Oza panani Epesocca Zeso Cristoza quequeriqquimana narrarideniza Zeso Cristo poua atti zosse inarraro
1Zeso Cristo ouaza uati zanaporrari: —Epesouarri otauimariza quequeriqquimana narrari cacauadeza dozo tarri −nade. —Ouape ozepe nauatoniccaza amouadeni 7 canaha ocarrirraro. Rrorrororo pinine orocca 7 naha cacaueri narizarrari qquide naqui occarizarraro, naui tarri, onarraro. 2Ticcadeni madie ouaza auato tarizarraro. Deo tiadeni tocazossebaqquirrariza tizepedeni irrimanezape dacoco tirrireza tizepedeni irrimanarraro. Otauimarizara dameraqquiri tiquenarraro. Ticcadeni uima onihi naqui nauato onani. Narrarope uaidirehe inanemanarrarodeni tettarrobaqqui-manarrari. Madirra mota maizemanaza attidenipa: “Iape Zeso Cristocca zozosse tabaqqui iquerrenani” quenaraha poccadeni uima nattome tiquenezape tirrinedeni poccadeni maizehe auato tinanemanarraro. 3Otauimari tinebomananiuarrine madirra tiadeni tonarrizo-baqquimanaraha tinebomana-rrerani. Ticcadeni uima occa marinarrassa naniuarrine rraohoraqquiri tiquenarraroparri.
4—Naraha ticcadeni uima motape nacassera onani. Taidepe ouaza tetideni uanaqquiri naza ouaza tetizemaneri naporaha zotodepe ticcadeni uatizehe arrimani torrani. 5Tibodideni uatome-manarri. Arri ouaza tetizemanaporrarocca uima tetideni rrimemana terrerarri. Tibodideni cacarriqquimera-pomarri. Ouaza tetideni uanaqquiri napomarri. Nema tiquenerrerezape naniuarri oqqueza ticcadeni rrorrororo pinine odiniuitoui. 6Naraha ticcadeni uima onihipe bica tani. Nicolaitadenicca uima uaidira taniccaza nacasseraqquiri tiquenani. Oua naqui Nicolaitadenicca uimaza nacassera onani.
7—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri, onarraro. Arri occa dacorehema timadimaneza ouaza rrehe tiquenarraro tinebomane-rrerezape niza Deocca zama bicaniuarri aua bono camittehecca tirripemananiuarrine tiadeniza da onarizauitohui −nade Zeso.
Oza panani Esmirnacca Zeso Cristoza quequeriqquimana narrarideniza Zeso Cristo poua atti zosse inarraro
8Zeso Cristo ouaza uati zanaporrari: —Esmirnauarri otauimariza quequeriqquimana narrari cacauadeza dozo tarri −nade. —Ouape taidezama omadiporraroua arri rricaqquini bacco onanitoui. Ozoqqueraha onauatonizape omadirraro. 9Arri ouape nemanehe nauato onani. Narrizoueza timadimanani nauato onani. Tozepetarri ticappiremanehe timadimanarraro naqui nauato onani. Naraha parrissa tiadenipe Deocca danirri bicabote onihi onihi nehe ticarrimanani. Tiadeniza nacasseraqquiri narrarideni tiadeni tototamasso-baqquimana narrari nauato onani. Narrarideni attidenipa: “Iape zodeodeni, Deocca madirra iquerrenarraro” quequenanaraha narrarope parrissa rrerani. Uima parrissehepe pouadenipa Tocorime-Taminecca zozosse toquerrenarrari. 10Niza otauimari acconi ocasserani temanezape ticappinemana terrerana. Tocorime-Taminerrine tiadeni mota sibera tinehe toponi cocoroza tiquerrenanitoui. Nama nauiuarrinepa tiadeni bazima tiadeni nattome tabaqquiuitoui. Uada 10 nehe pouarrine ocasserani temaneraha otauimaripe tinebomana terrerarri. Dameraqquiri tizanapomanarri. Otauimari tinebomana-rreraza tizoqquemanani bacco tiquenezape tiadeniza occa camittehe rriquerreranicca da onanitoui.
11—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri, onarraro. Arri occa dacorehema timadimaneza ouaza rrehe tiquenarraro tinebomane-rrerezape tizoqquemaneraha zoqquehe zotodeccape tinauanemana-rreranitoui, onarraro −nade Zeso.
Oza panani Peocamocca Zeso Cristoza quequeriqquimana narrarideniza Zeso Cristo poua atti zosse inarraro
12Zeso Cristo ouaza uati zanaporrari: —Peocamouarri otauimariza quequeriqquimana narrari cacauadeza dozo tarri −nade. —Ouape rrazirecca massito cauidiqquimera narraro ocarrini. 13Arri ouape ticcadeni madie nemanehe nauato onani. Timadimananiuarripe Tocorime-Taminecca uima dacoreraha oua onipe tinebomana-rrerarraro. Ouaza rrehe nauissa tarrari oni Antipas tinorideniza inanazoqque-manaraha ouaza rrehe tiquenarrarope tinebomana-rrerani. Naui tiadeniuarripa Tocorime-Tamine zosse zosse naraha oua tinebomana-rrerani.
14—Naraha ticcadeni uima motape nacassera onani. Tiadeniuarri madirra motapa maittaccazama madirrari Barahaocca marinarra nebomana-rraraui. Arra Barahaopa Izarraeodeni uimasiri inanemananiuarrine zama Moabicca tamine Baraqui inauattarrari. Pocca marinarrape arrima naporraro: Siba nauatoniza da tauicca bani Izarraeodeni rripemanauiuarrine oppinera tani. Uananehe inanemananiuarrine naqui oppinera tani, narrari.
15—Nauiza naco madirra mota Nicolaitadenicca marinarra nebomanauiuarrine touini quenarrararrari. 16Tibodideni tecarriqquimerarri, narraro uima pamehe tiadeniza noueraniuarrine. Ticcadeni uima tecarriqquimera-rrerezape tiadeniuarri occanitoui. Barahaocca, Nicolaitacca marinarra carrimanarrarideni ocauadibaqquiuitoui. Ouarrariza ouatti qquenarraro pina rrazirecca massitossa narraro pouadeniza ssonarinitoui.
17—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri, onarraro. Arri occa dacorehema timadimaneza ouaza rrehe tiquenarraro tinebomane-rrerezape tiadeniza pao oni mana memeuarri tonarrimauicca tirripemananiuarrine da onarizauitoui. Siba moponi naqui tiadeniza da onarizanitoui. Narraro sibazape tiadeni oni zati dozo nani carririzani. Narraro tiadeni onipe tiadenira nauatoqquiri tiquenarraro −nade Zeso.
Oza panani Tiatiracca Zeso Cristoza quequeriqquimana narrarideniza Zeso Cristo poua atti zosse inarraro
18Zeso Cristo ouaza uati zanaporrari: —Tiatirauarri otauimariza quequeriqquimana narrari cacauadeza dozo tarri −nade. —Ouape Deo Bedi orrani. Onoccope pina zippo rrororonissa narraro. Ouamori naqui zibehi tarraro. Pina ccarara onini bronze rriti nani tozibehirrarossa narraro. 19Uima bazima tinanemanarraro naqui nauato onani. Otoui tetideni uanaqquiri neza ouaza tetizemanani nauato onani. Ticcadeni rrehenirri dacorani nauato onani. Ouaza tizepedeni ihirrimana narraro. Narro taniccaza iboraqquiri tiquenani nauato onani. Rridapanape denima nema tizanapomanani naqui nauato onani.
20—Naraha ticcadeni uima motape nacassera onani. Narrarope amonerre Zesabeocca uima. Poni attinipe: “Ouape Deo Atti cacomerabote” neraha maizarraro. Ponicca marinarrarrine occa madirra uananeheza toquerrenarizarrari. Ponirrine siba nauatoniza da tauicca bani naco rrirripemana narrari. 21Ouape poni bodini cacarriqquimeraniuarrine touini omadi omadi zanaporaha bodini cacarriqquimeraniuarrinepe touini nerrerani. Ponicca uananehe neboniuarrine nacassera tarraro. 22-23Naraha rridapanape orrine coma tehe porinitoui. Ponicca erredeni naco onarricauitoui. Niza poni arradedeni naco bodideni cacarriqquimera-rraraza, poccadeni uimasiri nebomana-rrarazapa pouadeni naco comaqquiri naza ocasserani auemanauitoui. Nazama otauimariza quequeriqquimana narrari bazima bodideni uatome-manazapa occa uima nauatoqquiri nauiuarrine. Ouape madirra attideni nauato, bodidenicca uima nauato onarraro. Uimasiri tinanemanarraro manaconi tiadeniza onananitoui.
24—Naraha Tiatirauarricca tiadeni mota arri Zesabeocca marinarraza tiquerrene-rrerezape, arra “Tocorime-Taminecca marinarra deni torranicca auatora tani” quequenanarrariza tiquerrenerreraza naqui tiadeniza uima oppina tanicca uati onerrereraha uima orrariena uati onarraro. 25Ticcadeni uima bicani tecauemana-zanapona, occanipomaniuarri bacco tiquenaniuarrine. 26Arri occa dacorehema timadimaneza, ouaza rrehe tiquenarraro tinebomana-rrereza naqui, arri oua nacassa onanicca tizepedeni irrimanezape nema tizanapomanarraroua occanini bacco tiquenanitoui. Nezape zama onihi onihi narizarrarocca madirra zossede tiquerrenaniuarrine tiadeniza dacorehe onananitoui. 27Maittaccazama occa Abipa ouaza: “Zama nemaneheza madirizemanarraridenicca tamine tirranitoui. Pina tamine dacorabote pocca zozorro ccanarraboteza zipa ideza bararirrarossa tinanabaqquiuitoui” napode ouaza. 28Naraha cacauehe narrarossa narraro tiadeniza naqui onanarizezape zama bazima tecauarize-mananitoui. Tiadeniza uima onihi bica tanicca naqui onanarizanitoui. Madirra bazima ticcadeni deni torrehe qqui toquenauitoui. Pina ssiuarrarronanicca amoua ssiuerrene dacorarrarissa tiquenanitoui.
29—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri −nade Zeso.
