Zeso Cristorrine Zouaoza rridapanacca uima auato, niza zotodecca uima auato inanarraro
1Deona Zeso Cristoza itezerremacca uima auato inanaporraro. Manaco Zeso Cristopa pocca zozossedeniza auato inananiuarrine. Arrirraro uima iaza auato inananiuarrine Zeso Cristo pocca zozosse memeuarricca zosse inaronazapa ouaza uati tarrari. Pouarrine qqui onarraro. Ouape Zouao, Zeso Cristocca zozosse orrani. 2Arri bazima oua qqui onarrarope parrissa uati onarraro. Arri dozo onarrarope parrissa Deo Atti Zeso Cristorrine ouaza auato inanarraro.
3Arrirraro uima Deorrine auato tarrarocca madirra bazima mittemanauiuarrine ua ua narraripa uatizehema madiuitoui. Mittemanarrarideni naco arri dozo naniccassa inanemanarrarodeni naco uatizehema madimanauitoui. Deorrine auato inanarrarope touarrirarronani.
Zouaopa Zeso Cristoza quequeriqquimana narrari 7 narraroza dozo inarraro
4Ouape Zouao. Arrirraro occa uimape arri Asiauarricca oza panani 7 naniuarri Zeso Cristo tauimariza titiqueriqquimana narrarodeniza dozo onarraro. Deopa madiui. Nazama madiporrari. Niza ccarronauitoui. Ccarronazapa tiadeniza uima bicani inanarizana. Pocca rronehe inanarizana, onarraro. Deo Poua zosse zosse nanarra nauicca uiuittari tazarranima Poua Corime 7 quenaha domo uarrarideni naco tiadeniza uima bicani inanarizemanana. Poccadeni rronehe tiadeniza inanarizemanana, onarraro. 5Zeso Cristo naco tiadeniza narrarossa inanarizana, onarraro. Pouapa Deo Atti nauato taza parrissehera uati uati tarrari. Pouana taide nauatoniporrari. Pouapa zama bazimacca tamine deni torrarrari. Bazimaza zosse zosse narrari. Zeso Cristo iaza uati uana tarrari. Uimasiriza imadiraha poua emene toccarrarorrine icca uimasiri inarricarizarraro. 6Pouarrine pocca cacauanirriza iquerrenarraro. Pouarrine pocca Abi Deoza izepe irrirraro. Deoza dada toqquimade, uauati toqquimade iquerrenarraro. Nezape Zeso Cristoza ehetize nana. Pouapa bica taui, deni torraui! Pocca nauatonarra bazima ecauazanaponiuarrine pocca deni torrehe parrirenissa tarraro. Paparra pouapa nama zanapouitoui, inana, onarraro. Parrissa nema nana.
7Ticattomama canarri!
Zeso Cristo meme essenima ccaronaui qqui tiquenauitoui.
Madirra bazima qqui toquenauitoui.
Arra Zeso Cristo poua nanazoqquededeni naco qqui toquenauitoui.
Zama bazimacca madirrapa pouatoui orri orri quenauitoui.
Rrehe, parrissa nema nana.
8Ia Zozossede Deo Attipa: —Ouape Deo Dacorabote. Taidezama omadiporraroua arri rricaqquini bacco onanitoui −nade ia Zozossede attipa. Pouapa madiui. Nazama madiporrari. Niza ccarronauitoui.
Zouaoza Zeso Cristo auatorrari
9Ouape Zouao timecotedeni orrani. Titezerredeni Deocca cacaueheza iquerrenarraro. Madirra Deo Attiza nacasseraqquiri narraripa ia totonarrizo-baqquimana narrari. Naraha Zeso Cristorrinepe uima inauananiuarrine iparrireni.
Ouape ueni nocconiza zama uittacossani Patimoza oua inebomanezape pina toponi cocoroza ouezarrarossa narraro. Deo Atti maride orrarizeza, Zeso Cristo tauimari ouaccora-rizezape Pouaza nacasseraqquiri narraridenirrine tozepe orrarraro. 10Ia Zozossedecca uada domicoza Deo Corimecca dacorehe ouaza auatomaza mouini dacorehema ouedeuarri omittarraro. Atti moui pina rrorro trobeta moui dacorarrarissa naza omittarraro. 11Atti arrama narrari: —Arrirraro bazima tiaza noue onarrarope papeoza dozo tarri. Arri zama Asiauarricca Zeso Cristoza quequeriqquimana naui 7 narizarraroza uima zosse tinarizaniuarrine. Oza panani Epesouarri, Esmirnauarri, Peocamouarri, Tiatirauarri, Saradisiouarri, Piradeopiauarri, Laodiseauarri zosse tinarizarri −nade atti moui taza. 12Nerrecorrari atti? onaza piti onauarraniza qqui onanarra rrorrororo pinine zibehi tarrari orocca 7 quenaha qqui onarrari. 13Qqui onanarra rrorrororo pinine cacaueri naui nocconiza pina madirra bedissa naha ua canarrari. Pocca etero arabo tarraro amoriza bacco tarraro. Poua birri mete ssossoque zibehi tarraro pina orossa narraro. 14Tati conepe mopo tarraro. Pina eueue bedi mopoui conessa, pina ssono tetepinicca ssirini moponissa narraro. Poua noccopa pina zippo rrororonissa narraro. 15Poua amori naqui zibehi tarraro. Pina ccara tauicca onini bronze zippo ppoconiza torradarirraro, zotode rriti naza tozibehirrarossa narraro. Poua atti dacorarraro, pina passo dacorehema ssauaua canarrarossa narraro. 16Poua zepe nauatoniccaza amoua 7 canaha carrirrari. Poua arrarizape rrazirecca massito cauidiqquimera narrarossa narraro qquenarraro. Pano naco zibehi tarrari pina marri itetepiza ssiuerrene dacorarrarissa narrari.
17Qqui onazapa pina ouatiarrarossa narraro. Poua amoriuarri ouedimeza oponarraro. Naraha poua zepe nauatoniccaza oua bara naza uati tarrari: —Ticappina-rrerarri. Ouape taidezama omadiporraroua arri rricaqquini bacco onanitoui −nade. 18—Ouape camitta onani. Ozoqqueporaha onauatonizape omadi-zanaponitoui. Ouape chave ocarrini. Narrarope zoqquehecca, bobottacca narraro −nade Zeso Cristo ouaza. 19Nazapa oua cazosserrari: —Arri bazima qqui tinarrarocca dozo tarri. Arri rridapana torrarizarrarocca dozo, niza zotode torraniuarrinecca dozo tarri. 20Arra amouadeni 7 canaha ozepe nauatoniccaza qqui tinarrari, rrorrororo pinine orocca 7 naha qqui tinarraricca uima auatora teraha uimape arrima narraro: Arra amouadeni 7 canarraripa otauimariza quequeriqquimana narrari 7 narraro cacauade toquerrenarraridenicca uima. Arra rrorrororo pinine 7 narrari naco otauimariza quequeriqquimana narrari 7 narraro −nade Zeso ouaza.
