cacauadeza dozo tarri −nade. —Arri ouape Deo Corime 7 naha ocarri, amouadeni 7 canaha ocarri narraro. Ouatti tiadeniza arrima onarraro: Ticcadeni uima bazima nauato onani. Madirra ouahadeni ticcadeni madie qqui toquenaza attidenipa: “Zeso Cristo tauimariza uauatizemana naui” quenaraha ouape parrissa nauato onani: Ouaza tetideni rrimemanabote nani. Pina tecotarrarossa narraro. 2Rrari, tinoccodeni ssire-rere napomarri! Titiqueriqqui nanicca uima rricabote nani. Tidacoremanani napomarri. Ticcadeni madiecca uima nauato onani: Occa Abi Deoza tizepedeni irrirrarope tirrinedeni toccanissa terrerani.
3—Nazama tiadenipe tibodideni uatome-mananissa tarri. Arri occa marinarra tiadeni mari tocanabaqquiporrarissa tinanemanapomarri. Ticcadeni uima tecarriqquimere-manapomeza Deoza tiquerrenanipomarri. Nema tiquenerrerezape tiadeni onarrizobaqquinitoui. Pina tetideni rrimama caneraha tiadeniza bobotide bacco zimarrarissa onanitoui, onarraro.
4—Naraha tiadeni Saradisioza titiqueriqqui narraro motadeni arrirraro zamacca uimasiriza toquerrenanipoma-rraraui. Poccadeni uimape pina poccadeni etero tosoue-rrerarrarossa narraro. Niza ouaza madimanazapa pouadeniza etero moponi da onarizanitoui. Bicaqquiri narrarirrine ouaza etero moponiza rrauirizauitoui. 5Occa dacorehema timadimaneza uimasiriza deni tiquerrenezape niza zotode etero moponi tezarizemananitoui. Deocca papeo camittehe carrimana-zanapouiuarrineccaza tiadeni oni dozo nani sse onarize-rreranitoui. Niza occa Abi pocca zozosse tabaqquideni tezerre baccodeniuarri tidomo ueza: “Arrarraridenipa occa madirra” onanitoui.
6—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri −nade Zeso.
Oza panani Piradeopiacca Zeso Cristoza quequeriqquimana narrarideniza Zeso Cristo poua atti zosse inarraro
7Zeso Cristo ouaza uati zanaporrari: —Piradeopiauarri otauimariza quequeriqquimana narrari cacauadeza dozo tarri −nade. —Ouape parrissa. Obodi ssiuarra, uisso tarraro. Maittaccazamacca tamine Dabicca chave ocarrini. Narraro chaveza Zerozare zaticca noccobirri ouacauarraro. Madirra Deoza memeuarri madimanauiuarrine rrehe onezape rraui torrezimauitoui. Rrehe onerrerezape rraui torrezima-rrarauitoui. 8Ouape arri bazima tizepedeni irririzemanarrarocca nauato onani. Niza Deo madiuiuarri tiadeniza: “Rraui tirrezimarri” onanitoui. Naniuarricca noccobirri tiadenizape touabani. Madirra ouaha ecossaniuarrine ssamo tani. Tiadenipe dacoco tirrira-rrereraha ouattiza iboraqquiri tiquenani. Madirrarrine nanarrizo tiquerreneza naqui oua oni tinebomana-rrerani.
9—Titouideni ouati uana tani. Niza mamaizadedeni orrine tibaccodeniuarri pouadeni pitoza rrassi tauitoui. Nama onanabaqquizapa tiadeniza ouati uana tani pouadeniza auato tanitoui. Narrari zodeodeni mota attidenipa: “Iape zodeodeni, Deocca madirra iquerrenarraro” quequenanaraha parrissapa Deoza uauadide Tocorime-Taminecca zozosse toquerrenarrari.
10—Tiadeniza uati onaporrarope: “Ocasserani temaneraha mouaraza tinauanemanana” onapode. Nazama ouatti tecauemananissa teza arra zama bazimacca madirra uima ocassera taniccaza nattome onabaqquizapa tiadeni zori onanabaqquinitoui. 11Occanibote nani. Ticcadeni uima bicanipe tecauemananissa tarri. Ouaza dameraqquiri tiquenezape Deocca danirri bicani ticarrimananitoui. Parri, ticcadeni rrehenirri madirra inassamomanerana. Deocca danirri pouadenirrine zori ticanirerana. 12Occa dacorehema timadimaneza, uimasiriza deni tiquerrenezape niza zotode occa Abi Deo madiuiuarri timadimananitoui. Orrine tiadenipe pina memeuarricca Pouaza dada toqquimacca oza pininissa tiquenaniuarrine. Nanizape rraui tirrena-rreranitoui. Occa Abi Deo oni tiadeniza dozo, Poua madiuiuarricca oza panani onini naqui dozo onarizanitoui. Narraro oza panani oninipe Zerozare zati. Narrarope occa Abi Deorrine memeuarricca namiuarri bacco naronanitoui. Oua oni zati naqui tiadeniza dozo onarizanitoui.
13—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri −nade Zeso.
Oza panani Laodiseacca Zeso Cristoza quequeriqquimana narrarideniza Zeso Cristo poua atti zosse inarraro
14Zeso Cristo ouaza uati zanaporrari: —Laodiseauarri otauimariza quequeriqquimana narrari cacauadeza dozo tarri −nade. —Ouape parrissa. Arri uati uati onarrarope parrissa qqui onarraro uimara uati uati ohonanarraro. Bazima Abi Deo inauatorizarraripa orrine torrarizarrari. Nazama ouatti tiadeniza arrima onarraro: 15Ticcadeni uima bazima tinanemanarraro nauato onani. Ouaza rrehe tiquenarrarope tinebomana-rrereraha ouaza tetizemana-rrerani naqui nauato onani. Rraho, ouazara tetizemaneri naccaraho. Tiadenipe pina bani pperrene ppocora-rrararrarissa, pina passo naui terrerarrarossa tiquenarraro. Nema naniccape ze naniuarrine ocassera tarraro. 16Pina passo naui terrerarrarossa tiquenarrarope tiadeni capiri onanitoui. Ticcadeni uima ocassera tezape tiadeni ouattarro-baqquinitoui. 17Naraha tettidenipe: “Iape uima bicani sseqquiri inani. Irrine icca uima toccanissa tani. Icappira-rrerani” titiquena neraha tibodideni uatonissa terrerani. Uima parrissehepe ssamoqquiri tiquenani. Ticcadeni uimape bica terrerani. Touati nauanaqquiri tiquenani. Ticappiremananissa tarraro. Pina madirra nocco sirissa tiquenarraro. Pina etero rriraha ccororredeni madimanarrarissa tiquenarraro.
18—Nezape tibodideni acco ocanabaqquiniuarrine tiadeniza uati onana: Arri oua ocarrirrarocca mitta tiquenarri. Nezana uima bicani ticarrimananiuarrine. Narraroa uima bicanipe pina oro zippo ppocoreza tozibehizape uatini ccara taniccassa narraro. Arri ticcororredeni noppineni ticappinemanezape etero moponi ocarrirraro mitta tiquenarri. Narraro tezemanezape ticcororredeni auato terreraniuarrine. Arra tonoccocca rremezi ocarrirraro naco mitta tiquenarro, tinoccodeni sse tiquenezape tinoccodeni ssire tarizaniuarrine, onarraro.
19—Ouape madirraza ouati uana teza uimasiri inanemanezape ouatti dacorehema pouadeniza: “Nema tiquenerrerarri” ohonanarraro. Poccadeni uima tobicaniuarrine naqui mari mari onarraro. Ouazara tetizemanarri. Ouazara dameraqquiri tiquenarri. Tibodideni cacarriqquimereza Deoza tiquerrenanipomarri. 20Ouape totoqquezimaza uaua onarraro. Madirra ouatti mittaza totoqquezima icataborrizezape pouaza oqquezimanitoui. Oqquezimezape poua tezerre irripanitoui. Poua naco ouazama rripauitoui. 21Ouape uimasiriza deni orrarrarorrine occa Abi zosse zosse nauiuarri ouittarirraro. Tiadeni naqui uimasiriza deni tiquerrenezape niza zotode oua zosse zosse onaniuarri tiadeniza: “Rrassi tinarirri” onanitoui.
22—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri −nade Zeso.
