Zoda 1

₁Nirra ouimecotedeni? Ouape Zoda, Tiaco imecote orrani. Ouape Zeso Cristoza ozepe irrirraro. Arrirraro uima teppe tiadeniza dozo onarraro. Abi Deo tiadeniza uati uana tazapa tiadeni uaua tabaqquirrari, Zeso Cristoza tiquerrenaniuarrine. Zeso Cristopa tiadeni Cacauade torrarrari. ₂Deopa tiadeniza bica zanapona. Pocca rronehe, pocca touati uanehe naqui denima tiadeniza torrazanapona, onarraro.

₃Ouimecotedeni, titouideni ouati uana tani. Zeso Cristocca tossiuauehe ia bazimaza da inarizarraro tauimarini tiadeniza dozode touini oneraha uima onihi anizape narraro uimara tiadeniza dozo onarraro. Deo pocca marinarra parrissehecca iaza da inarrarope nema zanaponitoui. Narraroza icassiuaueraniuarrine. Arri Zeso Cristoza iquerrenarrarope narraro marinarraza parrissa inarraro. Narraro marinarra tecauemananissa tarri. Narraroza uima onihi inauariniuarrine bica terrerani. Madirrarrine cacarriqquimera-rreraniuarrine dacoraqquiri tiquenaza poni tiquenarri, onarraro. ₄Ouatti nema onarrarope ssamoqquiri tiqueneraha madirra tiadeniza rraui torrezimarraripa pina titessedenissa quenaraha tiadeni tocamaizabaqqui-manarrari. Narraridenipa uaidiraqquiri narrari. Attidenipa: —Deopa iaza uati uana taui. Icca uaidirehe manaconi ia tonarrizobaqqui-rrarauitoui. Ia touini inanicca inanani oppinera tani −quequenanarrari. Narraridenipa ia Maride, ia Zozossede Zeso Cristo orrari narrariza uattarroqquiri narrari. Deopa narrarideniza narrizoue oppina tanicca inanarrorarraro. Narraro uimape maittaccazama Deo Atti dozo naporraroza dozo iquenaporraro.

₅Deopa parrissa madirra inarrizobaqqui taui nauatoqquiri tiquenaporaha tibodideni uatome-mananiuarrine tiadeniza uati onapomarraro. Maittaccazama Izarraeo potemauidenipa zama Ezitocca madirradenirrine nanarrizo toquerrena-zanaporaha ia Zozossede Deo idinibaqquiza zama onihiuarri iaccanibaqquirrari. Naraha zotode potemauideni motapa: —Parrissa, Deopa ia Cacauade −quena-rraraza Deo Pouana inarricabaqquirrari quenade. ₆Deo pocca zozosse tabaqqui memeuarricca mota naco pocca narrizoue tonauanemanarrari quenade. Taide Deo Poua uinoriza bazima madimanazapa cacauehe carrimanaporrari. Naraha motadenipa poccadeni cacauehe Deocca danirriraha pouadeniza pina ponimassa neza inebomanarraro. Nazapa Deo Pouarrine cadeiaza birrideni rrore naha zizini oppinaboteza madimanarrari. Nama zanapomanazapa niza madirra bazimacca uima cattemaniuarrinecca uada bacco toquenauiuarrine. Nazana narrizoue denima oppina tanicca carrimanauitoui. ₇Narraro uimassa narraro naqui oza panani Sodomacca madirra, Comorracca madirra, naui uarrira tanicca oza panani bedeni carri tarizarrarocca madirra bazimapa uaidiraqquiri narrari. Uananehe onihi onihiza dameraqquiri narrari. Uananehe rriza, oppina tanicca naqui inanemanarraro. Nama quenazapa Deorrine rrororoni rricaquera taniccauarri madimanarrari. Poccadeni uimazape zotodedenicca bodideni uatome-manauiuarrine. —Parri, iaza naco nama narana −quenauiuarrine, onarraro.

₈Deocca narrizoue madirra uimasiri tonanemanarrarideniza ssonarini auato teraha tiadeniza rraui torrezimarraridenipa nama naha poccadeni uaidireheza dameraqquiri narrari. Pouadenipa: —Icca uadaza qqui inarrarossa inanani bica tani −quequenanaza narrarossa inanemanarraro. Poccadeni uananehe, poccadeni uaidirehe onihi onihiza pouadeni assire inauaidiremanarraro. Ia Zozossede Deoza, pocca zossenirriza naco uattarroqquiri narrari. Deocca zozosse tabaqqui memeuarriccaza naco tatamasso quequenanarrari. ₉Naraha Deocca zozosse tabaqquideni memeuarricca tamine Miqueopa nama narraraui. Maittaccazama Moize zoqqueza Deoza uauadide Tocorime-Taminepa Moize assire accone Miqueo tezerre cauadirezapa arrauarri uati, arrauarri uati quenarrari. Naraha Miqueopa Deo noppine cappinaza Tocorime-Tamineza tatamasso narrararrari. Poua atti arrima narrarora uati tarrari: —Oua Zozossede Deona tia narrizouitoui −narrari nade Miqueo. ₁₀Naraha mamaizadedenipa uima mittemanauissa tarrarazapa narraro uimaza attideni uaidira taza atti atti quenarrari. Pina banidenissa quenarrari. Bodideni uatouiuarrine ssamoqquiri naza pouadeni touini quenauicca touira dameraqquiri narrari. Narrarorrinena poua pouadeni tonauaidire-manarrari.

₁₁Rraho, narraridenipa uauattarro toquerrenauitoui! Pouadenipa pina maittaccazama Caimicca uima uaidira taporrarossa inanemanarraro. Zinirotouira naco dameraqquiri nazapa pina maittaccazamacca Deo Atti cacomerabote Baramissa quenarrari. Poccadeni ibouerrine pina maittaccazama Core pocca madirrama rricaporrarissa quenauitoui.

₁₂Timecotedeni tezerre tetideni cauanerara canaza titirripaqquimana naraha tiadeniza mamaizadedeni carrimemanazapa pouama uatizede, rripade, zede touira quenarrari. Deoza cappineraqquiri, tiadeniza cappineraqquiri nazapa pouadenirrine ticomehimanarraro. Pouadenipa pouadenizara bodideni uatoui orrari narrari. Pina meme esseni passo ccani rrirehe rrorroderrine ponima toqqueqquimarrarossa, pina aua bononora tarrarissa quenarrari. Poua bonouicca abazico bacco tocanaraha bono-rrararraripa uatiarrarissa narrari. Pina rraboma zoppa rreo naza uatiarrarissa quenarrari. ₁₃Pouadenipa ueni imenicca passo rrorroderrine rrazirema rriba rriba narrarossa quenarrari. Poccadeni uaidirehepe pina ssaborrani ssiquiuarri torreza auato tarrarossa narraro. Pouadenipa pina amouadeni rrano tocarraza zizini oppina taniuarri tocarrarrarissa zanapomanarrari.

₁₄Maittaccazama Adao potemaui tossoniqquimaui 7 nauicca Enoqui naco Deorrine mamaizadedeni tauimari uati taporrari. Poua attipa:

₁₆Mamaizadedenipa bazima pouadeniza ocassera tazapa atti atti nanarizemana narrari. Madirraza naco ssamoni ua quenarra narizapoui narrari. Attideni dacoraza pouadeni deni totonanemana narrari. Pouadeni touini quenauicca touira mamadimana narrari. Toui quenauicca carrimanauiuarrinepa madirraza attideni bica taza uati uati toquenaza pouadeniza totorra narraro.

₁₇Naraha tiadenipe pina mamaizadedenissa tiquenerrerani. Ouimecotedeni, titouideni ouati uana tani. Arra ia Zozossede Zeso Cristocca zozosse tabaqqui tiadeniza uati toquenapouicca tetideni rrima terrerana. ₁₈Attidenipa: —Zama rricabote nezape madirra attideni uaidira taniccaza rrirrizade carri tauitoui. Narraridenipa uaidirehe touira madimanauitoui −quenade tiadeniza. ₁₉Narraridenirrine ticauadirere cananitoui. Pouadeni touini quenauicca uaidirehe touinira bodideni uauato narrari. Pouadenipa Deo Corime cappiremanarra narrari.

₂₀Naraha tiadenipe nema tiquenerrerarri. Ouimecotedeni, titouideni ouati uana tani. Dacoraqquiri tiquenaza ticcadeni rrehenirri bicani poniraza dameraqquiri tiquenarri. Deo Corime tibodideni acco canaza Deoza uati uati titiquena nana, onarraro. ₂₁Deocca touati uanehema tiadeni tecauemananissa tana. Ia Zozossede Zeso Cristopa itoui uati cauanari canaza iaza camittehe rriquerreranicca da inanitoui. Narraro uima touira timadimana-zanaporri, onarraro.

₂₂Timecotedenicca rrehenirri rrapari tarrarodeniza tetideni uanaqquiri nana. Bodideni acco ticanabaqquimanazapa poccadeni rrehenirri todacorani naniuarrine. ₂₃Madirra ouahadeni narrizoue rriquerreraniuarri toquerrenaraha tocassiuauerauiuarrine acco ticanabaqquimanarro. Pina zippo rrororo cananiza madirra ssonizanaraha tidimoranimanazapa zori tinanemanarrarissa tiquenarri. Madirra ouahadeni naco poccadeni uaidireheza dameraqquiri nazapa ticcadeni touati uanehema acco ticanabaqquimanana. Naraha parri, poccadeni uaidirehe tiadeniza anirreraniuarrine tiadeni tecauemananissa tana. Poccadeni uaidireheza nacasseraqquiri tiquenarri, onarraro.

₂₄Deo dacorarrariza etizena. Icca rrehenirri tossamo-rreraniuarrine ia touacauabaqqui-zanaporrari. Pocca dacoreherrine Poua ssiuerrene bicaboteza uissoqquiri inehe idomo uezape uatizehe imeni icarrinitoui.

₂₅Nema nezape ia Tonassiuauade Deoza etizena. Deopa orrariui. Nazama aniporrari. Ouaha noueraui. Ia Zozossede Zeso Cristorrine icassiuauerarraroparri. Deo Pouaza: —Icca Tamine bicabote deni tirrani, daco tirrirani −inarraro. —Bazima Zossede tirrarraro. Tiape taidezama nema tarronarraroa rridapana nema tani parri nani. Nema tizanaponitoui −inarraro Deoza. Parrissa nema nana. Peperri.